得意屋快餐店

Open Now

Now Closed

幫襯只因近食物: 質素普通, 唔會有驚喜, 專做街坊生意服務: GOOD, 服務令人感覺親切, 勤快!環境: 舊式茶座FEEL , 碗筷殘舊如果都市人黎, 坐露天地方應該會覺得有少少渡假feel

唔通呢間餐廳太隔涉,所以都好少人專登幫襯?!所以冇其他人寫食評?我諗都係啦!以前一星期總會幫襯三四次,但依家廚房大佬換兩次,廚房水準差好多咯!就講最近一次去幫襯,我又同我年邁母親去食,一如以往我母親,都係因無牙關係,主要首選都係食蒸肉餅。前日去到有【梅菜蒸肉餅】,我都懶諗叫兩個。先兩個中式例湯【青紅蘿蔔煲豬骨湯】,例湯冇要求但衰一樣,兩碗湯都凍哂,應該擺好耐攤凍哂。個人一向覺得,食物如果係熱食熱飲,就一定要夠熱先好。如果係冷盆冷飲,就一定要好凍至正。所以碗湯超唔掂,以往從未有過咁情況,唔知點解換兩個後生水吧後,就會出現呢個情況?!可能後生仔貪方便裝定幾碗湯卦?【梅菜蒸肉餅】唔錯keep 到水準,但落甜豉油絕對唔夠,所以我要問阿姐,拎支甜豉油自己加添。另一樣又退步兼唔掂,就係碗白飯啦!以前呢度碗白飯好淋,都算啦...!我母親無牙食軟總好過食硬,但其實當時我母親都嫌太淋。但依家調番轉頭,係煮得完全唔過核,食到我母親詐哂型,話越越差喎!其實我都覺碗飯好硬,但我撈半碗例湯,就夾硬送飯食哂!我後生就話頂硬上唧,老人家隨時會哽襯丫嘛!其實食飯食飯,話明係【食飯】,除菜外,碗白飯都好重要,碗白飯唔好

其實我食呢間食肆好耐,平時屋企都會叫外賣,但多數都會堂食居多。呢度每日午餐有五款,午餐$23元送例湯及熱飲,如凍飲另加$2元外賣再另加$1元。平時呢間快餐店,做附近一帶中學生多,而且學生有特價$18元優惠,所以一到學校放食飯時間,就會連同鋪外座無虛席。平時我會打個電話去問,究竟今日有咩午餐先,之後我就會帶埋我個,七十多歲老媽子同去幫襯。我較為推介午餐有『梅菜/鹹魚/鹹蛋蒸肉餅飯、粟米肉粒飯、王叉燒餐肉炒蛋』等等...實在款式多不勝數。現場有個主力阿姐做得最耐,佢見襯我帶老媽子,佢都好好會為我叫午餐碟頭飯,幫我改為飯及分開上,但價錢就一樣...真好。呢度早餐及下午茶餐都好抵食,唔好睇間鋪細細間,但廚房好夠鑊氣,水吧出品都唔錯,加埋侍應服務親切,外賣送貨又夠快,真係唔錯~