新光粥店

Open Now

Now Closed

星期二，晚上8:58天氣開始涼（唔係凍），除咗煲仔飯，我最喜歡食粥、炸両、炒麵等。今晚夜了點才有時間食晚餐，由於回家車程最少一小時，想著找點簡單的醫肚後便回家，由尖沙咀走到不太熟悉的佐敦碰運氣。到了佐敦見到一間粥店，正合我意，但在門口停了數秒，心中覺得這不是我想入的店舖，然後再「掃了」隔鄰兩條街，仍沒有心水，心想好吧，回去之前那間粥店吧，這時候，在寶靈街一間較舊門外放著少量油器、蒸糕，我的腳已走向店舖。我點了最愛的皮蛋瘦肉粥和炒麵（炒米沽清），這才發現，店舖營業時間到9pm 😱。老闆娘和另外兩位員工（可能係兒子？）笑笑口說：「唔使急，我哋冇咁快走，慢慢食。」粥，當然好味。炒麵，不是我最愛，但 ok 的。最重要，係人情味，這些地道的食店，充滿兒時味道和回憶，但已經越來越少，因為老闆娘話齋：「租貴、人工貴、來貨貴！」沒想到，這舖的租金要咁貴！疫情前後經濟不太好，業主不願減租還想加，要是加租的話，我以後就冇得再來這裡食粥了。香港除了地產覇權外，可以容納其他讓社會平衡一點嗎？

見老店入去一試，點知有驚喜，碗粥勁大碗，即叫即滾，味道算可以食得出粥底煲左好耐，好綿冇米渣，蔥放得岩岩好，食得出爽口，魚腩粥入面啲魚腩好鮮甜，推薦老店甘既價錢有甘既質素，性價比好高👍🏻

老店，姨姨服務態度唔錯，粥幾棉下，豬潤非常可以，唔明白點解會有甘多負面評價咯，腸粉就无粥甘好啦，可能個人口味問題，我唔太喜歡這種口感的拉腸，但粥就真是唔錯，值得一試。

作為一間老粥店，除了風味重要之外，其實食物味道都好緊要，可惜呢度只保留到風味，真係令人感到傷心。早餐時間去幫襯，因為天氣真係太熱所以唔係好想食粥，怕未食完已經成身汗，於是叫咗豉油王炒麵、蒸蘿蔔糕同埋飲咗一杯豆漿。豉油王炒麵勉強合格，始終佢炒得唔係好夠乾身。蘿蔔糕就完全失望，我記得以前佢嘅蘿蔔糕味道唔錯，衣家就粉多蘿蔔少，唔掂。豆漿唔太甜就幾好，佢話係自家製，都似係嘅。

唔舒服想食粥。 經過此老店， 以為粥店唔會中伏，點知。。。。早上8點， 食客得4位。唔舒服， 點了皮蛋瘦肉粥， 蒸蘿蔔糕。皮蛋瘦肉粥好夠熱， 點知味精粥， 食幾啖已經覺得好咸好味精， 粥又唔香， 皮蛋瘦肉都沒有味。 。好少粥店有蒸蘿蔔糕， 於是叫了， 點知超難食， 個蘿蔔糕好像膠咁， 筷子一夾， 舊膠糕散開， 粉糕及蘿蔔絲散開， 糕唔軟糯， 質感好怪。。食左幾啖頂唔順， 放棄。已經唔舒服， 想食d清淡食物， 點知味精多， 想再叫其他代替蒸蘿蔔糕， 又怕其他都唔會好食。粥食左10啖， 蒸蘿蔔糕幾啖， 10分鐘內比錢走人， 非常非常失望。（仲衰過海x粥店）👎👎👎總評： 3分🫥粥底都可以咁難食， 唔知點算。

今日來了這家舊式粥品店，味道就真係一般，不過風味搭夠。早餐時間來幫襯心中覺得都係要食返一D屬於早餐的粥，碎牛多青就係其中一款我的最愛，味道還可以。齋腸就一般般啦，佢係結實型腸粉，所以真係飽肚嘅。另外仲叫咗杯豆漿，係自家製的，都OK。

呢間舖好似開咗好耐，今日食過之後只覺得佢D野只屬一般。皮蛋瘦肉粥粥底唔錯，皮蛋都靚。魚片粥同一個粥底所以都好食，不過魚片數量比較少。蔥花係用隻羹裝住，可以自己決定落唔落。炸兩都OK啦，當然唔好諗住油炸鬼會脆同熱啦。鹹肉粽味道OK，無一大舊肥豬肉所以食落真係無咁香。鹹煎餅個Size都大不過無南乳味，記得以前食嗰D係有嘅。

中午沒胃口，突然想起家附近的新光粥店，於是就走去一試。走到門口附近，已經聽到店員熱誠招攬路人入內光顧。裡面裝修很有傳統粥店風味，白色瓷磚，不華麗但整潔的佈局。店員很有禮貌協助下單，廚房的小弟一人勤快煮粥做腸粉。價格方面也很划算，最便宜的碎牛肉粥才$20，我點的叉燒腸粉和蔥花蝦米腸只要$18，還要是即叫即做。味道方面，腸粉皮適中有米味道，叉燒量多口感不錯。正門口擺放的油條炸兩色澤金黃，下次要試一試。

今日係附近staycation, 早上去公園晨運後去呢間懷舊粥店食早餐。小店雖然裝修舊，但入面算係乾淨。人情味濃。今次點左魚片艇仔粥，足料，有幾條薑絲辟味炸兩，正常炒米粉，都ok 。熱豆漿，佢係煲熱俾我。好有誠意。總結：建議大家有機會可以去試下支持小店。食完唔口渴，冇乜味精的感覺。