林香檸手打檸檬茶 (豉油街)

Open Now

Now Closed

林香檸真的是味道極佳的手打檸檬茶，首先佢哋每杯檸檬茶都係用人手去打，之後，啲檸檬打到好出檸檬味，但係又唔會太酸。而且，林香檸有好多唔同嘅茶底任君選擇，啲茶底又濃郁又夠茶味。咁靚嘅茶底加埋咁好嘅檸檬，真係配合得天衣無縫。佢除咗有手打檸檬茶之外。仲有好多唔同嘅查飲，好似有奶茶，不過佢哋主打都係檸檬茶，所以其他嗰啲副產品，我就冇去試到啦。仲有一個好貼心嘅位置，就係佢哋門口放咗兩張凳，因為排隊嘅人真係太多，有凳坐下會好好多。

見食完飯8:00冇人等，就滿心歡喜試吓買杯招牌手打檸檬茶。原來冇得走甜最少都要3分甜，叫左小冰試吓，飲落味道係幾清新解渴，但係完全冇檸檬嘅酸味，飲咗兩啖就冇，剩返成杯都係大粒冰，冇諗過小冰會變咗增多冰🙁

雨神介紹話好飲叫我哋試吓，於是就試下，其實都唔多人點，咪試下囉！🍋林香檸渣男手打檸檬茶 $30呢次係第1次係香港飲，都滿心期待，點知茶味一般，香水檸檬唔夠香，好失望💔完全係「丘大叔」香港版2.0🥹同期望有落差～ 完～但早幾日同thaiholic飲到杯正嘢🍋下回分解～～如果大家中意俾個like支持下🤟🏽 𝗖𝗶𝗮𝗼🍋林香檸手打檸檬茶 (旺角)🍋旺角豉油街21B號昌記大廈地下A2號舖..

根本全部都係冰！飲都飲唔到😢😢近排好興「爆檸檸檬🍋茶」，旺角更加開多左好間呢類手搖店！見呢間好多後生靚仔，靚女幫襯！咁我都忍唔住幫襯，叫左 皇牌焦點嘅 手打檸檬茶🍋入面細細鋪位，連收銀有8位員工，出飲品都幾快，5分鐘就有 拎到杯野啦～都幾大杯，有啲期待！飲落第一啖,,,,,再飲第二啖,,,, 同「茶記檸檬茶無咩分別」，只係「多左少少🤏青檸味」唔緊要啦～ $28蚊/杯～ 繼續飲,,,,, 點解啜極都啜唔到既,,,,,飲筒咁粗啜極都係啜到半啖😱 ,,,,拎開紙杯硬卡睇一睇！明白了！杯入面全部都係粗粒冰塊🧊同好多細細舊青檸！ 根本就無乜檸檬茶🍋就算sale夏天一飲就會好爽！但根本就飲唔到！啜到半啖半啖，嘥鬼氣！間鋪仲要講明 （冰塊同甜度比例經過悉心調配，如有需要調節可能會影響口感/味道的喔）睇完呢個我仲嬲！你既悉心調配就係咁樣？D冰好平咩？我寧願你俾無味水都唔想你俾咁多冰！！！根本就飲唔到！一世BlackList😡

每杯都有幾舊大大舊嘅香水檸檬，睇住啲店員出盡力咁錘打啲檸檬🍋真係辛苦哂佢哋。🔸 招牌手打檸檬茶(💰28)🔸 渣男手打檸檬茶(💰30)我哋叫咗三分甜，健康啲嘛無咁甜，檸檬味會勁啲。不過如果要好飲啲，就應該叫五分甜。兩款檸檬茶都好味，茶底幾濃，不過渣男個茶底就好飲啲，但渣男唔知點解細杯啲喎。檸檬酸真係各花入各眼，我就好鐘意呢啲酸may may嘅飲品啦，睇黎我之後喜歡會成日飲林香檸啦✌🏻Overall評分: 8.5/10🍋

最近香港開咗好多手打檸檬茶專門店，熱度直迫手搖奶茶🤣 所以呢晚睇完戲都唔執輸走咗去買一杯試吓-鴨屎香手打檸檬茶 $32見到個名咁得意 所以就叫咗佢嚟試吓 其實鴨屎香嘅意思其實係講緊佢哋嘅特色茶葉 飲落果然係真係有少少唔同 佢嘅茶味都幾香濃 有一陣特殊嘅香氣 有少少好似香茅嘅味道 移除嘅檸檬係用咗香水檸檬 所以嗰個香味會更加出 因為想試真啲個茶底同檸檬 所以我哋揀咗三分糖 不過其實都夠甜 -雖然個茶底好特別，而且佢哋聲稱真係人手打嘅檸檬 不過要賣成$32嘅一杯檸檬茶 抵唔抵就真係見仁見智啦-📍林香檸手打檸檬茶 (旺角)旺角豉油街21B號昌記大廈地下A2號舖

而家市面上越嚟越多檸檬茶舖，作為檸檬茶控的我，有不同檸檬茶試吓真係好開心，檸檬茶有勁多款式，如果有選擇困難症就大鑊！🍹招牌手打檸檬茶自己製作嘅紅茶底🐤鴨屎香檸檬茶茶底偏向烏龍茶🙆‍♂️渣男檸檬茶味道類似招牌，但係會更加濃郁，所以會更加細杯。🙇‍♂️原諒檸檬茶本身加咗綠茶底，啱晒啲喜歡甜嘅朋友。第一次飲一定要飲招牌，冰無得減，甜到可以選10分5分3分，杯飲品都算足料，入面都有幾片香水檸檬，亦食得出有少少果肉喺入面，但係茶底偏淡，充滿香水檸檬嘅香，但係掩蓋了紅茶的香氣，不過亦冇無苦澀味，証明茶膽唔會擺得太耐，擺到過晒龍！下次可能渣男比較適合我🤣另外希望可以有得選擇減🧊冰🙏🏻Ps: 搖勻先好飲-

新鮮即叫即整既手打檸檬茶🥳今日同同事食完午餐，想飲d清新既野飲，就去左買林香檸❤️我叫左個鴨屎香檸檬茶 3分甜同事就叫左招牌手打檸檬茶3分甜（2款分別據說是茶底不同）只能夠選擇糖度，冰量固定左既😝因為係即打，所以檸檬好新鮮，唔會乾哂身咁，好似仲有加埋西檸一起打，就更加香☺️☺️唔知店家係咪有撩走d核先，所以並沒有出現因為打爆粒核而有既苦澀味☺️推薦！雖然午飯時間都有唔少人幫襯，但係店員好快手，我地等左陣就有得攞

今日約咗朋友去旺角shopping, 經過見到有間100%手打檸檬茶飲品店，即刻去買返杯黎試吓。我哋叫咗二杯檸檬茶，都係店舖主打推介。下午時段都幾多人排隊買，落單之後要等一等。招牌手打檸檬茶 3 分甜茶底唔算好濃，檸檬用青檸檬，要了3分甜比較清淡，檸檬清香突出，飲落沒有澀味，味道清新鴨屎香檸檬茶鴨屎香係烏龍茶底，茶底比招牌檸檬茶底香濃，檸檬香味加上鴨屎香茶底，飲落味道好特別，酸甜度剛剛好，二者非常配合手打檸檬茶味道不錯，冰凍消暑，經過可以一試

不嬲都麻麻地檸檬茶,朋友話頸渴想飲叫左杯鴨屎香檸檬茶比左啖我試,竟然唔錯喎😂新鮮榨出黎好清新,除左檸檬嘅香味茶底仲超級香濃,飲落少少澀,唔會好甜,超解渴👍🏻最後我自己都叫左杯😂

而家手打🍋店開到成行成市 間間都好似差唔多咁 見到呢間成間黃色做主調 仲要標榜100%手打香水檸檬茶就買嚟試下❣️鴨屎香檸檬茶 $32採用自家香水檸檬果園特選嘅香水檸檬 檸檬果味濃郁 酸度適中 而且香味獨特💓難怪門口嗰度寫住「一口上癮，人間清醒」絕對唔係誇張❣️原諒檸檬茶 $32加入泰國香茅葉mix & match 配搭檸檬果肉果汁 經過精細拉絲工藝"2️⃣倒3️⃣拉"嘅完美融合 而且仲要即叫即整 每杯新鮮製造 認真當住你面100%純錘🔨打出嚟 怪唔之得mix得咁均勻❣️黃皮特調檸檬茶 $36搶先飲左呢杯新產品 基本招牌檸檬茶底 加左夏天盛果:黃皮同陳皮 成杯即刻變得冇咁單調經過多番調配 每杯茶冰有獨特嘅黃金比例 落單嗰時店員都唔建議少冰或者走冰 想試吓創新特別嘅你呢杯絕對唔好錯過

試過一次唔會再試😵飲落似蚊怕水 可能係我試果隻味出事 香水檸檬誤以為本土野原來係祖国開左幾百間既香港分店lolll送俾我都唔飲 究竟有幾港豬先會吹捧呢啲冇質素可言既東東另外冰太多😵‍💫唔俾人要求少冰 話咩黃金比例lollll唔想大家抱有期望我去茶餐廳好高 茶餐廳都十幾蚊有找唔建議花成30蚊去叫杯難飲版凍檸茶lolll

好耐無飲，經過特登去買，點知飲落去個檸檬係普通檸檬，無左香水檸檬既味道. 而且又酸又澀，茶餐廳嘅檸檬茶仲沖得好飲過佢，質素完全下降. 檸檬完全唔合格. 係咪太多人幫襯搞到質素都唔可以咁「那西」？ 唔會再幫襯

之前啲人話呢間嘢好好飲，所以特登嗌外賣，本身好鍾意飲檸檬茶，就叫咗杯特濃手打檸檬茶，同埋招牌手打檸檬茶，仲有鴨屎香手打檸檬茶，嚟到成杯都係冰，飲兩三啖冇晒，真係唔值30幾蚊囉

林香檸源自湛江市，全國已有超過370間分店。在旺角開業前，香港同事前往總店接受培訓。品牌最大特色是在廣西設有專門的檸檬莊園，使用香水檸檬，形狀像黃檸檬，外皮為青綠色，不酸不澀，香味濃郁。每杯茶用1個檸檬，採用中間皮少肉多、果汁最豐富的部分，檸檬味濃郁、酸度適中、香味獨特。每杯飲品堅持人工打檸檬新鮮製造，加入茶葉後手搖，不使用機器，以免搖晃過度流失檸香。茶葉講究，採用紅茶，每半小時煮一壺，超時倒掉以防苦澀味。還有其他茶類和配料可供選擇。檸檬果肉、果汁和經過精細拉絲工藝“兩倒三拉”的茶完美融合！我最喜歡的是鴨屎香檸檬茶，茶味香濃又清新！另外白桃檸檬茶也值得一試！