耘 (豐盛創建大廈)

Open Now

Now Closed

食咗好多間啊，都搵唔到好似呢間咁滑，份量又多，中環嚟講算係好抵食。 記得加蛋加辣椒醬。之前呢一度都有等好耐嘅問題，而家我通常喺網上訂定先，跟住真係要等到佢話得先好落去，通常lunch time 20分鐘左右啦，已經比之前好好多了。

老闆娘好Nice，食品味道依然咁好食，每次必選沙茶牛肉雞蛋腸粉，成個中環最好食嘅腸粉就係呢度誠意小店，大家應該多多支持。冬天仲可以試吓熱嘅咖啡味豆漿一啲都唔甜，但係豆味非常之濃。

手拉腸粉好好食，多種選擇，老細姐姐好人，姐姐每次都畀兩個豉油，又幫我加辣醬，等個時候又唔會太耐，食物好新鮮又好好味，手拉，腸粉又嫩又滑，請多多支持呢一間舖頭，如果想快上網訂，因舖頭只係兩個人。

【極差的服務，呢間店真係次次令人成肚氣。】即使一早online order好，去到都一如既往等好耐。攞翻Office打開先發現腸粉居然唔配醬油，食物上仲有塑料泡沫不明物。打過去，女店員居然叫我攞翻去（你叫人等咁耐，仲做錯嘢，仲好意思叫人再行多趟，何況係工作日食飯時間緊張嘅區域）。再問「可否退款」，回答「不可以」，藉口今日忙cut線。呢個女店員，往往脾氣極差、EQ極低地趕客，online落單介面未改進前，無「走蔥」選擇，客人備註佢睇唔到就鬧客，堅持要客選擇「走蔥」或備註「大隻d字」，完全無視客人反饋。

Lunchtime如果你係食1點，請提早45分鐘落單，否則有排等，等到你炆。12點半落單時openrice app寫30分鐘可以自取，大約20分鐘後落到去問仲未有，最後1點15分先有。第1次叫真係失晒預算。腸粉係好食，但我叫豬肉腸+蛋啲豬肉好鞋，豬肉唔好食，腸粉好味。但粢飯千祈唔好叫，得糯米多，好少‘’涵‘’，油炸鬼淋過條毛巾，同埋真係有啲酸唔知點解，前幾個comment都有同我一樣情況，粢飯千祈唔好叫，粢飯千祈唔好叫，粢飯千祈唔好叫！！！

今日嚟到呢間腸粉專賣店，揀咗兩款讓我瞓意嘅特色腸粉。香嫩牛肉腸粉係咁滑，牛肉滿滿哋，每一啖都咁滿足；蜜汁义燒腸粉又唔遜色，义燒爽口，腸粉腍嫩，一蘸果汁就已經口水直流🤤。配上嘅熱豆漿，滑滑哋，暖笠笠咁真是完美。凍咖啡清涼解膩，味道正宗，啱哂我哋呢啲愛食又愛自己嘅食客。整體嚟講，呢度嘅腸粉真係值得一試，唔止得個滑字形容到，仲要添上層次分明嘅爽口同鮮美。梗係要推介畀大家知，記住嚟嘗鮮架！👌😍📍

如果你係中環返工，就一定有聽過「耘」，呢間拉布腸粉開左兩年左右，日日lunch time都大排長龍，師傅即叫即整，值得一讚嘅係，除左師傅身水身汗做岀嚟嘅心機嘢之外，味道好仲要價錢平，係中環食到個$40嘅lunch 都真係偷笑。-你以為石磨腸粉啖而無味又食唔飽？咁你實在太年輕啦，我次次食麻醬雞絲腸粉都好飽，連男士都夠食(大食少少嘅男士可能有時加個燒賣或者粢飯🤣)，雞肉又多，青瓜又足料，有時想豐富啲就會加埋蛋，夠哂有營養啦！-另外，唔好以為佢嘅家鄉蒸米粉，就係普通炒米粉，入面嘅材料都好豐富，米粉亦都唔會一pat pat，吵得絲絲分明。順帶一提，燒賣附送嘅辣醬油都非常惹味，鍾意食辣嘅朋友，千祈唔好錯過！-另外佢嘅豆漿咖啡都好好飲，用豆漿取代奶去調製咖啡，飲完特別醒神！順帶一提，如果唔想排長龍，記得預早15分鐘WhatsApp餐廳，就可以落咗單先，煮好就拎得外賣啦，方便快捷！

今日突然想食腸粉， 記得利源東街呢頭有間，價錢都可以接受12點鬆啲lunch 過去未有太多人, 好快就落單等大約5-6分鐘就拎得期間都不斷有人嚟order , 唔想等太耐一係早啲落嚟或者上網叫定先， 佢地有WhatsApp 落單第一次食叫啲穩陣野：豬肉腸+$5蛋+$5芫茜一盒有三條個皮好薄又唔會糊口， 芫茜都食得出好新鮮夠茜味，加$5 份量都唔算少豉油係另外一個盒仔分開上，幾好👍🏻如果佢可以杰啲掛身小小會更好！ 落單員工好有禮貌，見有人帶唔夠錢都肯做左比佢等佢轉頭先比錢如果大食或好肚餓可能要叫2盒或加其他野先夠

上次食腸粉覺得唔錯，今次試粢飯，好失望。d飯粒好鬆散，握得唔實。油炸鬼好淋。d肉鬆炸菜是酸的，唔知係調味奇怪定壞左。食左一半就唔敢食，扔左，希望唔會肚痛。另外叫左盒生菜，正常唔錯。

啲嘢係好食嘅 但從來無一次係可以準時出餐今日簡直係離譜 仲有幾分鐘就真係等咗成粒鐘做唔切咁多外賣單就唔該唔好接 或者直情喺個app度講明要等至少45分鐘 有人經過想買嘢食 佢竟然仲可以同人哋講話等大約10分鐘 mind blowing 🤯

耘😋😋😋曰磨手刮鮮味腸粉中環都可以吃到新鮮石磨手刮熱辣辣腸粉、「耘」款式超多、淨係腸粉都有14款、手工製作、即叫即蒸、仲可以追加配料、雞蛋、粟米、椰菜絲、酸菜都有提供👍🏻真係用❤️炮製、特色、出色、招積！😋😋還有麵食系列可供選擇yummy yummy 粢飯、燒賣、唔少🉐️實在太多款式想食、新口味麻辣牛肉腸粉$38、腸粉皮薄滑滑、好香嘅白米味、因為薄嘅原因、粉皮會雛起嚟、仲好彈性似腐皮咁、煙煙韌韌、加左麻辣口味、微辣、刺激味蕾、牛肉的鮮味配埋淡豉油、掂、好正👍🏻秘製醬油燒賣6粒$14⋯燒賣大粒彈牙配埋祕製甜豉油、yummy yummy 😋 追加粢飯一份$20、粢飯包得好飽滿、內含肉鬆、油炸鬼、榨菜⋯⋯糯米軟綿綿、味道口感好豐富！凍微糖豆漿$18⋯濃濃香味的黃豆、最重要無豆渣、帶少許甜、適中配🈴️、👍🏻溫馨提示： 醬油經過肉汁煮理、素食顧客請店舖示意、給予一般豉油👍🏻👍🏻#中環#早午餐#鮮味#耘中環利源東街21號豐盛創建大廈地下6號舖港鐵中環站D二出口、步行約3分鐘

之前放lunch行過利源東街見到有石磨腸粉，今日早餐忽然好想食。石磨腸粉，係用石磨將大米磨成米漿，磨出黎嘅米漿，保留左大米嘅大部份營養，特別細膩。全部即叫即蒸，熱辣辣。🌟嫩滑淨腸粉🌟腸粉香滑，皮夠晒薄，好香嘅白米香味，漿底打得均勻，因為簿嘅原因，粉皮會皺起嚟，索汁力勁😆加埋淡豉油，非常美味。🌟雞蛋腸粉🌟滑得黎有重蛋味，口感幼細，帶點麻香，同樣皺起嚟，滑嘟嘟😋😋🌟秘製醬醬油蒸米粉🌟好少見到有蒸米粉食，效果唔效，唔會蒸到太軟身，冇炒米粉咁油膩。夾雜豬肉同埋魚片,真係豐富又健康嘅早餐。🌟微糖豆漿🌟早餐時段有半價優惠，豆味香濃，微糖既健康又唔會太甜。所有食物，即叫即整我，大約等左15分鐘，所以唔想等，下次一定要WhatsApp預早落定單😝

自己本身都喜愛食石磨腸粉，但係其實港島區相對少餐廳，估唔到今日比我喺中環見到有一間石磨腸粉餐廳！位於橫街入邊，舖頭不大，外賣為主 簡單要咗沙茶牛肉腸粉 同蜜汁叉燒腸粉 另外要多咗個粢飯 ～石磨腸粉份量好大，沙茶牛肉味道突出 少少辣 配上滑溜嘅腸粉不錯吃😆另外蜜汁叉燒非常香 吃下去唔會乾爭爭 切得比較大粒 有咬口～粢飯就係正常一般水準，有肉鬆榨菜等等另外因為太口渴嘅關係叫咗杯豆漿，賣相精美 豆味十足又唔會太甜，幾正🥰

奉勸大家如果午飯時間想準時拎餐嘅話唔好叫呢間。叫過幾次，係同事推介，大家都話呢間好食，但成日錯單。我好好彩，每次叫餐都冇出錯，亦真心覺得好食，夠飽。價錢唔算好抵食不過中環區算係咁啦，比較係其他外賣算平，而且食物都幾健康，唔會好油好咸。不過最不滿嘅係佢嘅取餐時間，即使已經預早比訂單，都不會在預計時間內得到餐點。去到門口排長龍就知咩事，聽到大家都係用唔同嘅app落單，但依然係企哂係門外等。我有經驗已經係比預期時間遲15分鐘到，最後係足足遲左24分鐘。如果份餐一早整好左放係到唔拎，又會凍哂。教我可以點係有限嘅lunchtime 食到熱辣辣嘅腸粉呢？

中環利源東街外賣舖加左間腸粉店。呢度出名係有石磨腸粉同埋麵食。仲有好特別嘅豆漿咖啡。買外賣，幫襯呢度嘅豆漿咖啡，今次就試下啲主食啦。麻醬青瓜手撕雞腸粉 $39加$4加野菜絲。呢個好薄，好軟。比平時係酒樓食嘅軟好多好多。加番啲豉油就更濃味。酸辣蒸米粉 $40有豬肉、魚片作為配料。呢個係咁拌米粉，個酸辣程度都幾滿意，係幾新穎嘅食法。咬落冇蒸爛，啖啖咬口。微糖豆漿 $16豆漿好大杯，係平時兩倍份量，同同事share啱曬。味道真係唔係好甜，幾啱注意健康嘅大家。