蝦川海鮮燒肉放題 (Closed)

今次係小弟第一次寫食評，如果文筆欠奉，望各位海量包涵。我們一家四口今日食6:30時段，客人唔多，基本上近乎包場。放題食物及飲品款式都足夠，最值得欣賞是海鮮船，鮑魚夠大隻，其他海鮮亦非常新鮮，還可以追加。不過令我非寫首次食評不可的原因是食肆員工及老闆服務態度極佳，得悉家人生日，特意預備咖啡味蛋糕，而且還即時畫上別出心裁的生日牌，此舉行為的確窩心。雖然元朗食肆繁多，但小弟還是首次感到被如此重視，賓至如歸的感覺。

前排太忙, 完全唔記得左呢餐放題! 放題分2個時段, 去得嚟都要夜場 (8:30pm – 10:30pm) 夠鐘就收食物, 拎左而未燒完既可以繼續! 大閘蟹大慨 8:45pm 開始 “派”, 店員先拎一大盤出嚟叫我哋影相, 之後逐枱按人頭派發一隻 (說好的放題呢?) 喺呢2小時任食時間內, 除左派漏一輪, 我哋每人總共有6隻, 而咁啱每人都有一隻蟹係壞既, 所以食得5隻! 最後派發時間係 10:20pm! 除左壞嗰隻基本上隻隻爆羔! 除左蟹, 仲有雪到成舊都係冰既海鮮, 腸仔, 午餐肉, 雞翼之類可以任燒任食, 質素唔差, 雞軟骨最好味! 飲品, 湯, 炒菜, 大閘蟹粥…呢啲熟食都係任食 (不過麻麻)!雖然大閘蟹唔係任食同埋坐得太迫, 但係整體嚟講係唔錯既,薑茶幾好飲! 所有店員都超好禮貌! 

聽朋友介紹話好高cp值，就同屋企去試一試，放題分兩時段，我地揀咗早場18:00-20:00，$288免加一呢間放題其實係大閘蟹配給，店員隔無耐就拎一大盤出黎逐枱派，一人每次派一隻根據間鋪既專頁聲稱，開始15分鐘內會派第一隻，每round派剩既蟹就會分比有需要既顧客，但係當日18:22 先開始派第一盤蟹，食到最後都係總共派得5次，舉手想再要都無🙄另外仲有帶子同生蠔可以去排隊拎，每人排一次只獲分配兩隻，就算你話4個人，店員都係叫你再排過，每次拎既帶子都係一舊冰，慢慢燒住等熔雪⛄️至於燒肉，始終吾係主角，都無要求啲咩喇，預咗係啲平平韓燒水準，等蟹既時候有啲野燒下已經好好$288 呢個價錢比起其他大閘蟹放題店，又真係平既，呢到食物既選擇又真係多既，吾好期望咁高可能食得開心啲🤪

早前見到有post推介大閘蟹主題既BBQ放題🔥🔥🔥價錢$288就食到大閘蟹一於book位食，由於太多人食，我都book左幾次先book到有位，最尾book到A時段6-8pm入面環境不大，坐埋位差唔多20分鐘就出爐大閘蟹，每人一隻，去到7pm已經派發第三隻，要食哂整整一隻蟹真係都要花點時間，所有我留番d手手腳腳最尾食講到質素，大閘蟹隻隻好多糕每隻都係公蟹，咁既價錢可以食得過，我仲想食多轉tim 至於時間，可能我食得比較慢，時間唔係好夠盡情食，所以要準時入座，爭分奪秒。最後要記得飲自家姜茶，真係好好飲我仲想食多碗自家制蟹泡飯，食唔切😂BBQ放題驚喜：有大眼雞BBQ放題有海鮮：帆立貝、蠔

秋風起，蟹仔肥，朋友話有間大閘蟹任食即刻衝去喇。入到去蟹仔未到，當然走去睇下有咩熟食填肚，熟食不算多，吃了個卡邦尼想不到不錯，多數任食店自取的多數不好吃，宜燒烤料都有十多款給客人選擇，拎完熟食就有蟹仔來每人一隻，蟹仔不細，蟹膏幾肥，中段來了條黃花，加了泰式醬汁有驚喜，即刻有提鮮效果。因為是燒烤店關係，但抽風系統有點不足，越吃越有仙境出現，這個希望改善，埋尾當然要飲番杯姜茶，杯茶好夠“姜”，喝幾口即暖身，其實喝埋杯姜茶都夠晒鐘，但老闆沒有催客人埋單，這個很讚

元朗新間的海鮮放題店，適逢大閘蛋季節，當然要吃個夠本！新店當然人頭湧湧，完全沒有walkin的機會，想吃一定要book位了。分兩個時段，我們今次是8:30入座，可吃兩個鐘。燒烤食物是自取，選擇又也挺多，不過飲品選擇很小。在等待大閘蟹煮好的過程，燒一下其他食物！這裡的肉類也餣得好好，味道很足夠的。因為是使用GAS爐，所以有油的肉類要放外圍，海鮮丸類則放中央位置。大閘蟹來了！每round每人分一隻，去到後期其實不是每人都吃到，可能會分多過一隻呢哈不過大閘蟹沒期望中多膏，但也滿足的！！！最後前前後後吃了4隻大閘蟹，其實要回本應要留肚吃大閘蟹啊！＄288免加一，事實是物超所值！小總結，地方的確有點小，座位坐著有D逼，但場內氣氛很好！老闆派大閘蟹時會吹下水！

實在太想食大閘蟹，睇到呢家新開的評價唔錯，就打電話預約。預約了幾次才約上，睇來好熱門。兩個鐘，上了5次大閘蟹，平均一人5隻。之後無再上了，並無可以吃到8.9隻的紀錄。唔知道係唔係11月份和10月份開店的時候策略唔同左？大閘蟹可以，味道唔錯。然後講講其他食材，雞翼有驚喜，好味，大眼雞新鮮。唯想反映就係扇貝，我們只拿了兩個，之後一直沒拿過。我們過去吧台既時候，三次都話沒有了。然後我反映比兩個工作人員，都係沒點俾答案。建議我們坐離吧台遠既，係轉角位，都睇唔到吧台，是唔是需要提醒一下？整體有價值既食材無點食到，感覺性價比一般。留位俾商家提升競爭力。

同朋友預早大約兩星期訂咗位， 今日終於嚟到食大閘蟹嘅大日子啦! 未夠八點半門口已經好多人等入去， 可能因為上一round既人食慢咗所以我哋遲咗少少入座， 不過老細一早講定會補番時間畀我哋， 所以都唔使擔心。入到去之後啲座位都幾舒適， 我見好多枱都係兩個人坐一張四人卡位， 枱面就有一個gas爐， 上面放咗個磯燒嘅裝置。 枱面亦都擺放曬燒烤同食蟹需要用嘅架撐， 包括較剪 夾仔 同埋 放蟹殼嘅兜 等等。 仲好細心咁分咗兩款唔同嘅夾仔， 用嚟夾生野同熟嘢。 每枱仲枱面同枱底都有垃圾桶， 就算食蟹好多蟹殼， 都唔會搞到太凌亂。🤔 至於食物就集中放咗喺一間食物房入面， 肉食類都有好多， 包括一啲雞翼 豬扒 牛扒 雞腎 雞軟骨 等等等等 🤤 順帶一提我要推介大家食燒午餐肉， 雖然聽落好似好蠢豬， 但燒完出嚟午餐肉係外脆內軟㗎， 絕對值得一試。🥰🥰 另一個肉食推介係雞翼， 用嗰個爐燒有燒烤嘅效果， 可以做到脆皮雞翼， 超正! 😛海鮮類有大眼雞 蠔 同埋扇貝， 蠔同埋扇貝係急凍嘅， 唔算太大隻， 不過我主要都係食蟹所以冇乜所謂。 大眼雞就超好食，又易燒。🤤食物房入面仲有多款醬料， 蒜蓉蔥辣椒豉油 全部有

任食大閘蟹來講呢間真係唔會差係邊位於朗屏鐵路站行五分鐘就到既🤔交通上係便利既不過對於市區既人 真係似動物大遷移🤭🤭我地book左8:30呢個timeslot 門口排滿晒人 相信都係book左位既人一到8:30 個個就蜂擁而上 座無虛席一盤盤剛剛蒸好既大閘蟹就分比客人享用2個鐘 我一共食左10隻以上 個個都爆晒膏🤤🤤除此之外 仲🈶️好多野食可以燒 一邊燒一邊食好寫意呀🤭🤭最後價錢288 不用加一 我覺得好抵 咁既質素來講

由晏就未開市已whatsapp訂枱，睇完唔覆唔應，算！心諗你哋未開鋪唔覆好正路，唯有再耐心等候一下...點知到第二日都仲係無聲無氣。有/冇位應一句都真係咁難？？打比你哋又唔聽，只限Whatsapp訂枱，但Whatsapp咗唔理唔應！同埋，不如你哋直接關咗上線功能會無咁嬲。原本好有興趣食，但而家未食都一肚氣，幾好食都無用！！！另外比個建意你哋，如果Whatsapp應唔切嘅，就整返個致電訂枱，唔好剩係限一樣。會搞到想食嘅人，等都等到嬲。

終於又一年，終於到大閘蟹既季節本人唔係好鍾意食蟹，但唯獨大閘蟹係我既最愛，咁多年黎見到d大閘蟹放題都係得過睇字，因為太貴同太遠了，今年終於唔使得過睇，近近地元朗就有，又因為試業價$288一位免加一，早一星期訂位要waiting list，到當日先打返黎話有位，有驚無險，終於有得食食2030果輪，一入到去就衝入去拎野飲同野食，大閘蟹係坐係到等派既，而有咩野食呢，有元貝，蠔，大眼雞，其他野食都係普通野，雞腎丫腸仔丫午餐肉多春魚果d啦。 飲品有老細自己煲既薑茶，解茶，康師傅飲品同七喜 OJ果D。 每10零20分鐘就會派一次大閘蟹，有時會比多隻你地枱既其中一人。 2個鐘total會派5次定6次我都唔係好記得，最後一轉係2215開始派，不過因為已經有好多人飽左會唔要，老闆會派多幾隻比繼續努力中既客人，我地一家4個人，就係努力到最後既小伙伴，最後哥哥同爸爸每人食左8隻，我就7隻，媽咪食6隻，食到個個都好滿足😋😋 而且又有我最鐘意飲既解茶同老闆煲既薑茶。 講真，煲薑茶真心值得一讚，平時爸爸同哥哥都唔係咁鐘意食/飲d薑味太重既野，呢煲薑茶佢地係會飲，而且係好重薑味既情況下飲既。 全部客人將成煲茶飲晒

又嚟到食大閘蟹嘅季節 , 係網上面見到呢間係元朗新開嘅任食大閘蟹 同屋企人都心意意好想試  最後就當然用行動嚟表示真係好想食 大概係5:50PM 嚟到餐廳 門口已經好多人等侯入座 餐廳環境唔算大 今次我地8個人都係兩張枱拼埋一齊 但位置就相當逼 每一次出去拎野食都會撞到隔離枱 .呢度全部野都係任食 雖然款式唔多 但係都足夠 海鮮方便 都係急凍 因為全部都係結冰的 所以我地都要拎番埋位攤一攤先可以燒 扇貝同蠔都幾好  面頭嘅蔥蒜辣椒都要自己調配 , 另外呢度都有原條大眼雞魚 但掛住食所以無影到相 配埋呢度嘅泰式辣醬 就會勁正 都似係係泰國食烤魚嘅個種味道  雞扒係要必要 (因為又係掛住食 無影到) 啲肉好嫩同埋調味好正 >< 所以都食左兩塊 至於 我地嘅主菜 - 大閘蟹都係蟹公為主 ,大概15分鐘上一次  熱辣辣 雖然啲蟹膏未去到爆曬膏咁 但係我地食左4隻之後都開始投降 因為真係太飽 同埋想試其他野食 , 所以去到最尾個幾round我地都唔再拎蟹  同埋呢度啲薑茶都好正 >< 飲完都覺得好舒服 呢度都有蟹粥但就無試到 野飲方便都係汽水 同紙包野飲   價錢

這是一間新店，是朋友介紹，見網上好評如潮，便預約試試。我們預約了6:00pm-8:00pm那節時間，準時入座。枱與枱之間有空間，不會感到逼夾，座位也舒適。拿食物位置是一間冷氣充足的房間，衛生企理，食物放在大雪櫃內，可保持食物安全和質素，很好的安排。供燒烤食物種類繁多，有大眼雞魚、蠔、扇貝、牛肉、豬肉⋯另外還有香噴噴的蟹粥，食物味道也不錯，但建議不要拿太多，因為要留待空間吃大閘蟹。我們最期待的是大閘蟹放題，店員會拿著一盆新鮮熱辣的大閘蟹，走到每一檯逐一派發，讓我們可以輕輕鬆鬆，一邊慢慢燒烤，一邊享受大閘蟹。當吃完第一隻大閘蟹，店員又派發第二輪的大閘蟹，不斷循環。我沒有刻意去數著吃了多少隻，只知道在兩小時內，沒有停過手和停過口，每人起碼吃了七、八隻大閘蟹，非常滿足。雖然是大閘蟹放題，但大閘蟹還是很有質素，隻隻爆膏，鮮甜美味。飲品方面，有啤酒、汽水、烏龍茶⋯絕對可以滿足不同人士的需要。老闆親切和善，用心經營；店員熱情有禮，還會細心提醒我們記得喝薑茶，值得一讚！清潔姨姨也是很有禮貌，我真的很喜歡這裡的服務態度和質素，十分欣賞！下次再來！

2小時任食大閘蟹，仲有海鮮同燒肉任食添😍⭐️食物⭐️主角大閘蟹大約每15分鐘出一次，我食左4隻質素都唔錯😋蟹膏都算多👍🏻仲有一個自助海鮮同燒肉區，海鮮雪得超硬，燒既時間會比較耐，質素就普通啦，勝在食物種類有好多😊⭐️環境⭐️坐位唔會太逼，見到有13人入座都可以安排到，而且環境都衞生。⭐️服務⭐️超級好😍很主動，而且每位員工態度都好親民，好窩心感覺👍🏻⚠️總結⚠️如果喜歡大閘蟹既朋友真係可以黎試下，會好滿足🤣

最近喺元朗朗屏新開張既 蝦川 ， 撞啱食蟹季節，餐廳推出 120分鐘，每位 $288@ 大閘蟹+ BBQ 放題， 沒有加一，價錢非常吸引，於是book位試下la。 原本諗住食到3-4 隻算抵晒， 點知d蟹一隻接一隻不停出， 全晚個人食咗8隻 大閘蟹，真係意想不到。 另外仲有 BBQ 放題： 海鮮(蠔、大眼雞、倉魚、帶子.......) 、肉類(雞、牛、羊、豬、腸、午餐肉......) 、菜類 (翠玉瓜) ，仲有少量熱盤( 蔬菜及雞腎) ， 最 窩心既係除咗汽水、解茶任飲外，仲有 熱辣辣嘅薑茶任飲， 昨晚老闆更親自招呼客人，服務一流。 值得推介！