越中意

Open Now

Now Closed

首先叫咗生牛肉牛腩片湯河，不過可能食品安全問題，叫外賣的話牛肉已經全熟，無咗食生牛肉剛熟鮮嫩嘅口感，有點可惜，不過牛肉唔韌，湯頭鮮甜，不過味精略重另外叫咗香茅牛肉米紙卷，賣相一般，不過份量好大，啲餡料多到瀉晒出嚟，同埋每件都不是一口嘅大小，但分開幾啖咬餡料又掉到周圍都係，有點麻煩香茅牛肉入味，係整個菜式嘅靈魂，但米紙外皮有點韌，好難一口咬開，一般越式酸辣鳳爪，雖然係無骨鳳爪，但係間中都食到比較硬嘅小骨，味道對我來講有點偏辣，蓋過咗其他嘅味道香茅豬扒撈檬正正常常，豬扒炸得香脆，只係炸得乾咗少少，整體都不錯

它們的「香茅豬扒湯金邊粉」夠大碗，湯汁好飲，豬扒另上👉厚肉，炸得剛好。扎肉粉包料多，夠鮮！週未最理想下午2点半去吃下午茶 ，若不是太大胃口：兩人份量👉（一碗豬扒湯金邊粉＋一份粉包＋一杯熱飲）👉只需$60元左右，很抵吃！它們的歺具放在旁邊的枱櫃筒，很方便食客自己拿，又實用，我喜歡的。 店員態度友善又有禮貌，值得加分噢！ 店內出名越南春卷及越南咖啡（雖自己未試，但相信好味）。美中不足是👉店內沒有厠所，要去「公厠」解決呢！總括而言，值得多去。

生牛肉湯河，下午茶送埋野飲，我覺得幾抵，北角好少去，但係我覺得個越南湯河，湯底好正宗，牛肉都幾有牛肉味道，同埋有香葉，辣椒個D 比你自己加入去。飲品方面，我要左鹹檸檬，好特意。

食到無乜新野，就想試下食啲清新啲，檬粉都算清新，就揀試呢間越南野啦，雖然距叫越中意牛肉粉專門店。但我就揀左食海南雞，狐狸仔就揀左雞翼湯檬。雞肉嫩滑，皮唔算肥，份量夠食，油飯連醬都好惹味，比起出面一段既舖頭，水準算中上。可以翻食。狐狸仔就叫雞翼湯檬，話左距雞翼份量通常都少，距堅持叫，出黎效果都唔錯。幾脆，香茅味正常，唔會過燶，湯檬夠熱，食完暖笠笠，湯底幾有味。我就覺得個雞翼好味過個檬，惹味。可惜既就系，唔包飲品要另外叫，又系一條數，包埋就PERFECT 。

今日路徑北角， 正好是下午茶時間 就是 這間 越中意， 環境乾淨企理 剛好是卡座位更覺舒適，食物水準好，湯頭味香濃，以下午茶份量算是不錯，豬扒厚切，非常有口感入味，豬頸肉也不錯👍，煎胡志明扎肉更特別👍值得一試。因為很少餐廳有這菜式點，性價比高。

有時晏晝會去食佢d河粉，係幾好味。通常會食香茅豬頸肉河粉，印象中以前食香茅豬頸肉比較乾，唔算好滑，但唔韌，味道口感都ok的，只係有少少熱氣。有一日突然想食豬頸肉，叫左個香茅豬頸肉飯，比較失望，因為有兩舊整燶左，完全黑晒，果舊肉本應就係最旁邊的位置，但個廚師放係中間反轉佢，諗住你睇唔到，我係食食下先發覺😥見到咁樣放都有d嬲==好彩我都叫做熟客，唔會因為咁樣唔再來。但如果我第一次來食，咁樣你俾人的第一印象真係會好差。但慶幸的是，其他冇事的肉出奇地滑，肥肉部份比平時多少少，幸好唔食兩舊個份量我都飽，所以寧願你將燶咗的肉掉咗佢，反正都食唔到。第二日我都係叫咗同一個餐，今次冇燶，亦冇琴日果種超滑口感。同平時食開差唔多了，中規中矩，分量足夠，食完超飽。總括來講呢間的食物係唔錯，但因為我食過好多次豬頸肉河粉或飯，所以特別開個食評講下，質素其實每日都唔同，有時會整得乾d熱氣d，有時就好少少，好少數會特別滑，中規中矩啦。因為以前附近有一間食豬頸肉次次食都特別好味但執左，呢間都會係第二考慮來的。

小弟由到大都是住北角的, 自從之前搬離北角後,對於北角的美食尤其掛念.今天見客的關係, 就再來到北角尋美食.今天來到呢間餐廳, 主打越式食物, 印象中, 同區不算太多.望望個menu, 就想試試''L11 蝦膏酸辣海鮮湯金邊粉''碗野本身不是咁滿湯的, 因為我落order 時, 叫了多湯.所以碗野特別多湯咁, 正!而個湯底因為酸辣關係, 十分惹味. 最後我都飲哂. 其餘既海鮮因為湯底關係, 好入味.包括有青口, 蝦等等的食材.蝦膏不是太多, 金邊粉索哂d 湯味, 好match!食真點其實有點辣, 愛辣之朋友一定好滿意.所以建議一定要帶定包紙巾, 同加杯凍飲,我就加杯凍檸茶解解辣, 成個lunch 加埋都只係 $57. 以北角咁小越式野食黎講,算係不錯的選擇! 

今天下午二時才吃午餐，終於㨂了越中意，兩点鐘已經開始下午茶餐。這店新裝修後一直也没到過吃，装修後店內越式氣泒，陳設顏色鲜明光猛了。我點了安南雞絲扎肉湯檬粉和熱鹹檸檬水$42。 安南是越南舊名，源自唐代於河內設立的安南都護府。等了大約十分鐘檬粉上枱。雖然過了午飯時間，食客人流一個接一個，店員可能忙透了，有點機械式運作。我的檬粉上時跟有红辣椒和一片青檬，怎知店員放下後，順手執埋對面已经走了食客的碗筷時，一併拿走剛放下给我的红辣椒和青檬。忙中有錯人人都會，反正不吃辣椒也就算了。檬粉湯底味足，切成一片絲的洋葱清爽甜美，三小塊扎肉彈牙有𡁻頭，一般外面的扎肉不會有這樣的咬口，雞絲份量雖多但有點嚡口不够腍嫩。如果有剩扎肉走雞絲就好了。有半個鹹檸檬的熱水，用匙羹壓爛檸檬時香氣溢出，飲入口鹹味適宜，給一個讚。

晏晝同啲同事嚟食午餐想試下食越南嘢，所以揀咗呢一間，唔知道佢邊一忽似係越南嘢，可能係服務態度掛？一開始都唔覺得有咩問題，直到隔離個同事啲飯到咗，佢食完曬啦，我嗰份都未到嗰陣我就知道出事了。只係普通一個炒飯佢又炒， 點解我嗰份咁耐都未到，等到頸都長埋終於到咗嗰陣，點知到佢幫我走咗辣椒! 香葉肉碎炒飯梗係辣㗎啦？你幫我走咗啲辣椒做乜嘢呀？？我呢個飯炒到又淋又多水，仲要冇辣椒？佢另外畀碟辣椒我，大佬搵辣椒送飯咩。。 我另外要辣椒做乜嘢？我要辣嘅炒飯，唔係辣椒餸飯囉。。。 啲飯炒得唔好食都算，裏面竟然有舊骨？？ 大佬你只係香葉炒飯，有乜可能裏面會有骨碎？？仲要唔係蛋殼碎，係雞骨嗰啲骨! 差d 咬爆我隻牙囉，炒得差唔緊要，要食得落先得㗎？？？？ 我唔想浪費你成個飯所以全部食曬佢，利申真係想死

北角美食真的很多，每次經過尼間越南🇻🇳餐廳都話想食但都最後揀左第間😂。今日真係入黎食午餐，星期六午市人流都算旺，亦有午市優惠。午市套餐亦都包熱飲☕️款式都幾多，價錢都係四十至五十。最後揀左好耐都係想食撈濛。揀左個《安南雞絲扎肉撈濛》$48落單不久即上，上菜很快撈濛吾算好大碟，雞絲亦偏少，但個扎肉真係超級好食平時食到既扎肉係吾會爽口的，尼到既扎肉又爽口同彈又夠豬肉香，食完一塊又一塊停吾到口朋友叫既《生牛肉湯河》$46 也大讚牛肉夠鮮另外叫左兩款小食share《炸春卷》$12 只有兩小件春卷非常香脆，材料也好足滿滿同係素菜多，雖然係炸但因為包住好多素菜變得好FRESH另外叫個《炸蝦餅》$28就有點失望，因為吾係炸同蝦餅太淋身，只有4片就要28，吾太抵食。不過配埋辣既甜酸雞醬味道是可以的。餐飲揀左熱菜蜜，吾太甜夠健康朋友叫了凍奶茶，凍飲要加$3埋單不用加一

已經幫襯過兩次，今次打算再去。 因有要事，需由上水經灣仔再去北角，喺上水無食到嘢，灣仔停一停，又無食嘢 ，忍住肚餓嚟到北角；見之前食過，ok，一心諗住再嚟幫襯； 入到去，唔滿，見到門口有張大枱，自己識做，一條友無謂霸你張大枱坐，經過張大枱後先睇到原來寫住留座(咁勁？三點幾都要留座？) 唔緊要，反正無諗住獨霸大枱，行入啲 ，收銀姐叫我坐落去一個頗迫夾嘅單人位到（心諗：唔係化？個位又窄，啲人又擺晒袋，點"涉"入去呀？ ）唔理收銀姐，離遠好似見到有一卡位（有客）而對面係冇人坐，正想行過去， 收銀姐加男人(唔肯定係咪老闆) 又講，又叫我坐落卡啦＋好逼嘅位裏面。 最憎食嘢食得咁受氣 ，掉頭走 ！一心諗住咁遠過嚟幫襯下你 。ok！慳返！

炎炎夏日 有時吾想食熱熱的湯粉麵我就會去食撈檬嫁啦~今日就同男朋友嚟咗呢家越中意 我哋叫左 >>豬扒撈檬<< 同 >>鮮茄牛腩湯粉<< 當然吾少得追加咗個 >>泰式鳳爪<< 個泰式鳳爪我覺得佢就比較酸嘅食完兩隻之後 條脷都幾諧😂中意食酸嘢的朋友應該好歡喜豬扒撈檬個豬扒其實醃同炸得幾好吾會好咸 都唔會好厚粉不過可能本身肉質問題食落都覺得有啲諧。喺其他地方食過啲撈檬完全冇味呢度又吾會喎 加少少酸汁已經好好味 😋鮮茄牛腩湯粉都幾夠蕃茄味 牛腩都吾會太硬 >>咸檸檬水<< 覺得甜左啲 >>熱菜蜜<< 相反岩我口味啲 😁重點::::兩個人都只系食左 105$ !!!其實真系幾掋食 質素又吾差 😋變左我的Canteen了 🤭🤭🤭

門面細少不起眼，不過內部算是精美，簡潔的越南裝飾！叫了咖哩牛肉飯，店員放下了飯，自見飯菜的外表，已經有喜悅的感覺；咖哩的香味、顏色，咖哩汁的稀稠、腩筋的細緻，都是令我喜悅的因素。我沒有將咖哩汁灑在飯上，以免流在碟上浪費了；我只一羮飯放到咖哩汁中再放入口中！肉質果然鬆軟，有連淋淋的筋一起，是一流的牛腩。另外的香茅雞翼湯河，雞翼是新鮮炸起，咬下嫩滑，多汁流出。

呢排天氣凍凍地，想食番d湯粉類暖下胃，諗起有間食越南野都無去過，就去試下佢。座位唔算多，但午飯時間也不用等位，可能餐廳位置唔算好旺。坐底看menu都好多選擇，有湯河粉類，飯類等等。叫了生牛肉湯河，都好大碗，好多河粉及牛肉。牛肉半生熟，浸落熱湯可令牛肉剛剛熟，但無乜牛肉味，都算淋，普通啦。河粉都好滑，而且好大碗，一定夠食。湯底偏淡味，要加少許辣椒，青檸汁及魚露調下味。整體來說味道雖普通，但價錢合理，抵食之選。

聽個名幾得意，就心思思入去試下！兩個人叫左個火車頭湯河、沙律同小食。一黎個火車頭真係嚇一嚇，勁大碗！都幾足料，個湯又好甜好好飲。仲要勁多河粉，食左成4、5碗都未食哂，呢個價錢都真係幾抵食！豬肉濱海第一次食，用米粉包住啲豬肉，食得有啲唔方便，好易跌哂啲料出黎！飲唔叫左椰子沙冰，唔會太甜，都幾香椰子味！