連豐燒味餐室

Open Now

Now Closed

開咁耐幫襯咗咁耐，定期都會幫襯，因為係公司安排，所以冇得揀，瘦肉叉燒紅皮白肉有嚼勁，食開香滑淋叉燒嘅朋友一定唔啱，燒肉肥瘦分明，一啖肥膏一啖瘦肉，無論叉燒同燒肉都係柴皮，鞋烚烚，而唔係嗰種肥瘦纖維縱橫交錯，睇落瘦，食落淋，入口熔嘅感覺，不過相信喜歡有嚼勁，似嚼香口膠嘅朋友會好鍾意食。

落雨濕濕入來避下順便吃個下午茶，點知阿姐唔俾下午茶menu。本來都以為無就算啦，點知吃到一半見到隔離檯竟然有$35下午茶但係我地叫晒常餐，即時心情低落。佢有每日特價餐，$45燒雞餐送熱飲或例湯。例湯是青紅白蘿蔔粟米湯，飲落夠大碗湯料都足，呢個抵食。燒鵝俾飯要$120仲無嘢飲。但燒鵝瀨就$55！不過燒鵝骨同肥膏多，無咩肉食，而且最唔掂是個湯粉唔係真正唧瀨粉囉，呢個非常唔開心。佢地櫥窗有外賣，油雞俾$15一隻就抵食好多。

完全全全唔掂一次喺朝早嗌啲飯完全唔熟叫叉燒飯,比肥叉結果畀咗啲拍散嘅叉燒(幾次都係)不特止仲要畀琴日用淨嘅叉燒嗰啲粉味經過幾次加熱之後特別苦澀,同埋有種特別嘅臭味同佢哋講完全冇跟進佢仲要喺呢個位置,有陣時見啲油雞髀放喺室溫又唔冚住佢放喺馬路旁邊,我想然知食曬塵禮貌又非常之差,叫咩同你講完全唔理,又話冇又斬少少,所以先咁平,尤其頭巾嗰個有一次嗌外賣連啲餸都唔見曬,啲飯又超冧燒肉個皮又唔脆又霖仲有超咸,質素維持唔到

連豐燒味｜抵食選擇銅鑼灣食嘢乜都貴，午餐動輒60至70元，真係小數怕長計。間唔中使大咗，想食平少少，都有平靚正嘅選擇。鵝頸橋附近，有間燒味檔，單一或者雙拼，都係$33。叉燒、油雞、切雞、燒肉或燒鴨，可以任揀。唔想食飯仲有瀨粉揀，平平地算唔錯。想要中湯或者飲品就要另加錢，另外15元有隻豉油脾，嗰日想lunch 食平啲，都有選擇嘅。

由$30加到$33，足足10%，但無損附近打工仔對佢嘅熱愛。試諗下，個個都話三上演技差，成日交行貨，作品一套比一套hea，但最後咪又係睇。原因好簡單，基本質素屬上品，樣同身材都高質。年豐就係咁，大件兼抵食，CP值高，呢口價有呢個質素，抵食。不過，年豐質素有時都算飄忽，肥叉時而肥到滴油，時而柴到似食橡膠；油雞、切雞、燒鴨時而啖啖肉，時而骨巉巉我層皮。唔似輕輕鬆鬆鄧梓峰金句，收到收唔到，真係靠彩數。呢日呢盒燒鴨肥叉飯，當我運滯。🤦🏾‍♂️

買過超人燒鵝嘅豉油雞兩三次，質素唔錯，今次打算再買半隻，點知售罄!局過隔離哩間連豐，買半隻比起人燒鵝貴4蚊嘅豉油雞.嘩! 今日咩事?平日水靜鵝飛，今日門口一大埋人等外賣!再望望個 Benner, 外賣30蚊雙併! 相信平絕灣仔銅鑼灣啦! 可以因為外賣抵，堂食變得冷清!打開個外賣盒，油雞被塞到滿一滿，當然係用上細外賣盒有關，見到D雞骨重有少少血，經驗話我知，雞肉都比較嫩滑無渣.可惜今次估錯，雖然未至於差，口感仍算嫩滑，但比起超人燒鵝差一級唔夠佢嫩滑無渣.雞肉份量足唔係D矛肉嘅雞.最后緊係要講吓我嘅大愛蔥蓉啦，蔥蓉口感香脆但重味咗少少，減D咸味更夾自己口味.

係銅鑼灣返工食晏都好貴，茶記至少都要$60-70，難得係鵝頸橋底搵到間超平燒味飯，單併雙併同價，一律$30！叫左個油雞燒肉飯，可以揀食胸唔洗加錢，大方過嗰啲棋乜燒鵝、大乜燒鵝，話食胸要收多人$10，明明胸就一向無人揀。油雞胸啖啖肉，有少少雞味，而且肉質唔算太韌，肉色澤白淨，甚為不錯。燒肉外皮香脆，可惜欠缺咸香味，肉嘅色澤偏淡粉紅，不是平時嘅啡白色，可能係雪藏得比較耐嘅豬肉，肉質比較韌，同埋有渣。畢竟$30有雙併都不能要求太多，我會繼續幫襯。

今天在公司因為下大雨所以幾個同事一起叫了foodpanda，我叫了燒鵝米粉，一打開片發現全都是肥膏，只有一舊是肉，之前在店叫過燒肉飯給切雞飯都很正常。但今次叫燒鵝米粉實在太多肥膏了，而且吃到一半中途還有一隻蚊子在湯裏面，實在太過分了😡

銅鑼灣呢個商業中心雖然冇中環咁高貴，但由於租金唔便宜，大部份開喺大商場同附近嘅餐廳價位都唔低。不過行過少少就會發現其實都有好多經濟實惠嘅選擇。響時代廣場旁邊，穿過鵝頸橋另一邊就已經係灣仔，位於街市旁邊有間其貌不揚嘅燒味店。附近有好幾間比較有名嘅燒味店，一個雙拼飯，點要$50-$60，而呢度嘅雙拼飯，平過佢哋好多，等我試吓先。我叫咗個叉油雞少飯，裝飯嘅叔叔好可愛，再三問我係唔係真係夠食（可能我個樣真係好大食）。而且可能因為我叫咗少飯，所以佢比多左幾條菜我。一食舊叉燒就好失望，又乾又柴，反而豉油雞就相當唔錯，夠香口而且雞肉都叫做幾滑。朋友去過都話佢嘅叉燒好難食不過雞同我就幾好，去嘅朋友強烈建議唔好食佢嘅叉燒。呢個價格嘅但我唔會有投訴，但就要小心避咗啲伏位啦。

收銀啊姐態度超級差，完全唔會再幫襯。問一句 是否$45 一句得埋黎 家陣你3餸啊 咁wo態度好似殺左佢全家咁😡😡燒味又唔係特別好食！🤮🤮🤮🤮$55 3拼飯？銅鑼灣大把選擇啦

最近的環境，真是冇乜心情。尋晚晃晃的發現這間新開的燒臘店。仲有大片乳豬看著好誘人。不覺意肚有點餓，便進屋尋位坐。這間店係一家三口經營，父親切燒味擺盤，母親做打雜兼水吧，兒子負責收錢。但態度也都非常好。熱情招呼落坐並詢問想食d乜，想來好久沒食乳豬，即叫左一碟乳豬油雞飯，同埋一杯凍奶茶。乳豬皮脆肉香不負期望。油雞皮甜肉嫩香氣怡人。期間不少人路過買盒飯打包take away，看來也是走街坊食店的路線。好正