長旺燒鵝燒味飯店

Open Now

Now Closed

我很愛吃車仔麵，因為很有香港風味，很喜歡那種＂０拿渣＂既感覺。但今天吃了個很不好吃的車仔麵。其實碗麵既辣汁還可以，不過車仔麵既靈魂　＂車仔餸＂就唔係幾得：蘿蔔 - 最敗筆！ 太大舊, 很硬, 要很大力才能把筷子插入。　　　蘿蔔都唔炆淋先賣, 完全沒有誠意。豬紅 - 太鹹冬菇 - 冇咩味瑞士雞翼 - 算是比較好吃的不過就幾平，　４餸包野飲都係２５蚊，　服務態度都幾好！

曾幾何時,食過呢度既黑椒牛丸,的確好味,爽口又有黑椒味,點知尋日食番,水準可以話係差左共地…好失望…牛丸好淋,肉質好似梅梅爛爛咁,入口都唔覺自己食緊牛丸,黑椒味呢?已經無晒囉…連肉味都無埋呀,唔話我知,我都唔知自己食緊牛丸,我懷疑佢係存貨太多流量少,d肉梅梅地,唔食得架喇!更唔得既係,咬開牛丸一半,竟然有好多油份走左出黎,真係見到架,因為d油走晒去個湯度,清楚可見!另點左一樣以前未試過既泰式扎肉,又係唔得,佢係一片片半圓形薄切淺肉色扎肉,可惜其中有一兩片,食落有少少酸酸地既味,唔知係咪又係等得太耐呢?

有時有空也總愛光顧這裡的車仔麵,份量夠選擇多,味道也不錯,最重要地點方便嘛!只是上星期7:30pm前來晚餐就出事了!我每次也必點冬菇的嘛,很厚身入味,沒有它是不成事的,可惜他們說沒有了...我立即露出一臉苦瓜相...算吧,誰知他過一會又跟我說,沒有瀨粉呢!因為我每次也點米粉及上海麵,而烏冬不夠"彈牙",所以才想說試試新口味的,這趟又沒有瀨粉,可惡也!最後還是叫了上海麵,但這次有點過"淋"了,師傅,攪什麼嘛?!不過,最後也算有意外發現,因為叫了從沒吃過的沙爹牛肉,很好吃呢!而且牛肉及沙爹汁很多,是要補償我嗎?? 哈哈!不管了,好吃就是嘛!其他很多配料我也吃過,不過魚皮餃及菜肉餃就不推介了,不好吃呢...但我仍是喜歡這裡,會再來的!希望下次不會再這樣吧!

黎長旺通常食車仔麵,但係有時都會轉下花款,食下燒味,不過呢,好似仍大有改善空間喎!叫左個燒肉飯,一食已經覺得好鹹,以為係汁作怪,落得太多汁啦,於是撇走汁繼續食,點知都係咁鹹,後來終於發展致鹹元兇係燒肉!食頭一兩件都仲ok,但係食食下,真係鹹到入唔到口呀!晒!希望改善一下,味道唔好咁鹹啦!另外,除左車仔麵部個阿姐好人之外,原來燒味部個阿叔都好好人,仲好好傾添!

今次係我第一次寫食評...我去咗旺角熟食中心既長旺食車仔面...呢到係我近呢幾個月既飯堂..我之前都食過幾次,今日想食車仔面,所以再來一次喇!!今次我都係食3餸一面&飲品個set...明明係$22蚊一碗,但俾錢時佢話今日只係$20蚊,真係好喇,可以平2蚊!講返碗車仔面先啦,今次我揀烏冬,魚皮餃,白菜仔同埋芝士腸,烏冬就唔係咁好食,都唔滑,至於D餸都OK既...最正係個湯底,我揀咗招牌辣汁,唔識死既我揀咗2級,開頭食都無咩事咖,點之知食食下就出事喇,好辣呀...我要慢慢食先可以食到呀...因為我平時食野都幾快既!!不過都幾正呀...下次都會揀2級辣汁!仲有叫咗杯凍檸蜜,(呢到凍飲唔使加錢咖),都OK甜,唔淡....呢餐我都幾湖滿意,不過下次我要轉過個面先得!!

我個friend超love呢個food court. 每次旺角見面成日話要黎... 翠園唔係我杯茶, 昨日試了長旺車仔麵. 又唔錯喎! 平之餘, 賣相相當不俗; 選擇多而味道都有水準. tick下紙仔...我要左瀨粉底+5樣送+凍檸蜜都係$32咋!!仲免費墊相當份量的菜,我好buy呀!食菜有益嘛^_^ 佢有個招牌辣汁, 香濃夠辣(辣度分3級),我要左最輕1級辣, 都已經幾刺激了. 奉勸各位如果不大食得辣又想試下個汁, 最好分開個汁上啦. 如果真係要彈的話, 我就不大喜歡大粒魚旦...不過, 這只是一點點美中不足而已, 掂就一個字, 一定有下數次幫襯!

自從前排奇奇怪怪搞到湯底好油,材料好亂之後,近期已經大大改善,無再出現叫左配料ABC,會無啦啦見到配料DE出現既情況,湯底亦都係清湯就清湯,牛腩湯就牛腩湯,唔會清湯出現腩汁,既然肯改善,值得嘉獎,亦可繼續幫襯。再者,呢度其實十分抵食,一個車仔麵餐可揀三款配料,連飲品都只係$22,冷飲又唔使加錢,而且由於幫襯得多,同果度既人熟左,佢地又好好人,等食物時會同你傾下計,有時仲俾多款菜添!例如我尋日點左其中一樣係生菜,佢就除左生菜之外,仲俾菜仔我。另外,我覺得比起以前,佢碗野份量多左,以前咁滿,而家的材料滿晒!不過呢,尋晚去食時,我有少少微言,因為發現有一個奇怪現象(以前唔覺係咁)…話說燒味部同俾錢落單係同一度,尋晚想點車仔麵時,大排長龍,排左好耐,唔知咩事,後來發現,原來係前面的人叫燒味飯之類,個阿叔竟然落左單,收左錢,即刻做個燒味飯,然後先做下個客,唔係下話!好低效率囉!明明好似以前唔係咁,係一個人落單,一個人做飯,佢係咪唔夠人呢?又好似唔係喎!反而車仔麵,佢又真係用番落單,收錢,取飛,等野食,呢種做法,你話係咪奇怪又費時失事呢?唉!

雖然好似寫左好多呢間食肆既食評,但係有時又真係會遇到比較特別既遭遇,想俾下意見…好似尋晚咁,上次話過佢車仔麵既問題,已經改善左,係值得一讚!不過估唔到既係,有另一問題,今次係送既質素。點左花枝丸,一碗有三粒,食第一粒…咦?宿既?試下第二粒…噢?都係宿!於是立即走去換!好在個店員都好nice,講晒唔好意思,又即刻換,仲話最緊要你覺得好食,最緊要個客滿意,唔係送俾你都無用…之類之類,態度係親切既,咁就令我本來少少氣都無左,所以其實服務態度都幾重要,呢度係做到既!不過咁,幫襯左咁耐,食到宿既食物都只係第一次,希望亦係最後一次,以後唔會發生啦!請努力一點做好一點!

之前講過俾多次機會呢間野,呢次去到,個老細終於番番黎,個湯底亦都唔再咁多油,有改善,可以啦,點知發生了另一件麻煩事,令我有少少失去信心…要左個車仔麵,係配清湯底既,但係一去,已經發現俾左沙嗲汁,個老細一對番張落單紙,的確搞錯,於是即刻退番廚房整過。整完之後,睇落無問題,但係我左番埋位,見到個湯仲有少少紅椒碎,個湯有少量黃油,不過諗住都ok啦,送同麵吸左少少沙嗲汁,無辦法,應該唔怕卦?點知一食,嘩!真係幾沙嗲下喎!我唔食得辣,所以真係入唔到口,於是又要換,激死!今次我唔知佢點整喇,總之最後我係番一碗唔辣個囉!淨係咁樣換黎換去,我都搞左好耐至有餐安樂茶飯食,呢方面真係唔係幾掂!但係佢好既咪係服務態度囉!次次都肯換,而且個老細係禮貌既,唉,我都唔知佢算係好定唔好喇…

我一直係呢度既長期食客,次次都幫襯車仔麵,貪佢又平又好食!但係,自從農曆新年之後一切都變晒喇!好唔開心!我講既唔係話佢加價,雖然佢加左兩蚊,以往三送一麵連飲品由$20加到$22,但係我都覺得ok,都仍然抵食,所以照幫襯。上次去食,叫左清湯加一的清清地既送,點知湯裡面好多油,好多肥膏,仲夾雜左豬肉絲/碎同牛肉絲。我以為淦係咁岩果日個廚放假,係偶然情況,所以算數,跟住焄幫襯。點知,再去食既時候,發現上欸事件並偶然!因為我又係點好清既送加清湯,唔想食到咁滯,點知今次仲要係我碗粉發現牛腩同豬肉絲,又係勁多油,以前都唔係咁架,點解而家差晒???或者,我會俾多次機會佢,當個廚放假放埋正月十五,如果之後再去都係咁,我會好失望,亦唔會再做佢既長期食客了!話時話,個幾好人既老闆呢排都好似消失左添喎!

又黎呢度食車仔麵,令次竟有兩大發現...發現一者,係本$18既三送一麵連飲品餐加左價,而家要$20,不過比起其他地方,都叫划算,所以都係食得過。發現二者,唔知係我以前無留意定點,食左咁多次,而家至見到有樣送係鮑片,好奇心驅使之下就點左,有三片,唔算大片,不過預左,估唔到落又真係鮑片喎,無論質感同味道都應該無花假,當然唔會係貴價果的,或者罐頭或急凍之類卦!雖然係咁,但係食車仔麵有鮑片做送,感覺又幾得意!另外,叫左米粉俾左米線,叫佢轉佢都即時ok無留難,呢點值得嘉許。(雖然呢種服務態度係好應該,但真係唔係咁多食店做到。)

我同小牛愈來愈鍾意黎旺角熟食中心食野,貪佢既方便又平宜,而且仲有好多選擇。普普通通去長旺食個車仔粉,都有少少喜,19蚊可選三送一粉,連飲品,揀左黑椒牛丸做其中一樣送,估唔到又幾好味喎,比一般牛丸好好多,因為多左黑椒既惹味,但係又唔會令人覺得辣(我係好怕辣既人),同埋size都幾大粒,比一般牛丸大少少,可惜有少少筋,同埋只係得兩粒,不過味道真係唔錯,大家去開又食開呢個餐,可考慮黑椒牛丸!順帶一提,另點生菜做其中一送,做唔到佢俾好多菜,比起出面店舖多些,所以我覺得抵食!

這間店的車仔麵我已吃過好幾次，其中沖繩滷肉比較特別(對愛食肥豬肉的人來說是不錯的選擇)，蘿蔔是我的最愛(蘿蔔煮得很不錯)，加上咖哩汁來吃份外滋味也可選擇金牌醬汁(本人較愛吃咖哩汁)，其他餸料中吃過魚蛋、豬腸，豆卜，擔仔肉等味道還不錯的，宜他的奶茶幾香滑，在他店前等待的時候已聞到陣陣茶香，三餸麵加冷熱飲品賣18元都幾抵食。

朋友仔叫左呢度既雞鴨飯份量不少好肚餓既朋友仔都食唔晒d飯鴨皮幾薄又唔多肥膏雞鴨肉味道都只屬一般今日例湯係粉葛湯煲得好淋渣份量又多味道清清地唔油只係加2蚊值得飲

一碗燒鵝飯$16，好抵食，燒鵝皮脆口又惹味，加上與同鏞記差不多的酸梅醬，正！記住要食一碗，因為一碟的很快就涼了。