八方雲集鍋貼水餃專門店

Open Now

Now Closed

通常晏晝時間 屋企人都會幫我買個下午茶餐 俾我食 但係啲員工經常都唔將下午茶餐個牌攞出嚟 要問要叫 先攞返個牌出嚟 雖然依間嘢喺黃大仙開咗好耐 可能幫襯嘅人唔多 但係使唔使咁樣

泡菜餃紅油餃八方雲集既餃都幾ok平民價 足料 多口味最重要係好多地方都有得食平時食都會叫佢地既套餐又有麵又有餃又有野飲係食lunch既最佳之選XD雖然好普通 但諗唔到食咩就會揀食佢！

最近成日都好想食餃，專登行上竹園食八方雲集。店員姐姐服務態度熱情，本來想落左order先入，姐姐問左係堂食，即刻安排座位，話入座落單都唔遲。餐牌有套餐，可以加配其他食物，又可以散叫。叫左兩個麵線套餐($39@one) 套餐有一碗台灣麵線，因為有豬腸等內臟，碗麵有點腥味，初初食都會有點唔習慣，但食落又成碗都食哂。套餐另配5隻 水餃/鍋貼，水餃要招牌水餃，係白菜豬肉餃，size剛剛好，有吸湯底味，好味。鍋貼係韮菜鍋貼，韮菜味道勁突出，又唔會好過份油膩，煎到非常金香。

除咗普通麥當勞肯德基嗰啲快餐店之外，其實一個人都可以有好多選擇。佢地嘅招牌鍋貼係我每一次都會叫嘅嘢食。食過咖喱泡菜嗰啲口味都係覺得最原本嘅招牌味最好食。加埋超多嘅辣醬仲和味！

紅油炒手係用辣椒油浸住d雲吞，好多地方都有得食，但唔係食得好辣嘅我，就成日唔敢點黎試。點知俾我發現左八方雲集嘅抄手除左可以揀辣嘅紅油口味之外，仲可以揀唔辣嘅和風味喎，咁就緊係試下喇！和風抄手嘅雲吞係菜肉雲吞，一客有5粒，都幾大粒下，而且佢嘅雲吞皮無水餃皮咁厚，口感唔錯。另外和風醬汁係酸酸甜甜咁，好醒胃，仲配左d芽菜，芽菜就咁點和風汁都好好味。鍋貼同餃子，我就覺得八方雲集嘅鍋貼係吸引d，因為皮薄餡靚，而且宜家仲多左粟米同芹菜味，本身想試芹菜味，但賣哂，所以今次試住粟米味先喇。如果你係中意食粟米嘅朋友，應該都會覺得呢款粟米鍋貼好味，佢係甜粟米，鍋貼甜得黎又有咬口。估唔到八方雲集都不斷有新口味呀，驚喜

每次去八方雲集我都會食呢一款韓式泡菜鍋貼，而男朋友總係會食韭菜鍋貼配上酸辣湯。酸辣湯因為本人唔係咁鍾意，所以通常我都唔會要，不過男朋友好鍾意飲呢度嘅酸辣湯，每次必叫。每人叫咗10隻鍋貼，份量好足夠一個人食用，如果覺得唔夠可以再配上麵線等等。不過對於我來講食10隻鍋貼已經好夠。韓式泡菜鍋貼味道比較濃，雖然顏色橙橙紅紅，但其實唔係好酸好辣，泡菜味道配上豬肉餡食落都幾香口。最後當然唔少得飲番杯珍珠奶茶啦！咁就飽晒啦

呢兩日病病地，無乜胃口，尋日起身求其落街食野，八方雲集就響正我樓下商場，無理由捨近取遠架😎一個唔舒服既我，點左份麻醬麵套餐，配田園水餃，不過店員落錯單，我又無Check單，佢比左田園鍋貼比我，我都無所謂既，唔整都整左🤗呢間店細細間，環境細，所以座位都較細，不過幸好食客多數都係街坊街里，平時見慣見熟，就算我起身未化妝執返眼耳口鼻都夠膽去幫襯既食店🤣

好多時1個人食飯就會來八方雲集，喜歡佢嘅餃子款式夠多，要蒸有蒸，要煎有煎，仲要係味道都有幾款揀。個人喜愛係韓式鍋貼，再加埋荳板醬同埋黑醋真係可以1口氣可以食哂10隻😅😅，其次就係咖哩鍋貼同埋招牌鍋貼...佢哋嘅酸梅湯都好足料又夠味，諗起都仲想去食，簡直就係回味無窮😋😋同埋最重要嘅係價錢實惠，啱哂我哩個窮等小職員🤗🤗

八方雲集相信好多人都食過，呢間都算係最滿意嘅一間，食物同服務都唔馬虎，環境企理，咁嘅價錢一定好過去茶餐廳叫個碟頭飯我同朋友叫咗個台灣麵線，韭菜鍋貼就兩份食，麵線內有豬大腸同貢丸，料好足，味道都好夠；而個鍋貼送嚟嘅時候熱辣辣，外皮煎到脆脆的，顏色金黃，睇見都先加分食落亦都冇令我哋失落，韭菜好香皮好落我仲叫咗杯豆漿珍珠，珍珠奶茶試得多，配豆漿都係第一次，又幾夾喎

慈雲山個間已經不敢恭維，環境太污糟。不過宜家黃大仙開呢間就相對起身好好多啦。值得一讚櫃桶好乾淨，檯面無油黏黏，服務態度唔錯。重點係d鍋貼水餃無穿無爛，而且鍋貼個底真系脆脆地架~((唔知點解我去慈雲山個間d鍋貼可以唔脆 水餃可以穿左...so sad 無心踩佢地....仲有d豆漿好好飲 最起碼有豆漿味lol...

七點要去竹園運動場上堂，去到竹園先六點，諗住食少少野。見呢間餐廳係連鎖，質數應該安全。非繁忙時間得３－４個客，諗住食個快飯，但點知都出事。。。叫了一個１０號餐：台灣麵線＋鍋貼＋豆漿，加了$2.5要了咖哩鍋貼6:10入到去, 6:20先幫我落單, 6:45先黎齊食物...因為店面的一個員工要負責哂外賣同堂食...本身６：２５已經黎左麵線同鍋貼。台灣麵線：香港少有正中的台灣麵線，呢間餐廳的麵線約有７成的台灣風味，在不能去台灣旅行的日子，呢個麵線都可以止下埔台灣癮辣味鍋貼：一切錯誤的開始，我叫的係咖哩鍋貼，咬左一下之後發現係辣味鍋貼（鍋貼個樣個個都一樣嫁啦，你叫ｄ客睇樣點分＝　＝？）但辣味鍋貼對我黎講太辣，所以叫個店員換返咖哩鍋貼。。。結果等到6:45，咖哩鍋貼先黎。。。。咖哩鍋貼咪咖哩味囉。。。食太急，食之無味。