品香樓中西風味餐廳

Open Now

Now Closed

品香樓，未去過，但個朋友話唔錯，亂點都入得口，我又抱住，亂入食下的心態，去試下。係石硤尾站出，行咗10分鐘，就到南山村，個屋村，好有香港舊式屋村的風情，港味好濃，好鐘意。間店係在南山村街市，重要係2樓，開頭唔識路，係禁係地下揾。7點左右到，都幾多人排隊，但門口個大姐講，搭枱即刻有位，禁我當然，即刻話ok.霸皇雞半隻($130)--- 好盞下，第一次食到有蒸魚感覺的蒸雞，幾特別，味道ok, 可以接受。椒鹽豆腐($82)--- 豆腐味唔出，冇豆味，內面唔滑，普通嘢，唔值82，42都比多。

品香樓一向都係好多大學生嘅飯堂，自從喺又一城巿大學畢業之後，好耐都冇再食過品香樓。今日翻返嚟呢度，又有一種重拾校園生活嘅感覺，可惜是日如梭，我已經唔再年輕（流淚）。以前去到品香樓，我幾乎每一次都會食蜜桃沙拉骨，雖然明知道佢係好難去骨，但係佢個醬汁真係好好食，再加埋蜜桃嘅香甜味道，令到成個沙拉骨都真係好吸引，用嚟送飯就正。今次同朋友一齊你，幾個人可以叫多啲嘢食試吓。我叫左炸豬大腸，完無羶味，十分香口，外面脆卜卜，裡面軟林林，正！之後仲要再風沙雞，蒜片嘅味道好重，而雞肉十分之嫩滑多汁，又唔會太油膩，比起炸子雞仲多咗一種蒜嘅香味，可以encore!

中午送貨經過南山邨，有D肚餓，問吓D街訪有乜好介紹，有人介紹樓上品香樓，即管試試，一到現場環境不錯，睇完餐牌，午餐椒盬豬扒飯$40，，，底即刻試試，豬扒好淋，味道不錯

今晚有外國親戚返嚟香港，就即刻帶佢去品香樓食嘢。一直都覺得品香樓好有大排檔嘅特色，而且夠晒火候，夠晒風味。我已經食過品香樓無數次，但係今晚就覺得品香樓嘅水準開始下降。蒜蓉蒸蝦糯米飯，推薦指數：2.5/5第一次食呢個飯，糯米飯好軟綿，而且落咗好多蒜蓉，味道幾香，但係啲蝦就冇咩味，同埋師傅放得太多油，好漏。蜜桃沙拉骨，推薦指數：3/5已經食過幾次，但係今次就覺得啲沙拉骨好多肥膏，好邪惡，不過都算好味，尤其啲沙拉骨炸得鬆脆。蒜蓉蒸勝瓜，推薦指數：2/5呢度餸煮得太hea，廚房只係將勝瓜加啲蒜蓉去蒸，味道好一般火焰牛柳粒，推薦指數：4/5已經食過好多次，都仲係咁好食，牛柳粒夠嫩，配埋甜蜜醬汁，好好味臘味芋泥煲，推薦指數：2/5廚房落得太多椰汁，所以好水。芋頭鬆化，好味，不過基於太水嘅原因，整體味道就變差

本來，我無唸過係呢d地方食到好嘢，重要係街市上面，心唸，老公乜料食嘢食到去街市，山長水遠楂車入去食街市d嘢，原來要去呢度食，本住一死以謝天下，點知又幾好食播，炸大腸，超趣同爽！食埋個出哂名既南乳豬手，南乳味濃，豬手又趣！好少食炸嘢既我，真係食左好多好多，加埋個通菜，無得輸，可惜無得飲凍朱，但飲呢2 杯都好好味！唯一可惜d人好唔自律，當係街食係自己屋企咁，食到拍枱拍椅，又咆哮又超大聲講嘢，座位又逼！搞到零氣氛！！

行過南山邨, 記得呢間品香樓係幾出名,有幾個朋友都推介過, 讀CITY GEI人應該都識佢一試果然名不虛傳由於人少少, 我地只係叫左一個黑椒火焰牛柳, 一個咕嚕肉同一支藍妹,個咕嚕肉比一般餐廳做得好, 唔會成舊粉, 咬落啖啖肉個黑椒火焰牛柳係重點推介,  佢個汁應該加左D蜜糖, 黑椒味得黎又有D甜甜地咁幾夾牛柳腍身唔會"UN", 以前出街食牛柳最驚食到D成粒又"UN"又痴牙,呢度GEI牛柳完全無呢個問題不次多D人可以再黎試下佢其他小菜

今日約咗女朋友同埋啲同事食呢個生日飯咁同事就話想食呢個石硤尾品香樓喎佢話覺得好食嘅咁我地就揀咗去石硤尾品香樓食啦入面都幾多位 幾大下只係衛生麻麻地價錢方面同一般大排檔酒樓就差唔多啦佢都幾多嘢可以食仲有個熱賣排行榜添我地都是但點咗幾樣食椒鹽九肚魚唔記得咗賣相唔錯 點啲椒鹽入味惹味但係佢有骨嘅南乳炸豬手豬手得幾件 冇乜肉 得啲皮南乳都一般 味道調味麻麻金銀蛋唔太掂 味道唔係淡 係直頭唔好味風沙雞幾香口 脆皮 同炸子雞一樣算唔錯嘅明太子炒飯一般般 唔覺有啲咩特別凍朱古力上面忌廉幾得意朱古力味唔算好濃甜度適中牛仔骨得幾塊 份額ok 但個汁幾好味 都唔錯總體麻麻地菜色唔算特出 但價錢唔算抵份量比較少性價比低雖然係鋪頭入面但可能位於街市上方地方比較污糟

坐圓枱真的迫到咩咁囉！背脊貼背脊、仲要有侍應從中間經過送餐，仲差過大排檔。食物質素係唔差既，不過環境就唔得囉～　我明白鋪租貴，但係環境唔得其實都係趕客囉，以為真係有咁多間澳牛咩？！繁忙時間真係不宜幫襯，寧願行遠ｄ去食貴野，都唔想貼錢買難受！

今日下午要去石硤尾上training....早上開會又遲左...的士去到已經點幾，唔駛等位就有得坐喇....平時嘅我會食雞翼或沙拉骨菜飯...今日打算試新野，食星期一快餐，叫左蝦膏櫻花蝦炒飯，熱檸茶...好快就到喇！等嘅期間，倒瀉水...都未叫，就聽到個疑似話事人，立即同佢啲伙記講「聽到聲就要去做」...伙記立即衝過黎幫手抹，仲好細心話整濕我地就唔好，我地仲要番工。個飯好大，料好足，有脆脆嘅蝦皮、蝦仁、同有少少魚肉....好味啊！

Farewell 同事食局，收工山長水遠塊南山村食晚飯，自然畢業之後都冇黎過，今年可以重拾到當年味道，好懷念。同事一早book位，預訂埋招牌菜：手撕雞我第一次食，原來係凍食，肉身好滑，而且撕得幼條，配招沙薑汁食更開胃🤤大家食剩雞骨。蝦多士，多士好脆好香口，蝦又大大隻，加上滿滿芝麻塊炸，又香又滑口，唔泡點醬都好好味，咬落口又唔會標多餘油，正！火焰牛柳粒，呢款又係長青招牌菜，有火燃燒牛柳，但牛柳粒分量略為少，汁太多，唔及當年火喉。（冇相😭）南乳炸雞翼，皮脆、肉香，送酒一流👍🏻特登叫碟清炒菜心平均一下咁多油膩食物😬

琴日諗住一家人去食飯，叫咗幾個菜，菜又小又貴，味道又唔好，得個油字，一定唔會再幫襯，自從出左名後，越來越難食，質素差了很多，不值呢個價錢，份量又小，食過一次唔會再食

品香樓位於石硤尾南山邨，平時去完九龍塘睇戲或者去完城市大學都會喺嗰度食嘢。到訪當日，我地點嘅係椒鹽豆腐、中式炒牛柳同西檸雞。雖然食物要等好耐先至上到嚟，但係係食物嘅質素都不俗。尤其是係椒鹽豆腐，外層炸得非常脆，而且配有七味粉，豆腐很軟滑。中式炒牛柳上菜的時候下面會有真的火在燒，令食物可以保持熱度。牛柳配上側邊嘅紅椒、黃椒、青椒同洋蔥，食起嚟非常惹味。西檸雞炸得，非常之好吃，配上外面酸酸的檸檬汁，又甜又酸，非常開胃。

有下次! 下次會試炸猪手伙記都有禮貌 按鐘仔就有人黎落單 但如果想加茶 就有排等喇 哈哈 實在太旺 見其他食客嘅炸豆腐 ， 炒飯同凍朱古力都好吸引 但提提大家泊車要小心 為左呢一餐 我地要俾多320呢～ 哈哈哈

不愧為城大食堂，真係好好食！叫左呢度出名既風沙雞同南乳炸豬手，另外仲叫左西炒飯同節瓜粉絲煲，一共4碟3個人食，份量十足，超滿足！味道方面4道菜都一流，夠鑊氣，風沙雞皮脆肉滑、面頭既炸蒜都好惹味。南乳炸豬手炸到脆卜卜，同埋切細塊上，易入口方便食，絕對係誠意之作。節瓜粉絲煲啲調味做得好，粉絲都煮得啱啱好，唔會太淋，又滑又爽口。西炒飯比起前三碟，顯得普通左啲，普通蕃茄醬炒飯加埋啲麻麻地既雪藏蝦，可以唔洗叫。最有驚喜既係個凍朱古力，加埋面頭一堆cream,真係好邪惡，但真係好好飲！咁濃既朱古力唔係間間茶記都做到總括黎講，係超滿意既一餐，性價比都ok!題外話，待應好幽默，雖然坐得有啲迫，但我最中意呢度既係啲卡位私隱度滿分！

食過幾次品香樓既午市印象都唔錯，今次係又一城睇完戲就一心行過去食個平價下午茶~又一城行過去都唔算好遠，大約十分鐘路程，途中南山邨馬路旁枝繁葉茂，有如走過林蔭大道，令我對呢個覓食之旅更期待。下晝3點幾，可以直入坐卡位。夾心西多士 ($31)可能睇得多其他名店既夾心西多士橫切面圖，對餡料一湧而出既畫面幾期待，迫不及待地搽上盒裝牛油、淋大量蜜糖。可惜最期待既畫面並未出現，花生醬餡少到唔多覺，亦唔係粗粒花生醬，花生味微乎其微。只可以話佢就係熱既西多士，以呢個價錢黎講有少少失望。雞脾配薯條 ($31)可能諗多左，自動假定為炸雞脾，但實物冇想像中咁香脆，細細隻亦唔太多肉，但熱同嫩滑入味既。薯條香脆，感覺較乾同確喉，整體質素一般。眾所周知品香樓最出名就係朱古力，所以跟餐飲品加左$3轉凍朱古力，但上台時驚見面頭冇最珍貴既一大堆忌廉，問左阿姐先話忌廉要再加$3，即係前後總共要加$6先飲到，都係不了。後來睇哂成個飲品餐牌都唔見忌廉朱古力或朱古力既選項，所以單價同跟餐價錢係咪好似阿姐所言咁矜貴依然係一個謎。環境同服務都不過不失，下午茶性價比不高。