百份百餐廳 (麗港城商場)

Open Now

Now Closed

呢碟椒鹽焗肉排真係好味，肉質嫩滑，椒鹽調味恰到好處，香氣四溢，吃落唔會膩。凍奶茶又夠滑，奶味濃郁，加上冰鎮得啱啱好，口感十分爽口。兩者搭配，真係好滿足！而麗港城分店既百份百人流唔會好爆，唔會好似其他地區咁要等位等太耐

今日同朋友去藍田食個快飯 就見到呢間開到周圍都係既茶餐廳 叫左個 鮮茄巨人雞扒蛋蒸飯$58雞扒好大塊 都幾juicy 雞蛋有小小流心狀 加埋個蕃茄汁 十分抵食呀 仲有小量菜提供 60蚊都唔洗 😋凍朱古力 加$3 超好飲 好濃濃既朱古力 😍 未試過去茶記飲到咁好飲咁濃既朱古力 見到佢話係韓國直送 仲要只需要加$3 都可以有咁濃既野飲 呢我覺得直頭係呢間餐廳既招牌 😎 朋友叫左個乾炒牛河 同 新鮮冷壓檸檬茶佢話唔差 $62 炒得都幾入味 檸檬茶就普通 唔會苦澀 😝

作為街坊，都想間餐廳做得好，大家有得選擇。但有幾個男侍應好似個個客都欠佢錢咁。唔該佢過嚟寫嘢，黑口黑面完全冇反應。行到過嚟就用眼超住我地，講咗俾佢聽食乜嘢，又係冇反應，都唔知佢聽唔聽到咁就行開。可能佢都感覺到我哋唔滿意，張單返嚟嘅時候竟然每份早餐加多咗$3。平常都冇特別睇，不過今次又啱啱睇到，然後問第二個男侍應，又係毫無解釋咁攞走咗張單，跟住每個餐減返$3放返張單喺枱面。呢啲態度真係趕客。希望老闆注意一下，唔好俾呢啲枯枝破壞整個集團嘅聲譽

麗港城有幾間茶餐廳，尤其是最底層嗰間好多都做冇幾耐就執咗，所以競爭都唔細。呢間百分百喺最初開業嘅時候，質素都唔錯，而且有好多嘢揀，所以間唔中都會去幫襯。雖然質素唔算太高，但係啲嘢食夠熱，都算係中中等等平民之選擇。但係隨着時間過去，我哋發現佢嘅質素越嚟越差，連檸檬茶或者檸檬水都唔係用新鮮嘅檸檬沖，而係用粉。呢間百分百仲有新鮮嘅麵包，所以我間唔中都會去買個麵包食，麵包都算唔錯，比連鎖嘅麵包店質素高，可以做早餐。

今日嚟到百分百餐廳，本身想食下午茶，但係見到午市有酸菜魚， 即管試一次，酸菜魚份量還好，有十小塊魚片，亦有少量芽菜等配料 。六十幾蚊又唔算太貴，辣度啱啱好，唔算太辣。奇就奇在呢隻辣椒會刺激到不斷洗鼻水。總括黎講，都唔錯。美中不足是魚肉唔太彈牙，呢一點可以再作改善。麗港城的餐廳不多，有質素的更小，呢間雖然是連鎖，味道還算可以。只希望衛生可以做得更好。同埋以前會主動提供紙巾，宜家要問先有，感覺唔太好。另外，順便影埋最新午市同下午茶餐牌，俾大家參考。

冬至當日，下午5左右同朋友去食下午茶，首先望入去全間餐廳得一枱客，本身打定退堂鼓，不過附近好多收晒，朋友食過一次ok就試下啦~當時，鋪頭入面有兩個樓面呀姐，咁我地入去之前就係門口嘟疫通(又無人睇無人理既），我嘟先再到我朋友嘟。然後行緊入去坐時就係咁話我未嘟疫通，只見到我朋友有嘟，我地異口同聲話岩岩係門口嘟左啦~ 佢就話佢聽唔到睇唔到，然後不斷比說話我聽，特登提高聲量話宜加政府政策唔洗安心但都係仲要嘟疫通嫁~~~~ 我好無奈囉,我嘟你又唔行過黎睇，部機又唔較大聲d，聽你又聽唔到，不知所為！🤬

星期日難得瞓到自然醒，咩都唔做衝落樓下嘆個早餐，喺門口睇個餐牌好似幾吸引，一於試吓啦。香煎雞扒煎蛋麵，塊雞扒乾乾柴柴，又細塊，個麵好似膠膠地，杯奶茶淨係澀而冇茶味，得隻蛋係正常嘅，嘥咗我一餐quota。

星期日中午買個咸蛋肉餅飯外賣，等咗20分鐘，返到屋企打開見到鮮嫩粉紅，仲以為叫錯咗韃靼牛肉😓測試口感應該7成熟，豬肉唔熟真係無謂搵命搏，結果用咸蛋豉油撈飯！🤬*唯一可取係奶茶好大杯

星期六早上10:39 到百分百食早餐 我同枱5分鐘到餐 而我到了早上10:50 仲未到 隔離枱遲過我入座都食緊 我叫煎牛扒 隔離枱炸魚都炸好最後要吹兩次 10:55am 先慢慢行咁送來 一個早餐要15分鐘 唔接受啦

向來聽聞這家廳質數一般，但抱著僥倖心態，希望會有奇蹟出現，但結果都係失望。入座後發現張枱上手食完後都無抹枱，請侍應生清潔一吓，點知佢只係好求奇抹一吓了事，結果還是要自己動手。然後點了一個二人套餐主打是蒸倉魚或霸王雞，不幸地選擇了霸王雞，碟雞又嚡又韌根本無辦法咬得開🤢。告訴侍應生但他只是望了我們一眼毫無反應。好彩另一個菜還可以吃否則百多元的晚餐就只是吃白飯和湯，試完這次真是發覺是自己的錯，人人都評唔好東西為何不信？真係煩惱自招。😔

當年套《百分百感覺》都拍續集，所以我決定食評都寫咗續集。上次俾咗人生第一次嘅負皮，有啲唔好意思。所以今次俾多次機會佢再食第二樣睇吓有冇新發現。星期日瞓到一兩點，諗唔到食乜，見到百分百cafe可以電話落單，基於我唔想等又想快啲有嘢食，咁我就打電話去叫咗個公司三文治，佢會俾返個飛尾Number你。去到櫃檯講個Number就可以俾錢pick up。其實我覺得留自己電話Number仲方便，因為我金魚記憶冇寫低真係會唔記得咗個number。不過呢啲小事。佢個公司三文治有午餐肉火腿生菜炒蛋，其實OK嘅，入面個芥末醬我覺得幾好味，午餐肉略為鹹咗少少。不過最大嘅致命傷係公司三文治竟然冇飛邊！其實連包皮食唔係唔得，好似炒飯都可以唔用隔夜飯。不過口感真係差好遠，而且食完第二舊已經有啲飽，最後我係冇食哂D包皮，唔鍾意食包皮嘅人要注意

經過見到佢下午茶餐有迷你霸王雞飯，見佢平時晚餐買成60幾蚊，依家$36仲有碗仔翅，咁貪平嘅我諗住試吓啦。因為臨時決定食，所以冇預先order, 就咁排隊買外賣。排咗5分鐘先發現原來自己排緊麵包店嗰條隊，cafe嗰條隊係隔離。可能因為啱啱開張，店員落單有啲生手，大家記得對單先好俾錢。如果大家驚多人唔想等，可以係屋企打電話去order自取,電話號碼係我upload嘅menu 入面。平日下午茶時間冇人，大約等咗10分鐘就有。碗仔翅有啲鹹，無比醋。凍檸茶嘅檸檬打碎溝入去，同隔離嗰間itamomo 一樣，我個人幾喜歡霸王雞飯原來就係蔥油加去骨白切雞，雞肉有啲韌，應該煮過龍。有4、5粒骨碎，大家記得慢慢品嚐，唔好狼吞虎嚥咁食。下次應該唔會再嗌霸王雞，有啲失望。好彩冇晚市比60幾蚊食

今天下午3:00叫外賣自取，普通茶餐，居然等足35分鐘。實在難以接受重要唔係好多客。如果係繁忙時間咪要一個鐘。找職員跟進了幾次，最後才說張單唔見咗。實在太離譜了。

初次幫襯呢間餐廳，環境及食物整體都算合格。唯獨在處理點餐時的手法不夠靈活。當我叫一個多士下午茶餐時，發覺餐牌上有奶油多、油占多及奶醬多，由於我不喜歡煉奶，但又想食花生醬，於是問侍應能否改成油醬多。但該侍應聽到我的要求時，竟然不知所措，呆在當地。數秒後經過提點後，才向其他人請示。最後答案就是只能跟足餐牌，不能作任何更改。當然，餐廳有自己的規矩，其實無可厚非。但在麗港城主力做街坊生意的食店，如果能稍稍靈活變通，一定能夠吸引更多街坊幫襯。