3好茶檔 (Closed)

昨日（26/5/2021）來鳳德搵食，知這餐廳開業無耐，見餐廳內都有幾枱客，及放在門口的餐牌，價錢都吸引，宜家重有二十幾蚊連飲品早餐，便食個早餐。入到去坐下，等咗一陣都無人比餐牌，焗睇貼在牆上餐牌，但就無咗門口二十幾蚊既早餐。點了二份早餐，早餐上枱時間慢，飲品就更慢，味道一般及偏咸，多士唔脆，應該焗咗好耐。

今日下午茶又生炸雞髀餐，因為戒粉麵飯，今星期分別試咗三間雞髀餐！呢間雞髀餐算最好！雞髀生炸得唔錯，首先皮唔會炸得太硬，雞肉唔會太乾仲有少少肉汁，味道剛好！沙律材料及醬汁也不錯！奶茶茶膽比較濃，我走糖有少少澀，加糖應該較好！

往往在下午茶時段，在茶餐廳叫粉，麵，飯的下午茶餐份量都係比正常餐的份量少3分1甚至3分2，而呢間茶記的下午茶餐供應嘅食物份量却出奇有正常餐水平，如果在接近18O時段叫呢種下午茶餐，個人直情可以當成是該日的晚餐食法，而該食店亦没有將貨就價，茶和主食的味道亦算好味，個人認為水準最高的主食是，干炒牛河及星州炒米以$37呢個價錢，可以講係超值好食但要注意該店逢星期一休息。

麻甩底嘅我最鍾意就係去茶餐廳😂😂今次同朋友早餐時段經過，見佢新開，門面格局都幾好，所以就入去試試🤤😍茶餐廳就必食沙嗲牛😍呢個沙嗲牛都好出色，幾濃，牛肉唔韌，份量都幾多，叫咗一碗跟麵，一碗要米粉🤤好入味，啖啖都食到沙嗲香😍😋豬潤米粉亦唔錯！咬落冇腥味，幾好食！除早餐跟嘅奶油豬拼火腿奄列/腸仔煎蛋/煎雙蛋，都算合格😋奶油豬扣分係唔夠熱，D牛油唔溶，練奶都多，麵包口感唔硬，正常脆。可能新開，樓面比較混亂，落單都要D時間，廚房有D煮唔切情況😅，但都可以接受。會再返兜！🤣🤣

下午茶去左呢間，10分左鐘左右就安排到位，坐低叫咗個炒麵同熱狗，等咗15鐘左右食物就到，味道ok，係鹹少少。只係，有個中年女員工態度令我好反感(其他員工冇問題)。當時鋪內唔算多人，入座時見到座位上有倒瀉飲品嘅污積，於是我好聲好氣想叫嗰位員工比幾張紙巾我自己抹一抹，佢叫我等一等，點知一等就個幾字，期間佢周圍去幫人落單無視咗我，我就企喺餐廳走廊等佢個幾字(絕對唔會係一時唔記得左，因為鋪面開揚，有客人企起身個幾字一定全場都見到)。唔緊要，不過最後嗰位女員工將成棟未開過嘅紙巾大大力就咁掉係我枱面，就走左去，即係想我幫佢fill埋紙巾咁話？本身比佢無視咁耐已經燥燥地，仲要用咁嘅方式比紙巾我，即刻嬲到我彈起。我知客唔係大晒，員工真係唔得閒我咪等陣囉，問題係鋪內員工有好幾個，下午茶客量又唔算多，我都冇話佢張櫈比飲品倒濕咗都唔清，佢就黎發返我脾氣先？唔係呱？就算幾好食以後都唔會再去。呢個鋪位嘅茶記轉過幾手，以前幾手整體都唔錯，今次呢手係印象最差。可能3好茶檔係唔包禮貌好啦。

上星期去黃大仙整頭髮，經過一間新開茶餐廳，門面見好搶眼，就走入去試吓 ，第一時間梗係柯打最常去茶餐廳嘅干炒牛河同熱奶茶，竟然係好味道。奶茶係我最喜歡嘅味道，有茶味(忘記影相），下次會再去試其他。

見新開張，望落去乾乾浄淨，咪入去試吓！叫左下午茶餐：肉絲炒面配凍奶茶.面底卜卜脆，唔太油，系我喜歡食果種，真不錯！我系黃大仙都住20幾年，食過好多很多間茶仔既肉絲炒面，呢間算系最好味😋的！凍奶茶，夠滑，幾有茶香味，本人幾喜歡！仲有，平時食下午茶份量會細D但呢間下午茶既分量同我平時食lunch 分量應該差不多，所以食完系超飽啲😃😃食完先諗起冇影到相片😅😅43元左右食個Tea, 真係超值下次會再try其它款！