合勝世伯雞

Open Now

Now Closed

我係餐廳附近工作，經常都會打電話叫早餐+午餐外賣食，次數都不下數十次，每次都會點一樣的早餐，就係"腿蛋治"，當我今日照舊去拎外賣，餐廳男收銀員就話：哦，茄蛋治，準備交俾我，我就話，係"腿蛋治"，一開始佢都照交俾我，睇下我拎唔拎走，但之後我都話係 “腿蛋治”，個男收銀就開始態度表情轉變，發一聲類似粗口既發音，加一句 “X...你發音有問題”，情不願意去幫我轉返岩，我當下覺得好被不尊重，點解係我發音有問題，而唔係男收銀聽錯，仲要態度極差，覺得自已一定係岩，自問我已經係電話到講左2次，同埋永遠都叫同一款，有經驗既人都會認得把聲，一朝早就面對既遭遇，覺得”好被不尊重”，用餐體驗好差!

第一次試呢間，見平日lunchtime幾多人，所以今次就去試下佢。叫咗蒸鳳爪排骨飯，lunch set $50 包飲品，同區茶記都算抵。叫完個餐，5分鐘內已送到。份量都幾大份，味道都好好食👍🏼

路過灣仔搵嘢食見到【合勝世伯雞餐廳】今次就入去試試 要試試最出名的世伯雞餐款式好多有口水雞、豉油雞、客家世伯雞，可自由配搭飯、湯飯、米粉、米線我就試下傳統世伯雞米粉配例湯 $50賣相幾靚份量又夠多 雞肉和雞皮都好嫩滑 明火例湯有好多湯料 (最鍾意飲湯)仲有其他餐：秘製咖喱飯餐，特色扒飯餐，韓式麵餐，素食餐，美味肉醬餐，營養餐

哩幾日要出差灣仔銅鑼灣, 第一日 Lunch 是是但但入咗去世伯雞, 求求其其點咗個 Set, 係餐廳入面見到一隻隻掛係到嘅豉油雞好鬼吸睛, 色水又靚又肥美, 重更加吸睛係對面枱點咗雞, D蔥蓉又多顏色又翠綠, 勁吸引! 唔洗講, 第二日再去食 Lunch!第二日嚟到, 門口已經有一大班人等外賣, 中伏味低啦!今次當然係點豉油雞多蔥啦!優點 :1, 油雞無得輸, 肉嫩, 份量足.爆 Like.2, 主角蔥蓉味道適中唔會過咸.3, 價錢適中, 五十零蚊雞又好食, 隔兩條街嘅祺哥燒鵝, d油雞差得多.缺點: 1, 成日開大門, 冷氣不足.2, 座位迫咗d囉.....

見到新店，諗住去幫襯下，明明見到外賣嘅評分一啲都唔差，信心大咗好多點知嚟到，我以為自己眼花，D雞質地好差，有五件雞。。但其實得三件係食得，雞翼隔離個一大塊雞，完全係煲完湯拎返出嚟嘅感覺。。你睇佢斬雞就知冇乜誠意啦⋯⋯中伏。個米線就不過不失，個湯夠味，湯底有冬菇、豬潤，個米線質地一般般，但主角”世伯雞”，真係岩晒名，又干又柴。無下次新鋪嗰張，冇幾耐就交D咁嘅貨，好難再有信心去幫襯，真心好差好失望，希望店主見到，改善下

前兩日同同事食晏, 見呢間合勝世伯雞嘅午餐好似唔錯, 就入去一試<鳳爪蒸排骨>是日午餐嘅選擇唔算太多, 大食妹就鎖定目標, 嗌左鳳爪蒸排骨主食方面可以揀飯或麵, 大食妹就揀左飯, 因為同鳳爪蒸排骨最夾鳳爪蒸排骨同白飯分開上鳳爪蒸排骨份量頗多, 排骨好滑好入味, 鳳爪都唔錯最重要係豉油水好足, 送飯very good<薏米水>餐飲方面, 大食妹仲加錢upgrade左做自家製涼茶大食妹去果日嘅涼茶係薏米水, 睇相就知道好足料, 薏米超多, 清涼解渴

#Fat99eat灣仔❤️ Lunch時間黎到呢邊 真係慢一步都有排等入到去叫完野食已經勁多人排隊堂食加外賣😳原來佢之所以咁多人排 係因為佢搬過舖位黎我諗佢係之前舖位都累積左唔小熟客架喇佢未搬之前Fat9都未試過食 今次出開黎呢頭就試試佢先Fat9相信佢咁多人排隊 食物質素都會有番咁上下既🤤同埋佢星期一至五都會有快餐既menu見佢都係啲家常小菜 望落去就樣樣都好吸引唔鐘意食雞都可以試下佢啲快餐 都有啲質素😻﹊﹊﹊﹊﹊﹊﹊﹊﹊﹊﹊﹊☞ 世伯叉燒雞飯 55$有啲失策既係Fat9唔記得落單個時叫雞胸 所以佢比既都係雞翼位同髀位 Fat9唔太鐘意食呢啲位🥺但佢啲雞食落口真係有雞味 呢句好似好廢 但真係講事實 因為平時出去食啲雞好小會有咁鮮既雞味🤔同埋佢啲雞都好滑口 唔會鞋烚烚 鐘意食雞同對雞味有追求既人 Fat9相信你會鐘意佢既雞😼而叉燒呢 Fat9就鐘意食半肥瘦 但佢比啲叉燒就全部都係瘦 所以Fat9就覺得麻麻地 同埋冇乜咬口 但佢又唔會好似食緊柴咁既 但可能真係太瘦 無論個味道同口感都差咁啲..😕如果你都係鐘意食半肥瘦既話 落單要講定 今次係Fat9失策🥺﹊﹊﹊﹊﹊﹊﹊﹊﹊﹊﹊﹊✎ 咸魚茸馬

搬新鋪後多咗幫襯，依兩天凍到死就試咗胡椒豬肚世伯雞湯飯，飲完湯成身暖哂，世伯雞保持一向水準。但有一日食的午餐條臘腸就真係好唔掂，材料質素成疑。更主要就係那收銀女士每次有意無意的辦做第二樣而不找錢比你嗰度就好有問題囉，現在知道為何佢不用八達通了，原來係為方便唔找錢。特此敬告光顧人士在埋單時小心錢銀找贖。

乍看之下，近排又有新茶餐廳開，但望真啲，噢～係「合勝—世伯雞」，原來搬鋪位姐！好耐之前都食過，唔錯！Lunch 就決定食呢間，去到門口唔需要點等，近乎直入。店名叫得世伯雞，無理由唔食雞啦！咁就叫咗「世伯叉雞飯」，餸同飯分開上，叉雞擺得幾靚仔，而且有光澤。叉燒夠哂冧，夠哂鬆化，最出色係佢嘅汁，送飯一流；白切雞就更加出色，就算係雞胸肉都唔會太「鞋」，真係雞有雞味，不過佢哋嘅蔥油偏淡無乜味。唯一美中不足，就係啲飯偏少。