大囍牛雜粉麵

Open Now

Now Closed

寫咁長係對依間舖投訴！一黎食物唔太衛生都算，但喺對客既態度真係太那個！叫嘢食講錯一隻字，個阿姐惡咁質問我，仲要鬧我叫錯單，喺咁鬧我講我錯佢冇錯！間舖坐滿晒人個阿姐仲要放我同個朋友入舖，冇位仲要我企舖裡面，凳都冇俾我坐。我仲要親自問另一個食客可唔可以讓張凳，個阿姐都唔點樣處理，個食客緊喺唔讓繼續霸張凳！如果啲店面睇清楚啲，就唔會咁啦！

樓面態度惡劣差勁👎落錯單 仲要話：「落左啦喎」隔左陣 出埋粉麵，仲要補多句：「出左啦喎！」哇！諗住可能只係個員工問題唔小心同朋友去食，朋友怕我破費，無叫野飲，我提朋友套餐價黎，搵返樓面落單 ，樓面：「我而家幫你唔到落，落唔到單」我們只能等待後來樓面扮忙（無野搵野做果隻，未食完就攪下筷子之類）轉左幾個無謂圈 先有同我朋友落單到最後仲嘲笑我的書包顏色等等，冷嘲熱諷，令我感到不被尊重🫡雖然佢只係樓面，不是老闆 或經理收住人工來找食客出氣，實在令人失望🫣如果大家想早午晚都受氣 記得幫襯佢 ！

大囍牛雜粉麵⭐️⭐️⭐️⭐️🐾 崩沙腩河 $47崩沙腩雖然得2層，但肉嘅部份都好嫩，完全唔會韌。脂肪嗰部分好香油脂味。河粉好滑同埋有少少口感，唔會煮得好爛好易斷。湯底有啲甜甜哋，但就偏淡。加啲自製辣椒油幾香，同平時食嘅差唔多。份量多。🐾 腐乳通菜 $18正正常常。係落腐乳醬。通菜新鮮。🐈‍⬛ OverallCP值高，住附近嘅話會間唔中食，但如果難得入天水圍就唔會揀佢嚟食。📍 大囍牛雜粉麵 (天水圍)天水圍天靖街3號天盛商場地下天盛街市M409號舖#香港美食 #天水圍美食 #neko_nibbles_tsw #唔好伏自己

服務好差 好少打食評 但今次係食唔到都要打黎反映一份舖去搵個姐姐落單叫外賣 佢叫過一步排隊 咁我就去排 但排到我個陣 佢直接skip我 向我後面個位講「下一位要咩」呢間舖頭d姐姐服務態度真係要改善🙅🏻‍♂️🙅🏻‍♂️

位於天盛街市既大囍粉麵店都開左一段時間，今日屋企無煮飯就順路過黎試試，之前都未食過，店面比較細得幾張枱，都係小圓枱如果1個人黎搭枱都會坐得比較埋，好在而家有塊膠板隔住。睇下餐牌比較特別就係有咖哩飯，不過經驗所知係粉麵店食飯多數麻麻地，所以食返粉麵好了，另外要提下呢度既牛肚係用金錢肚，金錢肚相對來貨較貴，食牛肚就抵啦。崩沙腩河見到有我近期鍾意既崩沙腩，41蚊又幾抵一於叫黎食，先講講湯底都算幾清，味精應該唔太重，至於主角崩沙腩呢就比較弱d，有7塊切得係比較厚，但食落比較老同鞋，無之前出面食過某店咁嫩滑，同埋筋膜位都唔見，肥膏位有少少，略為失色，河粉質素都比較一般，起初食還好，食到尾開始有d碎，比較一般未叫好差，埋尾都試下佢地既辣椒油，幾香辣惹味。凍檸茶跟餐加5蚊有冷熱飲，叫左凍檸茶少甜，茶味普通啦，粉麵店加5蚊有凍飲其實幾抵了。整體黎講質素比較一般d，最靚既崩沙腩略為失望，但價錢算比較親民，街坊樓上附近想食粉麵都係幾好既選擇。

好味！加杯凍飲都係$5炸（點解要逼人地寫最少80個字🙈）（簡單啲唔好咩😒）（香港人咁忙，你咁樣真係逼人哋唔好留言、唔好比評語、唔好po相嘅啫……）（我覺得自己好似返左中學咁用標點符號來湊夠數囉🤣）

夜晚收工去整個雲吞米，十次有十次都係無米。。。尋晚又去幫襯，姐姐話米粉唔留得，所以有貨都無供應！咁做生意點得㗎😓不過，哩檔嘢啲腩汁又超好味，哩樣不得不讚👍🏿但係成日唔賣米粉，再好味嘅腩汁，我都會放棄幫襯

是但搵咗個地方，諗住食啲野醫肚，所以就入咗嚟呢間，平時食開飯，今次想轉下口味食下啲粉麵類，睇左陣餐牌， 諗咗陣食咩好，本身想食牛腩河不過最後決定嗌個 紫菜四寶河、凍檸茶侍應姐姐落咗order之後，碗粉好快就嚟啦，比我想像中嘅要大碗，真係好鬼大碗熱辣辣香噴噴嘅粉，有好多紫菜正呀！河粉嘅份量亦都好多， 好爽口好滑我最鍾意食紫菜，三兩下就食晒食依啲粉麵，梗係落少少辣椒油先正㗎喇所以我倒咗一啲辣椒油落碗麵度，食落更加惹味，令碗面不至於咁寡。魚皮餃最正最好食，大大粒皮薄料足，好想食多幾粒，魚蛋亦都好好食好彈牙至於粒貢丸反而就麻麻地，冇我想像中好食。凍檸茶都幾好飲，唔會太甜而且夠冰凍

因2019冠狀病毒病自虐世界，大囍推出抗疫優惠，於晚上6時後光顧1個飯類或2碗粉麵，送1碟生菜今日外賣一份咖喱牛腩飯43元打開真係有少少失望，每份都係到個碗嘅¼目測份量很少，不夠滿足不過呢，呢個份量食用是OK的咖喱牛腩係同牛腩麵嗰款是一樣，將清湯腩切好之後放入碗，再額外加上咖喱汁牛腩嘅份量，比平時食牛腩麵嘅份量多少少咖喱汁味道不錯，小小辣，個人覺得可以再辣少少，如果有埋薯仔就一流喇送1碟生菜，好似可以選擇加腩汁或者蠔油，我選擇全走，清清地進食都唔錯，自制食得有營

食過5次外賣早餐，分別是牛腩麵及牛腩粗，都是飲齋啡，頭4次廚房都是由女廚師主理，明顯是門外漢，煮麵時間過長，牛腩切到啱啱慘慘，外賣是湯麵一碗過，以為浸得太耐啲麵發脹，所以第4次購買開始走湯，麵色4次都是偏白，發脹左，一睇就知煮麵時間過長，第五次光顧走湯牛腩麵，變咗男廚師主理，返到公司打開盒，靚仔好多，麵爽，牛腩切得齊齊整整。牛腩味道統一都是很好味又夠冧。齋啡味道次次都一樣，水準不錯。個人很喜歡佢哋嘅辣椒油味道，非常岩我口味。收銀及服務員姐姐都好nice。