日溢中西美食 (Closed)

首先，講句唔關事既：日溢 係讀「日日」實在好易讀錯做日益😂😂絕對係糧尾首選，我叫一個外賣雞粒炒飯呀，大份到夠我食2餐！ 😜窮起上黎呀，我分3餐都得呀！（當減肥囉）經濟差，好多人靠你架喇！佢將個外賣發泡膠盒就黎塞爆呀不過咁，唔好衝去幫襯住，如果你對食係有要求既話，就唔該停一停 諗一諗。 🤨因為，佢既味道係非常麻麻地呢～😃賣點真係大份架咋至少... 我就啱啱出左糧，暫時未諗住再次order日溢既午餐或者到糧尾時... 都唔會㨂佢.. sorry喔🥺

剛剛工作後, 在眼花瞭亂的灣仔街頭尋找簡單晚飯食時,發覺好多都是花費近百的一頓晚飯.但因為搭過海巴士的關係,就發現到呢間茶仔, 就試試你吧!因想食得清淡點, 所以叫左個蝦米雜菜煲.先黎了個例湯, 以為都是普通湯水,但呢個粉葛湯, 誇張講好似阿媽煲出黎咁. 好味!再來是個蝦米雜菜煲, 在上湯的浸著下, 令到d 菜同d 粉絲入哂味, 送飯一流! 最後飲番杯簡單的凍啡, 都係約六十幾元埋單食完一出門口等幾分鐘就有過海巴士的到來, 十分方便!

灣仔軒尼詩道熱鬧地段既茶餐廳～星期日晨早流流，想快靚正食個早餐之後就去上堂！價錢唔貴、新鮮製作，我揀左個通粉，係就係賣相唔係吸引但覺得味道都ok 既！奶茶仲要大大杯、茶味夠濃，上堂前可提提神～

經過灣仔做嘢，晨早流流食個早餐先，喺修頓對面，搵到呢間茶餐廳，門面普普通通，內部裝修普普通通，但見價錢都普普通通，即管試吓啦早餐牌灣仔來講，早餐個價做到低到$28 ，真係算超值，今日我就揀咗個A餐，試吓先西煎雙蛋及牛油方包做到太陽蛋效果，蛋黃流心，但煎唔出一種脆邊的效果。方包建議大家轉烘底，因為佢用呢隻方包，食入口係有少少「笠」口的感覺鮑魚火腿絲通粉火腿絲算多，鮑魚是絕無僅有，但偶爾咬到一條鮑魚絲，味道係濃郁的。湯底來講，比一般嘅茶餐廳更濃味，但更明顯飲得出嘅係用味精開嘅，鍾意味濃定淡，真係見仁見智熱檸水比平時嘅熱飲杯大杯少少埋單$29 ，當一個中途休息站，對食物要求不太高的話，超值得冇咩所謂

今日路經灣仔，打算食嘢，見到呢間曾經光顧過，決定食完飯先回家。食物質素算可以，等候時間不需十分鐘已可上枱。蝦醬海鮮炒飯味道偏咸，但可接受。服務水準可接受，合格。

肚餓去食個下午茶餐，路經呢間茶記，之前食過晚餐都叫正常。今日究竟個廚師有病，定係換左個廚。炒碟肉絲炒面，個面底唔脆都算，一上枱已好多油，之後愈食愈多油，完全油浸面甘，未食過一碟甘難食嘅野。下次一定唔會再幫襯 。。

由於粗口及個老闆姓氏唔出得街，所以我已經修改咗3次啦～間日溢勁搞笑囉！我啱啱8點打電話去叫外賣，佢9：30仲未送到，有個自稱老闆既先生無d禮貌又毫無家教，（替其雙親擔憂）話cut外賣就cut線，打返去話要搵老細投訴仲話自己就係完全不知所謂，你咁既服務真係一早執咗佢啦!“好多附號”！個送外賣又係勁搞笑，我9：30cut單9：45仲要打電話嚟話要送外賣，真係咁緊張就唔好遲粒半鐘啦～如果你個人好有問題又好鍾意等就除便幫襯這間廢嘢做老襯啦！老實講做茶記做到你咁樣就真係影衰哂成個同行行業囉！

今晚放工經過尼間茶餐廳，其實平時食晏都唔會去，今晚可能OT過渡，神推鬼拱下入咗去鬼節真是有點邪！見到餐牌就叫了第一個餐～特級肉眼扒⋯⋯來到後我有點驚訝，這不是西冷嗎？侍應堅持是肉眼，話薄切切那些才是西冷喎！咁確實係有點厚度嘅，但我唔覺得有八安士囉！算⋯⋯我硬食。切開，那種紅色，好疆屍肉feel囉⋯⋯唯一可取的是薯條好知味！我知錯啦！去茶餐廳真係應該只叫常餐、茶餐、中餐。可能去「大X樂」或是「大X活」都仲冇咁難過，至少價錢平d呀！我真心知錯，鬼節仲有幾日就過⋯⋯

全日都冇食過野，夜晚九點落堂後喺灣仔搵食！雖穿長由衛衣但仍感到凍凍地，行至修頓對面，一心只想快食快走；好啦，就俾多次機會呢間茶仔啦！入到去，店員示意我到某一列卡位裡坐 (剛才停駐在店外看餐牌時，見這店員一路把腳擱在這卡位一端的椅上......)。睇勻餐牌，只有拉麵餐 ($45) 叫做平 D，於是揀了豬扒魚腐豬骨濃湯拉麵+熱奶茶，等左一陣就有得食。本來都沒大期望，因之前落狗屎同埋冇乜食肆可揀，所以就試過呢間！當日食過這裡的黑椒炒公仔麵，成碟只有大陣 "油益味"，公仔麵一 PAT PAT......如今赫見上檯的這碗拉麵，豬扒大如雞髀，還以為自己叫錯餐而嚇了一跳。用筷子撩下 "已沉底" 的麵，乍看似是拉麵類，應該沒問題吧。一食先知......瀨野！！！塊豬扒似浸了成日的發脹 "肉類"，色澤已呈淡色，確實幾似腐屍！它冇味冇道兼有點點 "羶益味"。個湯底一 D 都唔似豬骨濃湯味，似滾水加了三湯匙的萬年油......D 麵，唉，成陣鹼水味......只有 3 粒魚腐叫做 "正常 D"。杯奶茶....澀口的......呢個所謂的拉麵餐，我落了近半支胡椒粉來 "吊味"+"辟羶味" 去 KO 它...

第一次叫外賣等了一個鐘，今次等咗一個半鐘仲未送到，食品水準麻麻及送貨職員兼超無禮貌！！((如果你是有限食飯時間的，切勿光顧，否則你等到食飯時間完，都未必有飯食))

今天清晨5點多到達灣仔工作，發覺除了麥當勞之外，只有這間選擇，其實我之前一直有光顧午餐外賣，因為佢地一個都肯送。說回今次早餐：這個叉燒米唔講味道，只講賣相，我其實都有點驚喜。因為真係幾靚，懂得加雜豆，令佢增加多點色水，好聰明。叉燒可以，燒得唔太過火，唔太肥，早餐剛好。米粉都係普通貨，只要快點食完，相信口感唔會太差。還有方包、火腿、香腸跟餐，都係普通來貨食物，唔需要大師級，只要來貨好，其實口感都唔會太差。今個早餐，價錢都大路，在灣仔區算是可接受。服務都可以，可能因為清晨人比較少，但要留意，早餐要5點45分才開始，但佢唔介意你坐到夠鐘先落單。

不在灣仔區工作，但間中會到灣仔區工幹，呢區大把嘢食，撞手神隨便找間都唔錯，偏偏上星期二撞入咗呢間咁嘅嘢。基本上早餐我已冇咩要求，腸仔煎蛋腸仔唔太燶蛋唔太散，一餸麵唔太咸都ok喇。點知真係中伏，嘩大佬條腸燶到爆，黑過我個肯尼亞黑人上司塊面；隻蛋唔知係咪生無可戀,由20樓跳落隻碟到散哂，重係拍住拖兩個一齊跳，睇嚟呢對情侶蛋之前一定有D好傷心嘅住事......重未夠，有位大粒墨阿姐走過話上錯咗，我話咁好啦，妳攞返去啦，佢見我食緊當中嘅餐包，同埋可能比佢D同事頂咗兩句，居然發洩係我身上，鬧咩唔好講喇，嘩大佬，我嚟食嘢唔係嚟比妳鬧喎！嚟埋碗豬排麵，雖然已冇咩心情食，但要比錢嘅都試下啦，嘩大佬，可能咸到連塊豬排都頂唔順，露出佢痛苦嘅V型皺紋，睇見咁，凡人都有惻隱之心，我又點忍心食佢呢？成間嘢，最正常就係嗰杯奶茶，所以我take it away比咗出面橋底個乞兒，佢話very good喎。一句講哂「食物差，服務更差」，永遠冇下次！

同fd 諗住求其食個hea 飯就趕去睇show，行過見到呢間下午茶去到6:30 就入去試下。我叫左熱奶茶 & 焗肉醬意粉，焗野都唔駛等好耐，勁多肉醬，但唔會太鹹，意粉完全冇焗燶/ 硬或黐碟邊，好容易就撈勻，味道真係唔錯，整體above average。其間有位侍應服務令人印象深刻，十分有禮貌之餘，見我地杯茶涼左，仲特登換2杯熱茶畀我地，走既時候收銀既姐姐都好有禮貌。

午飯時間隨意挑了一間茶餐廳用膳，餐廳門面都算光猛，內裡環境及衛生情況普通。有電視設備。午市套餐 $45 一份，包中/西餐湯或餐飲一份，或可選擇加 $2 同時有餐湯及餐飲。中湯青紅蘿蔔瘦肉湯，食味普通喇！主食鮮茄焗豬扒飯，以外賣錫盒盛載，格調上已扣了一點分數。焗飯所用上的芝士茄汁調味不過不失，豬扒略薄身及靱口，合格水準。熱奶茶茶奶比例味道皆不俗，是眾多美食飲料中最佳之選。

今天邨巴剛好停在這裡的門前。就試試它的早餐吧。它的早餐有很多選擇，一般價錢都不超過三十大洋。時間關係，叫了尋常不過的火腿鮑絲通粉+ 煎雙蛋加方包 + 咖啡，$30。本來是$28的，但原來減一隻蛋改為香腸要加錢。店內坐位狹窄，但尚算整潔，侍應態度一般。食物以光速上桌。火腿鮑絲通粉：鮑絲少的可憐，但有很多雜菜讓它看來有點悅目，湯不夠熱。香腸煎蛋：香腸比豪星的好吃一點，不過不失咖啡：味道有點怪。唉，三十元一個早餐，不見得好吃，也不是難吃，還是繼續發掘新的早餐地點吧。