黃廚味道

Open Now

Now Closed

呢間係我食過比較出乎預料既餐廳，因為就咁路過見到間餐廳裝潢比較舊，而且座位比較少，入去時，都覺得只係一間普通既茶餐廳。一入到，見到店員用消毒噴霧清潔枱面，衛生不錯👍服務態度好好，又介紹我地食咩餐，而且見我地係女仔就好貼心咁問「洗唔洗少麵，因為個份量都比較多」。我叫左沙姜雞翼和滷肉撈麵，碗野一到，不禁皺一皺眉：「乜沙姜和滷肉夾味咩？」但一食落口，真係好好食，無諗過會咁夾🤤而且好足料，啲滷肉唔係肉碎黎。其後我地都有叫外賣，叫左炸豬扒，啲豬扒熱辣辣又大塊，上面有啲椒鹽粉，好抵食！其實重點係杯野飲「黑糖燕麥」，軟綿綿又唔會太甜，好有口感，飲完已經好飽肚，但真係好滿足！一餐$45！又好食又飽到可以頂兩餐！我好少寫食評，但呢間野無論服務態度同埋食物質素都令我讚不絕口！

星期六忙完行過見到唔駛等位就入去食返餐，因為平時多人食，而且座位少（限聚令下減多50%），變相令食客排更耐，但呢啲唔關餐廳事……量完體溫，入去角位坐低，落蔥油雞脾飯+檸檬紅茶。蔥油雞脾飯：飯底份量都唔少，蔥油多到可以撈完一個飯，雞脾鮮嫩，又啖啖肉，最適合食肉獸食！檸檬紅茶：茶底幾清，唔會太甜，拿捏得恰度好處，呢間既檸檬茶會令我想隊多兩杯。註：餐廳開到2:30pm就落場，如果唔想撲空就要注意時間。題外話：我聽到附近有位小姐要飲少甜飲品，跟住店員都好耐性有禮貌咁解釋d飲品係預先製作，所以無法再調。跟住店員話可以幫位小姐手沖一杯熱檸茶，雖然未試過，但可以試試。小姐過一陣就話要無糖，店員只好解釋茶膽已經有些少甜，做唔到無糖。最後，我都唔記得點解決，但我覺得店員幾好人。

朋友帶我去一個貌似羅湖城既屋邨商場，話有間唔錯既鋪頭推介，我原先以為外賣專門店只做外賣，原來而家加開埋堂食，但位置不多，目測只有十餘個位。大型餐牌置於門外，但好幾道菜已被遮蓋，不再供應。正因為選擇相對少咗，揀嘢食都易咗。最終決定食：胡椒咸菜豬肚湯米線！感覺好似將個米線放落茶樓個種豬肚湯，但呢度既豬肚絕無欺場，份量十足。我一直只食麻辣米線，無諗過呢個豬肚湯配搭得咁好。咸菜大大片，邊食米線邊飲湯真係好爽餐飲跟檸檬紅茶，茶底好清，有回味感覺！

終於開返喇！由地下搬咗上一樓，味道變了……是變得比以前更好味更吸引，每次都係食招牌套餐，必配足料老火靚湯。今次叫了去骨豉油雞肶（沙疆汁）同埋大王炸豬扒（咖哩汁），雞肶很滑無雪味，沙疆汁很多但不會很咸，送飯一流，豬扒感覺比以前無咁厚但都算是厚，外層堅香脆，咖哩汁比較獨特，有家的感覺，兩大粒薯仔又甜又鬆軟，老火湯的藥材味我至愛，價錢及味道於同區來講，Dickson Kitchen真係無得輸，最值得一提係全無加味精，食過一定會返兜。有一點希望可以再加強，落單靚姐說話態度同語氣可以好一點，家人一向隨和，但居然有微言，確實有點驚訝。