金域冰廳

Open Now

Now Closed

門口老闆不停叫人入，但場內做唔切，呢頭落單，轉頭行左去，等左15分鐘，原來無落到單，漏單問題嚴重，一個普通午餐可以半個鐘都未有，如果趕時間真係唔好諗呢間 鐵板豉油王豬扒公仔麵，個麵完全白烚咁款，無味，呢個真係hea到咁既出品

2個餐最後埋單連埋加一總共131蚊，碗叉燒蛋飯料足大兜，都算濃味，蛋好滑，叉燒睇落新鮮，個人認為都算係咁，另外個西冷牛扒配意粉，基本上味道唔會出錯，冇偏咸偏淡，幾好味，佢會配碗勁細碗嘅中或西湯，都唔錯，雖然係細碗啲，總體黎講茶記黎講，我見佢餐牌仲有梳乎厘，先88蚊，性價比睇落唔錯本身想叫埋，但最後食唔落，下次一定再黎點多次。

以為所有客人熟讀佢哋份餐牌咁，入去問下有無蒸魚餐，因為帶住長者驚賣晒，點之俾佢反問我要咩魚，仲以為我要乜有乜，再問下佢仲有咩魚可以叫，串串貢咁話:「有鯇魚、倉魚、黃花魚、盲曹。」但佢自己再話:「不過今晚冇盲曹，晚晚都係呢D㗎啦！」，阿先生，你餐牌無鯇魚，點叫晚晚都有呀！仲有，屏幕蒸魚餐價錢同本餐牌價錢相差$20，埋單又要睇清楚。呢間生意一好，D服務態度就串串貢，所以我最後唔幫襯，我無打算係香港出街食飯要預埋受氣。

落單時間是8:24pm但到食物真正上枱的時候竟然是9:10pm，一般去茶餐廳都係希望效率以及速度。既然呢兩樣都未能達標，咁就即管試吓食品質素如何。晚餐叫了一份花雕蜜桃一字骨，以及黑椒茄子牛仔骨煲。花雕一字骨是完全吃不到花雕的的味道，而且豬肉的味道都吃得出不太新鮮。黑椒茄子牛仔骨煲基本上食得落口嘅只有個茄子，牛肉的質素非常之低，韌度未能咬開，同食緊柴皮無分別。好耐冇食過一啲咁低質素嘅茶餐廳。建議在旺角都不要浪費時間，去這一間餐廳進餐。

諗住求其食個下午茶，入到去凳都未坐暖個侍應就行埋黎問食咩。.同佢講話睇下先（其實我諗緊食下午茶餐、常餐定係個歐陸餐）佢行開左30秒左右又番黎再問，逐個餐sell，我朋友都好聲好氣同佢表達我地想諗多陣先，而我就話重睇緊。點知侍應就開始係度單單打打（入左坐3-4分鐘左右）然後就講左句令人好不滿既說話：「 坐係度都要叫野食架，唔係俾你齋坐架嘛。我問番佢係味好趕（落場），佢就話唔趕。我心諗唔趕你過黎催我Jm9，你間野又唔係坐滿人爆場，我又唔係坐左成半個鐘都唔叫。成間舖半滿都講唔上，然後坐喺度開住套戲睇都有。嬲嬲地去左另一間食，但旁邊啲茶餐廳或者麵店人流都比呢間好多，我在上網望咗一下呢間店啲評論。我就知道點解呢間嘢冇生意，或者咁講，係佢啲員工唔想做生意。.不過咁，係成件事入面我覺得唯一做得唔好既係我打開左個ig，可能就係咁令佢以為我係只會坐係入面只坐唔叫野食既人啦。

入座率唔夠5成，炒個河粉要差唔多半個鐘，作為一間茶餐廳點解可以慢成咁？這間茶餐廳的服務效率實在令人失望。入座率不足50%，卻需要近半小時才能上菜一份炒河粉，這種慢吞吞的速度讓人無法接受。作為一家茶餐廳，我原本期待能夠在短時間內享用到快捷美味的餐點，但這次的體驗完全背道而馳。無論是對於有限的座位數量，還是廚房的運營效率，這家茶餐廳都表現得相當糟糕。雖然炒河粉是茶餐廳的基本菜式之一，但這份河粉的味道平平無奇，缺乏新鮮感和獨特風味。考慮到等待的時間和整體體驗的差勁，這樣的菜品實在無法讓人感到滿意。總之，這間茶餐廳的慢速服務和普通的菜品質量，讓我對這裡留下了極其不滿的印象。我不會推薦任何人去這家茶餐廳用餐，因為你只會浪費時間和金錢，卻得不到任何好的回報。

今天下午2點走去襯，諗住叫個下午茶餐，坐低後舉手叫伙記寫餐，點知個兩個伙記賴到死，不肯行𠹺嚟，隔空問要咩嘢，我話要下午茶嘅乾炒牛河和凍冷茶，最於要嗌咗3次才完成落單，激氣的事係等了20分鐘才上碟乾炒牛河，我睇住個廚房出口，一炒就4碟一齊出，廚房原來等order，等夠碟數才炒，所以快慢要睇大家運氣，出品就唔錯，真的幾好味，但係奉勸各位趕時間就不要博下午茶了。

今日家人晚飯後回家表示好嬲⋯食晚餐食到成肚氣，話說家人坐低叫左海南雞飯同埋牛柳餐，食完海南雞飯後，份牛柳好耐都未見踪影，麻煩店員跟跟單⋯先知漏單，店員回覆已下單⋯好忙要等⋯再等咗十幾分後通知家人⋯㕑房整錯咗什扒，夾硬問要唔要，家人表示話係要牛柳餐，店員態度惡劣，理論後，之後再整，上菜之後就係呢個所謂價值$109牛柳餐乾到食唔到⋯似係一件薄有根牛扒⋯再加啲散件牛⋯不過吐出來果件渣實在太不堪入目⋯所以cut 走左⋯再問店員呢啲係咪牛柳⋯就話自己唔係賣平時厚身果啲牛柳⋯ 麻煩

更新版本:-點咗時菜牛肉飯＋魚香茄子飯，各自$62唔包飲品。點菜時問今日時菜有冇菜心，老闆答有。出到嚟變西蘭花😅，講句菜心賣哂就理得我老味，問題仲要淨係得4粒當伴碟咁上，西蘭花食落都成陣伴碟菜味😅，本身係為時菜而落單，肉少啲都唔介意。上枱時有問可唔可以加多啲西蘭花，老闆話"冇啦，係咁樣，加唔到啦”(大概對白），轉身便離去。點餐到出餐期間0通知，出到嚟叫我硬食你嗰4粒伴碟西蘭花。情況就好似我叫牛肉，你話冇哂然後比碟豬肉我一樣。-本身冇諗住𨳒杯凍朱，飲粉多過乜，明顯係熱朱沖完粉未融哂就落冰，好多餐廳都係咁我知，不過嚴重到攪完都仲有粉浮面就真係未見過😂攪幾吓啲冰就融哂。認真你見我喺你截單前先嚟唔想煮就唔好問我幾多位🙏🏼搞到自己間餐廳又多篇差評-總結: 老闆語氣正常，但態度差，要硬食廚房岀嘅餐而冇溝通過

呢間茶餐廳位於旺角廣華街附近，非常之就腳，原本睇個樣以為係做遊客生意，但食落都真係唔錯。晚飯自己一個人嚟，叫咗一碟瑞士汁乾炒牛河，試吓廚房嘅炒嘢手勢。一上到黎就覺得鑊氣好夠，瑞士汁都算入咗河入邊，炒嘢嚟講，我會比唔錯嘅評價，絕對對得住個價錢。嘢飲都係嗌茶記最常嗌嘅奶茶，茶奶味平均都叫幾好飲。食嗰陣時係平日嘅晚上大概7:00 ，入邊其實真係唔多人，初頭入去嗰陣時都驚會中伏，但係食落都唔錯，價錢都算合理。仲有嘅就係侍應叔叔都幾nice，見到我食牛河主動問我要唔要辣椒醬。

【油尖旺區】【金域冰廳】呢排去咗啲 trip，不過我人在外地都依然 keep 住每日出 post，撐得住。不過因為第二個 trip 其實決定得有啲倉卒，所以我都真係未有足夠時間去「儲 post」。而今日就貼返一篇好耐之前嘅用餐體驗，茶記嘅話唔會爭太遠吧。有時咁耐之前嘅話都會想食返多一次先出 post，奈何時間真係緊逼，大家將就吓。咁事緣嗰次係喺探完女僕店之後，同道歉哥喺旺角搵嘢食，冇乜選擇之下就入咗呢間。入到去發現冷氣充足，座位闊落，侍應招呼都係可以嘅。我當時唔算話好肚餓，見佢有「古法秘製菠蘿包餐」就食個 $42 嘅「金牌叉燒嫩蛋菠蘿包」，加 $3 飲「凍奶茶」。就係幾片叉燒加個炒蛋再加啲沙律菜夾喺個菠蘿包入面，只能夠講係 good try 但味道係僅屬一般嘅。而道歉哥就食 $53 嘅「酸菜豬扒公仔麵」配「火腿奄列」同「丹麥多士」加 $3 飲 「凍奶茶」，啱啱道歉哥喺我隔離所以問到，佢對個麵冇乜感覺，不過就記得件厚多士幾好食。張單夾埋 $101 又唔算過份嘅，旺角充飢嚟講。。。（地址：旺角豉油街60-102號鴻都大廈地下A2號舖）

肚餓係路邊見到呢間野，人唔係好多，入去叫左個咖喱牛腩飯同海南雞飯。首先講海南雞飯，就得個3塊雞，皮仲肥過肉，油飯得個雪櫃味，食到想嘔。叫咗杯熱華田，得個水味，比例完全唔啱，飲咗兩啖飲唔落。然後個咖喱牛腩飯，啲咖哩又水又無味，牛腩仲誇張，就得三四塊，其餘全部係牛筋，勁難咬，d肉根本無味，似白灼完就淋啲汁上去，啲薯仔顏色都唔啱，食落去仲係臭嘅。總之體驗非常差，仲要價錢唔平，第一次食就中伏，垃圾餐廳冇下次。

午餐叫咗個乾炒牛河，只得3塊牛肉。牛肉係冇牛肉味嘅，劣質嘅雪藏貨；河粉油立立。58蚊，感覺被騙，覺得好唔抵。凍檸茶，冇茶味，冇叫少甜都淡茂茂。同時叫咗一個全日早餐，普通，不過不失（嬲得濟，忘記咗影相）。 如果唔係隔離想食嘅餐廳排長龍，又肚餓，都唔會幫襯， 焗住要中伏。我可以好肯定咁講「唔會再有下一次」。 呢啲食店 ，根本就係侮辱咗香港本土茶餐文化，更加侮辱錯消費者。請唔起廚師，就求其搵啲食物執碼員砌啲食物出嚟賣。

星期一晚餐亂入😆原本諗住去食一品雞煲嘅，但胃口唔大，同朋友二人好耐無見，想坐耐啲，所以求其簡一間無咁多人嘅茶記。見佢咁少人，咁啱晚飯小菜都有雞煲食，一心試伏啦，點知都幾好食喎！好彩我地早入去（約7點），後尾都坐滿人啦！我地叫左兩個餸，$98香辣雞煲🐥 同埋 $80波蘿咕嚕肉🐷，雞煲加$20轉餐，有例湯，飲品，白飯。凍飲加$3。旺角地舖，呢個價錢唔算特別貴，食完覺得佢絕對對得起呢個價👍🏻👍🏻光頭叔叔好友善🥰🥰，特別溫馨提示先飲湯，無味精，蘿蔔雪耳湯好滋潤👍🏻本人好喜愛飲湯，諗住講笑「碗湯咁正有冇得添？」點知叔叔真係悄悄地幫我添多一碗💗💗兩個餸都好足料，肉同配料都多。雞煲我叫左少辣，真係恰到好處，唔怕太刺激會肚痛，又可淺嚐辣味。汁收得夠乾身，但雞肉沒有因此乾柴👍🏻咕嚕肉正常發揮👌🏻，不過不失，同樣肉質沒有炸到太柴，正常咁囉，又無話好juicy咁嘅。一路同朋友傾計，都有留意三位企堂都好友善👍🏻同熟客都有喧寒問暖👍🏻一啲都唔寸😂最後埋單 $204咋（$98+$20+$80+$3+$3）因為本人平時晚餐都食茶餐廳，呢個價錢都算係咁啦。原本我都無諗住打食評，不過見到樓下有篇食評話人地價錢亂加，我覺

早餐時段至中午12:00，很適合放假遲起床的大眾。價錢合理，配搭新穎任君選擇，味道也很好！下午茶選擇也不少！午餐牌更列出整個月份的彩色及配搭！給各大有選擇困難症的人預先參考。推介！大家可以不妨一試！