好佰佰

Open Now

Now Closed

由開店食到宜家，但真係愈做愈差…尤其是收銀員態度好差，帶眼鏡女人👩雖然該名店員已經離場，但餐廳水準依然沒有改善，已經比左好多次機會，好失望⋯⋯以下係我永不光顧好佰佰既感想，真係貼錢買難受。1.經常性漏單，整左焗飯要焗超過半個鐘….追幾次單都仲要對唔住都冇……2.提早打電話落單叫外賣，賣哂唔會同你講，去到先同你講話賣哂，打電話嗌定既外賣又不會預早整定，仲要等候多幾多字先拎到外賣，咁我特登打電腦嗌定晏小小過黎拎有咩意思….3.買左外賣時，隔左幾個字係到等外賣，職員唔會叫話外賣整好，要你自己問….4.下午17:45入餐廳時唔比叫下午茶，但有時候又得，但係餐牌寫18:00，寧願唔做生意…平時餐廳裡面已經冇客，真心唔明，啲職員好似想間鋪執笠咁….5.職員會呼喝客人，十分冇禮貌！完，不會再光顧😑

打電話叫外賣，聽電話嗰個完全唔知自己張餐牌有啲咩，叫Number問返我個Number係咩嚟㗎，照完晒所有嘢仲冇落餐飲，然後就話幫我落咗單，我同佢講你冇落餐飲，佢先講話你想飲咩。一開始食上菜速度唔差 但係宜家上菜速度極慢，諗住叫定唔洗係下面企點知會遇到啲咁嘅情況

火炭屋村商場內嘅茶餐廳，環境都幾舒服，乾淨光猛，下午茶時間都好多街坊幫襯。$40左右就有一個茶餐，仲有即叫即炒粉面飯，包埋嘢飲，所以遲少少食午餐，都好幾着數，真係平好多呢！星洲炒米$39份量都幾大碟，味道少少辣，夠晒開胃。米粉炒得夠乾身，味道抵讚！欖菜肉鬆炒飯$39炒飯同樣吵得乾身爽口，飯嘅口感唔錯，茶餐來講份量都算多，食完都夠飽，呢個價錢真係抵食。瑞士汁雞全翼只需另加$10加$10油嘅小食，雞翼都幾入味，啖啖肉正。熱奶茶港式奶茶係我嘅至愛，茶香濃，奶茶質感都夠滑。凍奶茶凍飲加$3 ，奶茶味道好。

燒鵝叉燒雙拼飯 $48想啖啖肉咁食，加咗$18轉鵝髀。燒鵝髀皮脆肉滑，一陣油香喺口內爆發，之後會咬到滑溜嘅我俾肉，肉香同油香喺滋味無窮，$18加得好值得！叉燒外層燒到有焦糖嘅甜味，肉質十分鬆軟，仲一啲都唔肥膩。叉燒脂肪平均，每塊都厚切上碟，分量十足。星洲炒米 $45配菜有蝦仁、火腿、叉燒、蛋絲，炒得夠鑊氣。落油唔多(食完碟底無油)，米粉鬆身唔會炒到結塊，乾爽彈牙好味！金磚四國西多士 $30 炸完上碟依然挺拔厚身，唔會扁塔塔，食落口有回彈。中層香口粗粒花生配幼滑花生醬，甘香又有口感，難怪係熱門之選。

琴日去火炭工業區拎代購左既product，順便係附近食個午餐，見到駿洋商場係附近就順便入去搵野食。海南雞油飯海南雞比左雞髀位同雞胸位，雞髀滑嫩，雞胸唔鞋肉，油飯唔會太油，不過軟番少少會好d，配3個醬：薑油、黑醬油同酸辣醬汁，我比較喜歡酸辣醬汁。豬扒蟹黃麵餐（常餐）豬扒夠大件，蟹黃麵比平時食既開出前一丁幼身d，淋身d，另附上麻油包，麻油好香，感覺冇甘膩。火腿醃列比一般大份些，厚多士正正常常。見附近客人都叫燒味黎食，但我地唔想配飯/麵，所以叫左燒味雙拼。估唔到例牌都甘大份，燒腩仔肥瘦均勻，大約有四層，咬落有肉汁，皮都幾脆。另外叉燒好juicy 多汁，肥瘦適中，不會太瘦。

因為去咗火炭做嘢，一時已經晚上9:00， 匆匆揀了間茶餐廳食晚飯。有幸2選一揀中E間。地方清㓗，老細員工都又nice 又有禮親切。老公話消魂叉燒飯十分出色！我唔想食豬扒又想食茄汁焗飯，老闆主動提出可以轉，令我喜出望外！如果開一間咁優質嘅茶餐廳喺公司樓下就好啦！

#好佰佰位於駿洋邨商場裏面，呢面嘅屋村同商場都係新開，環境光鮮企理。門口已經可以見到整齊嘅燒味，燒鵝燒到脹卜卜。忍唔住叫咗燒鵝髀瀨粉試下啲燒味。髀位+18就有，都幾相宜喎。皮脆，咬落去爆汁，鵝肥美，油脂真係好邪惡。瀨粉都多，整體係大件夾抵食。下午茶時間試埋瑞士雞全翼撈出前一丁，麵煮得岩岩好，好爽口，我好鐘意食呢隻麵質。加埋微甜既瑞士汁，三扒兩撥就食晒。金磚四國西多士，貨如其名，有四舊正方磚西多士，賣相好吸引，外脆，麵包軟熟夾埋有顆粒嘅花生醬😇，配埋牛油同糖漿，完美。

新開餐廳門口不算大， 但係入到去好闊落今日超熱有成35度！好在冷氣好夠坐一陣就涼晒樓底幾高又夠光線， 坐落都幾舒服$30 金磚四國西多士 +$5 紅豆冰（特飲）間間茶餐廳下午茶都必定有西多士但有特色既西多士就唔係間間有仲要整得好食西多士上碟有4粒雖然唔係好大件但件件都好厚身中間用左略帶咸味既粗粒花生醬 更突出花生味比起平時食開既甜味更正同有after taste特飲紅豆冰既紅豆都煮得幾好 椰味正常幾好飲另外叫左個$38吉烈豬扒配薯條塊豬扒夠大塊而且不太厚粉薯條夠新鮮岩岩炸好隔離枱4人全部叫$20叉燒瀨粉份量唔係太細但下午茶嚟講岩岩好上Openrice 見人話呢度燒味都好味，下次tea 可以試下另外走時都見到有特價$3x 外賣餐，幾經濟實惠

如果要數高質嘅茶餐廳，呢一間絕對唔可以錯過。火炭嘅呢間港式冰室，主打親民價錢之餘，出品一樣高質素。就算係自己一個人嚟食晚餐，一樣食得好滿足。見到呢一個晚飯西式套餐，special set dinner之後完全就唔使考慮，因為入邊的配菜值庭非常之啱心水，佢嘅A餐西式全餐，包括法式烤羊架拼鰻魚，羊架熟度啱啱好，而且肉味非常之鮮。食落去啖啖肉好有口感。佢哋嘅鰻魚同樣好大塊豐富又足料，簡直好滿足。環境方面坐得好舒服，配埋甜蜜紅豆冰，消暑又解渴。

今日經開火炭，想食個港式早餐，發現駿洋商場新開左好多新餐廳。睇menu發現呢度啲早餐睇落好吸引，所以就入左去就叫左個牛扒一丁早餐。呢度嘅早餐都幾大份，估唔到牛扒都幾大塊，出前一丁就一向係我至愛！炒蛋好嫩滑，原來呢度係用日本蛋，唔怪得知咁好味🤪跟餐多士我改左做奶油豬，不過奶油豬如果可以更脆更厚就好喇😝 夏日炎炎，餐飲加埋杯紅豆冰就perfect 喇😙 呢度早餐嘅選擇都好豐富，住附近嘅街坊們可以去試下

今日去開火炭工作，嚟到駿洋商場附近，搵到間幾高質嘅茶餐廳，好佰佰～我order咗個豬扒蟹王面，幾抵食，連埋大大份嘅火腿奄列同奶油豬都只係$45，性價比高！仲有蟹王面，面質滑溜，豬扒超大塊，煎得香口，又juicy, 入口鬆化，剪開方便食，貼心～另外，朋友揀嘅鐵板餐都好正，7成熟嘅西冷牛扒，切出嚟真係仲有少量粉嫩顏色，有咀嚼感，啖啖肉，質感嫩滑～跟餐揀咗薯條，即炸薯條熱辣辣，脆卜卜，good!餐飲凍檸茶，茶記質素👍🏻～

假日同老公去火炭睇樓，行到攰攰地就黎到駿洋商場揾食，被呢間餐廳掛在廚窗的靚燒味吸引咗入去。🐖 燒味雙拼（叉燒和燒肉）$88叉燒和燒肉都燒得好入味，肉質有肥有瘦，不過個人比較喜歡佢地嘅燒肉，皮脆肉嫩，好似食緊燒腩仔咁，但就無燒腩仔咁肥，亦唔會過鹹，味道醃得啱啱好。🐠 鰻魚煎雙蛋飯 $60兩隻太陽蛋都煎得好靚，撈飯食一流。鰻魚肉質厚身，鰻魚汁調味適中，甜甜地幾好食。🥤凍奶茶（$18 單點）和 ☕熱奶茶（$6 跟餐）可以唔洗落晒成包糖都夠甜，冇任何澀味。

今天在火炭區工作，跟同事到了鄰近嘅新屋邨- 駿洋邨商場，一起午飯，剛剛到了下午茶時段。茶餐廳選擇非常多，我哋分別叫了一個炒烏冬及焗飯，只需加 $5 就可以有一杯特飲。我叫了經典紅豆冰，朋友叫了凍檸檬菜蜜。干炒沙嗲雞絲烏冬 $39有雞蛋絲同芝麻點綴，看起來很有心思；份量非常大，單是烏冬都有兩個飯碗嘅份量，而且配料非常之多種類：蔥、芽菜、紫洋蔥、雞柳、雞蛋絲、芝麻、韭菜、白洋蔥，絕不馬虎，正因如此，口感豐富，味道的層次感也提升了。葡汁焗雞扒飯 $40同事這個雞扒飯份量也非常大，先看配菜，有好多拉絲芝士，雞扒也很大件，其他配菜有洋蔥、薯仔、紅蘿蔔，葡汁味道有好香嘅椰子味。至於個飯係炒飯做底，令到這個焗飯非常有鑊氣！凍經典原味紅豆冰   茶餐加 $5我覺得這個紅豆冰好好味，唔會太甜，又唔會太多冰溝淡了味道。怪不得叫「原味」紅豆冰！凍檸檬菜蜜    茶餐加 $5朋友說檸檬唔苦，甜度剛剛好，冰的份量也非常適中。真想不到火炭屋邨裡會有一間有質素的茶餐廳！

今天跟朋友遠足，深探搖斗坪、河瀝背，由火炭駿洋邨起步，經搖斗坪、河瀝背、大埔滘，走到大埔的四色林為終點。既然在駿洋邨出發，友人已找好了資料，這裡的商場有好幾家茶餐廳，正好相約一同吃個早餐才起步，而當中以「好佰佰」的風評最不俗。由於駿洋邨都是新入伙的，所以，這裡的餐廳都比較新簇，而走進「好佰佰」，地方寬敞，環境闊落，以茶餐廳而言，環境非常之好。翻一翻餐牌，如一般茶餐廳，甚麼東西也有，來到吃早餐，重點就自然落在早餐部份。款式有早餐全餐、中式早餐、西式早餐、湯麵餐、扒餐及三文治餐，大致定價於$27-$36，都是相宜。因為稍後是體力大消耗，所以，這頓早餐要豐富一點，就點選了「早晨扒餐」（$36），香煎牛扒配太陽蛋、芝士腸，牛油多士轉奶油豬（+$3），凍檸檬茶（+$3）。牛扒十分軟腍，配了洋蔥汁，是茶餐廳的典型牛扒質素，太陽蛋煎得剛好，除芝士腸，還有一份牛油粟米粒，而奶油脆豬亦烤烘得外脆內軟，檸檬茶茶香少甜，很好喝，這一頓確是非常豐富的早餐。飽餐一頓，自然夠氣夠力，原來今日這段路不易走，幸好吃了這多麽豐富味美的早餐。

火炭工業區入邊有好多新開嘅茶餐廳，今次見到呢間環境幾光猛，望入去有幾乾淨嘅餐廳，於是入去試吓佢嘅午餐。餐牌見到好多食物款式，午餐$40 就有，同時又有燒味飯食，選擇夠晒多。魚香茄子飯$42茄子做得幾靚，味道也唔錯，魚香茄子係超正撈飯必食之選，份量多多，呢度嘅午餐唔包飲品，如果飲熱飲加$6 ，凍飲加$8.極上叉燒煎雙蛋飯$48呢個係食店推介嘅食物，叉燒唔會太肥，味道醃得好好味，而且都大件厚切，啖啖肉嘅口感好正，蛋嘅顏色好美妙，好味又飽肚嘅地道選擇。