港里餐廳

Open Now

Now Closed

行完大埔要醫下肚😋揀左依度😃望下餐牌有乜嘢食😝勁多選擇👍最後揀左涼瓜豆豉鯪魚炆米同怡保芽菜走地雞飯🤪等左一陣送上兩碗中湯👍係合掌瓜紅羅白😅d湯夠熱也清甜, 之後送來涼瓜豆豉鯪魚炆米😆見到個名同配搭未見過於是叫來食, 又幾夾喎👍炒得好乾身同好味😙 d米粉又唔會好碎😘 涼瓜都唔算好苦, 如果豆豉鯪魚再多番少少會更正😜, 份量一般但都足夠😙男士就可能差少少😄再之後送來怡保芽菜走地雞飯😃d飯唔係白飯,係加左d汁😙😋不過唔係咸😆再食d雞好滑唔肥, 面加左d炸蒜😙底亦墊左d肥芽菜🤣整體味道唔錯, d雞食落有咬口👍唔會有雪味同勁淋👍之後來杯熱杏霜👍好濃味又夠熱😚服務招呼充滿熱誠😜😜小店值得支持, 60多元包飲品同湯都算抵食了🥢

海南雞皮咁深色真係第一次見 睇落 食落都唔係海南雞 講真茶記 冇乜要求 我都想食到餐牌上有既野姐做乜比隻豉油雞定燒雞我........雞下面再送條毛🙄68蚊真係唔該哂無奈...

今日在大埔舊墟街市，看見一家比較新淨的茶餐廳，所以進去試試看，叫了一個海南雞飯（有骨），雖然海南雞和醬汁都不算好正宗，但是雞味道不錯，份量也可以，另外叫了即煲蕃茄濃湯鮮牛肉通粉，好大份，味道一般，叫了一杯凍檸茶，味道不錯，另外叫了一杯凍奶茶，味道淡了一點，牆上餐牌是港里冰廳，帳單是港里餐廳，外賣袋上列出三間分店，大埔是港里餐廳，佐敦兩間是港里冰廳，餐廳的裝修和地方都不錯，應該是開業了不久，會再光顧

尋日要去大埔墟街市附近買嘢，所以去咗大埔墟食午飯，見到呢一間餐廳，選擇好似好多元化，所以入咗去試吓。我哋揀咗尖椒回鍋肉午餐，同埋常餐蕃茄牛肉通粉配多士奄列。常餐蕃茄牛肉通粉好快就到，味道偏甜，整體OK。多士奄列就偏薄，但係味道都係正常嘅。尖椒回鍋肉午餐，好彩係冇汁，因為我好怕有好多芡汁嘅飯。味道夠辣，尖椒都多，但係回鍋肉肉質好嚡，味道正常，但係咬咗好耐先咬得開。熱鴛鴦，凍齋啡，味道正常。好好味就講唔上，只係正常味道，不過佢有好多位唔使等位，如果趕時間係一個幾快嘅選擇。

不用等位，以為好既開始，點知落錯單，食物飲品竟都可以錯，遲遲又唔跟進，三催下先換到杯野飲，早餐都幾難食，早晨全餐既煎薯餅太多油，菜唔新鮮，又比少左牛角包，不會再幫襯。

平時買餸經過，見到常餐都想去試。可惜$55實在有啲貴。今朝早行開大埔墟，咁就去食個早餐啦。咁就叫左沙嗲牛通，加$3轉左牛角包，同埋叫咗杯凍齋啡走甜，咁叫就$45。牛肉薄切唔奀，但係個沙嗲汁係無沙嗲味。感覺就好似一個普通嘅老抽生抽汁。雖然見到有蒜蓉粒應該有炒過，但係都係嗰句冇沙嗲味。反而個滑蛋有蛋香，牛角包亦都好鬆軟。咖啡都冇乜驚喜，完全冇頂到眼瞓嘅感覺。如果唔係早餐嘅話，常餐性價比其實都幾低。不過佢啲牛肉唔奀已經贏咗對面街嘅喜喜。

今晚一行三人去食飯，叫咗三個餐，主餐牌上有無骨海南雞飯，但叫餐時侍應話只有有骨海南雞飯，黎到都好大份，但啲雞仲有血，啲骨多過肉；另一個係蜜汁薯仔牛柳炒飯，個賣相都ok，但食落去啲牛柳好韌，完全咬唔入，個炒飯痴立立，炒得好差，不如俾個白飯好過！鐵板肉眼扒，完全冇牛味，無哂沙律菜，俾左新菜加芝麻醬，但啲菜好老，見到唔想食！我哋三個人每個餐食唔到一半就放棄左，估唔到咁大間餐廳，叫三個餐，三個餐都可以咁難食，真心無下次！