樂都堂水 (Closed)

心血來潮想食糖水，買左一碗綠豆沙（$25）同埋一碗紫色牛牛（即芒果芋泥紫糯米）（$40）。返到屋企一打開，碗綠豆沙得三分之二碗，味淡如水，甜味都欠奉，真心有啲嬲，連咁基本嘅野都可以做得咁差。碗紫色牛牛亦非常不濟，食到芒果皮。

今日約左去朋友會所玩，行出屋苑見有間「堂水店」不妨一試啦！見餐牌選擇不多，但就主打糖水，睇左一陣先睇得明咩叫膽拖糖水🤭🤭🤣膽拖自選糖水原來膽拖即係先要揀一款主要糖水，然後就可以揀多款唔同配料咁解。。。我點左紅豆沙配湯丸，芋圓，桃膠，芒果同雪燕。紅豆沙唔太甜，非常起沙，有古早味；芋圓一睇就知係手工，口感唔夠Q,但就食得出原汁原味；雪燕口感非常正，好似燕窩，仲拉得出絲添；桃膠有煙韌口感，微甜；芒果正常；湯丸皮薄，芝麻餡味道唔錯喎。一次過食到咁多樣野好滿足，不過一個人食就真係會太飽，早知足埋個Friend黎食。

網上得知「樂都堂水」試業，專誠入去元朗試下。食咗個每日限量供應嘅「招牌堂水」，入面係有雪燕、桃膠、紅棗、圓肉、杞子同北海道3.6牛乳嚟煲，見到啲材料都feel到好滋潤又好香噴噴。(另外仲有個都係每日限量供應，用日本新潟米嘅「台式魯肉飯」，都幾好食！)而且最重要係聽老闆娘講佢哋啲糖水都係用咗依家好興零卡路里＋純天然嘅「稀少糖」嚟煲，好食又健康，真係食多兩碗都唔使驚啦！不過可能始終剛開業，有唔少嘢未準備好，嘢食等得耐咗少少，但應該之後會好啲，整體嚟講係唔錯，下次可以再入嚟食。

平時都有去樂都冰室食野，不過尋日見到佢地夜晚變左做堂水店。反正收工未食飯就去睇睇有無野啱食啦！花膠雞飯超多花膠，菜硬左啲，花膠口感非常好，汁嘅味道都好足，而且哩個飯性價比超高。好大個飯，不過個飯係日本米，係好食嘅，但係份量覺得太多。。。元朗中翼原來係好似B仔翼尖果隻味嘅中翼，不過中翼食起黎啖啖肉好味啲！辣味同蒜味都足，而且隻雞翼都好大隻。最後。。。就係因為個飯太大個，食到我飽左，試唔到堂水，唯有下次要試過啦！