龍順軒海鮮酒家

Open Now

Now Closed

野食ok,但我覺得佢係一間伏店，同服務真係差到貼地，我同媽2人來飲茶，佢有點心拼盤（6款點心，各有一件），同超級孖寶，當你同時揀點心拼盤同超級孖寶時，即係8樣點心，佢會自動變成4個超級孖寶，叫左佢經理出來傾，提議改善下張點心紙，佢既回應真係絕，佢話開業到而家都無問題，吾覺得要改。第2，鮮蝦菜苗餃當時做13.8,佢收我中點價錢，我問有無分別，佢話一樣，係我地做客既吾睇清楚，畫左正價紙，間間酒樓都係甘，我當時未結賬，佢既態度就係話你知，你自己畫既，就算未比錢都無得改，係你抵死。本來只係想反應意見，佢地既態度真係令你想殺人

2點15分入座，原本2位被安排坐在4人枱，本人但告知會加人，坐下2分鐘帶2位再帶2位想要搭我枱，我講我會加人佢立刻在單上加人頭，態度極差，本來個場就有枱，而家咁都要夾硬搭枱又無隔板實在係離譜，坐2點到45分突然有個女侍應行過來攞走我枱上所有點心紙，我問佢點解攞走我未點完，佢話3點半截單，我反問點解3點未夠攞走先，佢即黑面丟1張點心在我枱上，實在係赶客，我唔會再去食了，實在態度太差

野食係好好食 但次次嚟到都受氣3點前好多野都已經無哂一落單就話：要啲咩就落晒佢啦 (意思唔俾你加單)啲員工3點半前就熄燈 比張單你埋單趕你走見到無水唔會幫你斟水 個個都等收工 黑口黑面過左3點半 個高大肥男員工企係隔離啤住仲食緊野既客其實疫情關係有工返已經好開心難道老闆請佢地返嚟趕客？唯一最好最勤力係送點心姐姐得佢一個做野 有笑容

今晚又黎左飯堂，但明顯臨近母親節啲野食加左價，今晚我地一行5人食左$866蚊。當中有一隻即燒寶貝乳豬，秘制欖角骨，鮮蝦荷葉飯，迷你海皇冬瓜盅，薑蔥魚腩煲。首先講下隻乳豬▪的確係新鮮熱辣，超脆仲要唔肥。秘制欖角骨▪好惹味好夠鑊氣超正。鮮蝦荷葉飯▪超級差好似食白飯咁濟，無乜餸。迷你海皇冬瓜盅▪呢個有驚喜喎，無諗過竟然可以裝到8碗咁多，最重要可以消暑。薑蔥魚腩煲▪今次比之前好，無乜腥味，仲記得有次係超腥。其實近住假日節日出街食飯真係好唔抵，無啦啦又加左價少左優惠，無左乳鴿送T,T鳴~

哈哈~~~又到飯堂開餐喇!!!平時會黎飲茶多，如果阿姨唔想煮我地都會黎呢度晚餐，今日一行10人食左個套餐▪原隻即燒寶貝乳豬▪上湯焗波士頓龍蝦伊麵▪碧翠炒花枝蚌仁▪黃金百花凰尾蝦▪金湯海皇燴生翅▪蠔皇金瑤鮑螺片▪清蒸大沙巴龍躉▪招牌脆皮燒雞▪瑤柱蛋白炒飯▪賀壽蛋黃蟠桃▪精美甜品送左6隻乳鴿(近排優惠，每人送半隻)我地雖然得10個人仔人女，但由於叫左12人圍餐，所以照送多隻。講真丫，咁多野點會食得晒，結果我拎左個蛋白炒飯，第日返公司做午餐!!!!!其實一班人聚埋一齊，純粹都係為左開心聚下，熱鬧下咁既啫~~~~

今日大老板請所有同事食開年飯，揀左呢間係兆康苑對面欣田邨嘅新酒樓，新年大吉大利，試新嘢酒樓周圍環境很乾淨光猛，碗筷整潔，第一印象，有得食梗係開心，食得特別落力蝦餃、燒賣、粥粉麵飯等例牌點心，款式大致相同，味道👌，我覺得最好食係菜苗餃，D蝦好新鮮，反而D腸粉好厚粉，好實，由於係屋邨嘅關係，價錢合理，做街坊生意，咁先多人幫襯架！我地可以多一個飲茶地方嘅選擇，有競爭先有進步！咁我地班同事梗係要多謝大老板先，雖然都係飲下茶、食下包、吹下水呢D普通嘢，但我地個mood真係好高漲，3圍喎，每圍6xx元，多谢哂喎

欣田邨開了間新酒樓，星期日下午茶來試下，2pm來到人不是太多，不用等位，我們坐的枱剛好有太陽照了入來，好舒服又寫意。環境也幾好看看點心先點了上湯鮮蝦水餃，五大粒，夠熱，水餃足料，有蝦，木耳，豬肉，好爽甜，仲有生菜。豉油王龍鬚炒麵，碟炒麵賣相吸引，份量不少，有葱，韮黃，芽菜，蛋，麵係幼身的，好好味呀，好多魷魚鬚，彈牙鮮甜。糯米卷有四件，不是白色冇料的糯米，而是淺啡色有花生粒的，軟淋淋好味。蝦餃四大粒，全部是蝦，夠爽，皮也夠薄抵食鯪魚球，十分大粒，有三粒，好豐富的口感，有馬蒂，葱粒，蝦米，鯪魚唔腥，唔會有好多粉的，下面有些腐皮。價錢抵食，又好食，又夠熱。