Mad Time Studio (Closed)

話說搵散水餅搵咗好耐都揀唔啱心水，無意中竟然喺美居搵到間格局好特別嘅甜品小店。訂咗打小貝殼做散水餅，好有驚喜！就算唔係熱食個口感同味道都好好。有啲同事唔鍾意食甜佢哋都覺得好好食 甜度啱啱好🥰 拎餅果陣店主仲好好專登留一粒新鮮滾熱辣嘅柚子味喺焗爐拎出嚟俾我食 一試難忘🥹。柚子味好香，蛋糕好鬆軟，邊邊有少少脆口添。更加欣賞係睇得出店主好用心整蛋糕同對客人有同理心🫶🫶 期望更多人認識呢間小店，會再推介俾其他朋友幫襯！！

買左粟子年輪過平安夜🧑‍🎄好好味-唔似市面大部分樹頭蛋糕🪵端士卷加個聖誕牌就係Xmas 樹頭🤡同睇得出蛋糕好多detail位有用心😍年輪本身厚實一層層❤️然後啲裝飾又真係似番樹既本身😂又靚又好食😍見倒有金色閃閃有raspberry 既醬癡住啲菇同其他裝飾😍好有驚喜

難得同好朋友聚會，其中一人係特別鍾情🍋味嘅嘢，見之前嘅食評讚呢度嘅檸檬撻好食，所以一見到就毫不猶豫要訂。聯絡甜品師傅預訂，溝通各項都好迅速及友善👍🏻朋友們大讚個撻好靚好好食，連我呢個一定唔會以檸檬撻為首選嘅人都覺得好好味。味道好細緻、酸甜感又平均得好好，面頭嘅蛋白脆餅唔會過甜又增加咗口感。 朋友食完都問我喺邊買😂仲有！請甜品師傅寫字牌，寫得好靚！佢幫我加咗個"👍🏻", 令我同朋友覺得真係"超正" 呀😊補充：其實拎甜品當日早上出咗d意外聚會被取消，臨時請甜品師傅幫忙，對方都不介意幫忙配合，所以真係好感謝佢🙇🏻‍♀️

以前經過啲買零食嘅鋪頭，會買好多朱古力產品，其中一樣係朱古力brownie，嗰時以為brownie 只係啲合裝零食先會有，完全唔知新鮮焗出黎會係點，可能大家都知道，只係我太愚昧😂😂，最近屋企附近開左間神秘鋪頭，啲街坊個個都話唔知佢賣咩嘅，咁我就走去八掛下，原來蛋糕店黎嘅，當中一款係朱古力brownie，即時雙眼發光😍😍😍，即時買左一個番屋企，佢地係即時制作出黎，雖然要等成45分鐘，但非常值得，鋪頭姐姐教我如果番屋企嗰時凍左，食嗰時可以將佢加番熱就得，朱古力味勁濃，唔會好甜，暖立立，又軟熟，又大件，最後我唔得一次過食曬，分左3日去食佢😂😂😂下次試下其他先

終於黎到依依不捨嘅時候，要離開一班對我好好嘅同事，所以特意揾一啲禮物送比佢地，開頭都唔知送咩好，但同朋友傾計，係佢地口中話不如買散水餅，請大家食，又簡單，又可以表達心意，跟住上網揾下，見到呢間小店，話可以做散水餅，就打去問下，佢地都有耐性答我問題，😂因為我係問題少女。佢地比左幾款我揀，有馬卡龍，小貝殼蛋糕，曲奇，我揀左曲奇，咁講左我大約想點整，我希望多謝同事，所以叫師傅寫左Thank you 上去，去黎效果好靚，啲字係人手寫，每一塊寫上去，真心覺得好用心，多謝你，同事見到都好鐘意，又覺得好食，下次朋友生日，再黎買蛋糕😋😋

媽子生日，知佢唔鍾意D勁甜又多忌廉嘅野，又想要特色D又唔能夠太花巧，上網揾下先🤫記得舊年聖誕party，有同事買左個栗子大泡芙，大家試完都覺得正，用料十足又好聖誕feel，原來係公司樓下地牢嗰間隱蔽又神秘既蛋糕店，經過幾次都唔知佢賣蛋糕。最近發現原來佢搬左上地面，仲好吸睛，黃白色嘅門面，走工業風，又係要走埋去至會知原來賣蛋糕，哈哈，有性格！一於响度揀個生日蛋糕，最後同呀妹商討一輪～.百里香檸檬撻～因為我地係檸檬撻粉絲😂當然媽子都鍾意檸檬味嘅野啦！講番個撻，佢用左百里香襯檸檬，又真係幾特別，出面多數都係最基本同正常嘅～檸檬撻，唔會有咩驚喜，但今次依個係impress 到我地，酸甜平衡，有淡淡香草清香，上面仲有燒蛋白，蛋白脆餅，糖煮檸檬（估計應該係自己煮），加埋幾條百里香作裝飾，簡約大方；而撻底仍然keep到鬆脆，真係好難得，我地三個女人好快已經KO左😆好難得的特色小店，食得出佢地嘅用心，下次試埋個檸檬蛋糕VERY LEMON先😋PS 師傅手字好靚，完全錦上添花

住深水埗呢頭, 行過美居中心一條間唔中行嘅路裏面, 見到間新開嘅蛋糕店, 門口裝修得幾靚, 上面有個燈箱仲會每日有唔同字句,諗諗下個朋友就黎生日, 咪行過去睇下, 鋪頭話可以預先訂制自訂款式, 咁咪求其試下, 我朋友成日都好意講{啱呀}呢句說話, 咪叫鋪頭幫我發揮下睇下點整, 鋪頭都應該好有經驗, 問左我幾個問題, 大約知我想點整, 我話唔使點立體, 簡簡單單, 一班朋友見到會笑, 開心就可以哈哈, 到我攞蛋糕嗰日, 我收到鋪頭SEND比我張相我即時笑左出黎, 岩哂心水, 個樣成個我朋友咁, 勁攪笑到切蛋糕生日嗰個同成班朋友見到都好開心, 好攪笑, 大家都話蛋糕好多,  一個好好嘅體驗, 正!!!!!下次再幫襯~~~

最近經過長沙灣美居中心附近，諗住揾個位坐下，但又唔想入餐廳坐，咁就行左入去美居中心中間有個位，有個水池嗰度坐左陣，坐低左後，見到隔離有間應該新開張嘅鋪頭，幾顯眼，佢用左橙黃色做左個類似貨櫃嘅做形嘅門口，細細間，遠睇唔知佢賣咩😂，走埋去八掛下，原來係做蛋糕嘅，門口仲好得意放左個粉紅色又係貨櫃做形嘅display箱仔，裏面放左幾件蛋糕，覺得好精緻，好靚，好似好好食咁，跟住本來只係想坐下嘅我，最後買左件蛋糕黎食，但估唔到有外表之餘，食得出係用心做嘅蛋糕，比我撞到呢啲小店，都幾好彩，所以決定寫食評讚賞一下，加油呀

每次要買蛋糕都會幫襯mad time 因為chloe 真係好比心機整 甜度可以同chloe傾去調教 蛋糕既設計都可以加自己既意見 今次買左brownie食 甜度適中 我喺微波爐叮30秒先食 brownie 外脆 內有朱古力流心 如果唔覆熱食 喺雪櫃攞出黎之後 放15分鐘先食 brownie 會軟身啲

果次訂開心果蛋糕幾難忘外型佈置有層次，唔係一般連鎖店買到既賣相，一拎出嚟大家會研究一下🤣味道唔係死甜果種, 清清地有小小果仁碎, 口感豐富, 難得有蛋糕可以一次過食兩件, 一家大細有小朋友又有老人家, 大家都食得好開心，係一個食完會有衝動寫食評既體驗