萬利小食店

Open Now

Now Closed

放工經過附近,見離逺已見幾個人吃緊魚旦,心思思便買了串辣嘅牛栢葉,6元。係好爽,份量0k,食呢D嘢,個汁好緊要囉,好明顯佢個辣汁加咗好多水溝稀晒,比咗$,從個碟攞起串牛栢葉,D汁勁快滴落地就知啦!味道就只嘗到食完成個口都好辣,仲好口渇,辣魚旦都無興趣吃了。或且下次會試車仔麫,因咁多好評!!

男友咁鐘意食車仔麵, 梗係唔少得嚟呢度踩場啦~佢有佢食車仔麵, 我有我食$5四條腸粉一食....哇!!!好好味呀!好軟滑, 又多, 一d粉味都冇, 加埋麻醬芝麻豉油甜辣醬, good~仲有燒賣, $5四粒, 又係唔錯, 唔會淨係食粉咁~一定有下次~!

昨晚同個朋友去左呢間度食車仔麪, 都仍然好好味, 不過落了太多辣了, 所以有點唔好咁好的感覺, 反而我的朋友就唔係咁鍾意喇, 佢話冇乜味喎, 只有辣味而蓋過其他的味, 而雞翼尖就好好味, 而我就覺得魚肉就好味 d , 不過唔好食碗仔翅, 反而呢個就麻麻地喇, 另外係綱上介紹的腸炒只加咖哩汁, 呢個反而唔好食, 都係食返原味的應該會 ok 的, 至於服務態度都 ok 既.

叫了個四餸車仔麵$23，餸每款$4.5，麵底$5(烏冬等要$7)豬腸、豬皮、魚蛋、韭菜，四款份量都少，味道無甚突出，食完都不飽。再叫了腸粉$5四條、栢葉$6、水魷$6覺得最掂的是腸粉-幾滑，栢葉-夠淋，水魷就平平。

紅叮放工，因為有點東西要買就去大埔中心～去到萬利小食店～不禁地叫了一串辣魚蛋食，一串只有五粒，很細粒，～但一咬，辣味十足～食到有點汗～這是我想要這樣辣，再辣一點就更理想４。５元一串唔貴，街邊小食來說我最喜歡魚蛋～不錯不錯～

魚蛋+司華力腸+牛百葉~20蚊加送多汁成碗外賣返去撈飯食!好食過波仔飯多多聲超級推介司馬力腸呀~~~~諗起都想食!正到爆炸!!

之前返工有時都會黎買下車仔麵, 通常都係食雞尖蘿蔔米佢d雞尖炆得好林好入味,蘿蔔冇渣 ,加埋個沙嗲汁 ,正!!不過個沙嗲汁都幾辣下,,有次我叫多汁,搞到一路一食路流汗 = =聽fd講佢d牛根丸好正,,下次有機會一定要試埋

入大埔探阿婆，未食早餐，於是去萬利買碗車仔面。原本考慮去文太興，但有感於萬利應該比較乾淨，所以最後去了萬利。要了3餸加個河粉。豬腸：有嚼頭又不會過韌，頗入味魚旦：我的至愛，細細粒又實實地，好正豆卜：只有兩粒，不太突出，所以將一粒轉贈阿媽。河粉幾幼身，很滑。湯底麻麻，不是什麼正湯，好像是味精+ 水+鹽整成的，有味精，所以食後好口渴。但總算經濟，3餸加個河粉都唔洗$20。

萬利個位置極好，係正巴士站+投注站隔離，所以好多人食下魚蛋買個腸粉拎走。不過其實佢d車仔麵真係算唔錯，依家推介下d食物先：翼尖：係真係有鹵水味既翼尖，有成6隻又唔會好飽肚，係過口癮既最住選擇!!墨丸：有中上水平，起碼彈牙有口感，味道不俗!鳳爪：我比較少食，不過朋友就多數會叫，因為夠大隻飽肚，而且係個湯到淋淋地容易入口。湯底唔係咩靚湯，不過咸咸地唔會太濃味算係完成佢既任務，食得辣既加d沙嗲醬應該有驚喜。衛生情況可以接受，鋪仔細細唔會成日有人打掃，裝潢應該唔能夠用靚去形容，你讚佢一句實用主義都得既。價錢$20左右，可以同朋友share多碟腸粉就岩岩好，一個非常港式既豐富午餐就咁達成!

大概我同女友每個月都會係呢間車仔面店食一次好食慳錢飽肚一次過滿足你3個願望xd特別推介魷魚, 雞翼尖, 豆卜+ 小辣(基本上小辣已經好夠...)到底點解...我地個個月都黎食...慳極... 都仲係咁窮既? >_<|||

在附近小食店,萬利生意真的不錯,人流不絕,應該錯不了罷!店子不大,總算有三數卡位及兩張圓檯,檯與檯之間是窄了點,但地盡其利,是香港店舖的特色,卡位於我而言是逼不下,還是圓檯自在一點.不想太飽,就選取幼麵配豬腸,水魷及生菜算了.豬腸中的膻味是輕了點,但鹵得入味而且夠淋,不是最好,但算是合格,但水魷就怪了點,比坊間作透明狀有所不同,而是比較深色,但口感卻沒太大分別,加點腩汁及沙嗲醬又幾難唔'野'味.難怪口碑咁好

都幾唔錯架d小食，唔算平，但真係唔錯囉!!入面有得坐&食囉!!魷魚最好味，醬汁幾唔錯，可是有時唔夠熟囉!!腸仔幾香幾軟，魚蛋都ok!!環境就麻麻啦....dirty d!但係幾快架~

剛在門前的巴士部下車，就在測試腳骨力前先加點能量，這裡堂食是自助式的，自選了幼麵、生菜、魚蛋、雞腳合共一碗十四塊半的「檔仔麵」。湯底是頗深色的，但喝入口又不會過鹹，麵質爽口，生菜邊雖有點微黃，食時也可吃到菜本身的爽甜味。餘下的是粉質魚蛋，弄出來也有彈牙口感，而那兩隻被浸得皮開骨列的雞腳，入口不用牙咬也即時支骨分離，整碗麵最可取之處是吃完不口喝，ok啦。

食左Ｎ次的萬利～真係每一次都無令我失望過！推介車仔麵～１１元２個餸咋！其後都係加３．５元一個餸左右～真係食過咁多間覺得最好食呀！不但湯底濃郁夠味～而且配料亦不賴！每次都會必點牛腩，因為它出品的牛腩唔會太大舊（岩哂我ｄ女仔食），而且勁入味～有時附送埋既牛筋都不錯～加埋腩汁在湯底裡更加會食到耳仔郁～雞翼尖都係唔可以錯過的一款，滷水入味之餘又冇雪味～值得一讚！另外辣魚蛋、蘿蔔、菜類都不錯！我朋友就喜歡吃豆卜，因為有ｄ鯪魚肉餡幾好食（好似係，唔係好記得．．）至於麵類方面以前就鐘意食河粉，而家就鍾意食油麵～另外５元腸粉都係可以飽肚的選擇～花生芝麻甜醬豉油有齊哂～味道交足功課～都唔錯架！！總括黎講呢間野真係好抵食～二十元有找真係可以食到你捧住個大肚ｄｕｍ走～黎到大埔一定要試此平．靚．正之選呀！

食完彩虹甜品，見到萬利，想起各位網友的評語，飽飽地都入去一試。叫左5蚊腸粉，一碗碗仔翅。腸粉比下面某網友那碟靚好多倍，好難想像是同一間店的出品。我那碟加左芝麻，但面一層的腸粉都好晶瑩，好滑，一D都唔粉。係有水準的腸粉，好食過一般酒樓的。碗仔翅更是欣賞，稀稠度適中，個獻打得好好。未食之前特登"畢"起倒下幾次，係完全無一舊舊啫喱，又唔會太稀太杰，非常好。味道好好唔洗再調味，肉絲又夠絲狀，唔係一舊大一舊碎咁。見到好多人食車仔麵，但太飽了，下次再試。清潔方面真係要檢討，已有D秋涼，仲有蚊滋仔。碗仔翅盛得太求其，成個碗邊都係漏晒。