敏華冰廳 (The LOHAS康城)

Open Now

Now Closed

住喺日出康城，難免會幫襯呢間連鎖港式快餐，食評奇差就走去試試，果然中伏。中午食飯時間真的慢得很，叫咗蔥油豬扒煎旦反，豬扒好似肥騰騰，有成一半唔食得😞😤。有位保安姐姐坐咗大半個鐘都未有得食，個樣急爆，要5分鐘內食晒碟飯，真受罪。啲員工抹枱好求其，可能廚房樓面都唔夠人，老闆或管理層快啲正視問題，愈做愈差，如果唔改善，好快會執笠！🤯🤯🤯康城商場好多食肆已經換咗別間，下一次就輪到敏華冷廳😝😝😝😝

QR code點餐，叫了一個歐陸豐餐。但最後等了半小時，走了。途中15分鐘問了是否漏了單一次，25分鐘再問，30分鐘就決定離開了。其實侍應幫忙追了幾次，中途有提過是魚柳炸衰左，但之後等咗10分鐘都冇嘢黎。應該是廚房問題吧，但這樣會搞得顧客心情很差。其實如果中途上少少嘢食先，麵包火腿啊咁，唔使等成個餐砌好先出嚟，咁其實個客會感覺好好多。或者一單半單餐廳duncare, 不過對我嚟講，平日keep住食嘅客，會因為咁短時間唔再去，因為回憶唔好。

康城近年多左食肆，見敏華食評每況愈下，所以好耐無去。今天下午兩點幾經過，見有空枱，不用等，就入去緬懷一下最喜歡的豬潤牛肉湯米常餐。今次體驗，發現伙記好像換左新，很有禮貌，坐低有姐姐比杯水。可能人不多，奶茶先上，豬潤米也很快。見豬潤厚切、色澤鮮明，已覺不錯。食落爽口，有些部份雖有少少根位，但$67大大碗多料，有飲嘢、雙腸、煎雙蛋(蛋味很香)、多士，真是算扺和好味道我承認好多劣評講的我都試過，不會質疑。但今天試過，希望是改進的好開始，加油↖(^ω^)↗備註：收到編輯提到餐廳有比優惠會員寫好評。但我絕無收取過餐廳優惠，以正價付款。與餐廳也無任何關係，是真試過豬潤牛肉米常餐，覺得好左。真❤希望鼓勵他們繼續做好。其他食物無試，不會評論。

坐低即叫落單又話要電話落，等成十分鐘先俾個QR CODE嚟嗌完個常餐等左廿分鐘先行過嚟話冇，叫個姐姐幫我取消咁我嗌過第二樣飯餐又唔睬人之後又冇取消到照拎啲常餐炒蛋多士過嚟，同佢講多次幫我取消左個常餐都係唔睬我好啦，到坐足一個鐘多啲終於食完埋單個下都係照計我兩個餐，好聲好氣同個哥哥仔講番，佢就好悔氣話我地依到係冇取消，你落左就係會照做照出然後同佢講唔係我要取消，係你地冇果個常餐都唔幫我取消我仲要提左兩次，最尾先係靠個類似店長嘅姐姐取消一個餐先埋到單等一個鐘有多都算，當混亂手腳慢安排差但咁樣嘅禮貌同態度真係希望再培訓一下

今日去睇戲，睇11:00 場，我地10:30就入左去坐，10:33 已經落曬4個早餐。我覺得係香港茶餐廳食半個鐘其實都算係正常，自問全家食野都快，所以都唔擔心。點估到11:00 啲野食先到曬。我地坐果個位見到個吧枱出餐位，見到啲餐擺曬上去無人送。望住啲侍應慢慢行，攞住碟多士腸仔擺上手又放返低喺度，好似自助餐揀嘢食咁。然後啲麵碗放左係枱都無人送我覺得唔係廚房出餐慢，係啲侍應送餐好慢。不過無論係邊個慢都好，最後都係你好耐先至有嘢食。警世！趕時間真係唔好食！

原本都幾鍾意食敏華，簡簡單單，質素都幾好。不過唔知係咪康城呢間特別差，除左越黎越難食，啲服務又差。以常餐為例，最出名既炒蛋無喇喇加入啲高湯，濃到好似飲緊味精湯咁，蓋過晒啲蛋味！仲有啲奶茶以先有冰鎮，而家完全唔理你，話知你咁多。仲有啲腸！以前都係以雞肉腸為主，㕑師腸個類咪符合茶記要求囉，唔知係咪要慳錢又改埋晒啲脆皮腸，又唔係好食過人，完全唔啱feel。抵佢呢間野人越黎越少。管理層再唔理不聞不問既話呢間野應該好快bye bye

呢間分店出餐勁慢，個糯米雞，等左十幾分鐘，黎到竟然係凍嘅！！啲飯痴到實晒勁難夾，入面啲料連微暖都稱不上🙄咁大個人第一次食凍嘅糯米雞！因為唔想再等，唔知等到何時何分⋯所以冇叫佢換過。我食完個垃圾級糯米雞，另一份個通粉早餐都仲未有，蛋都未煎到隻出黎👍🏼同咗兩次職員講都冇用，催到要個客行埋去廚房位催！一份通粉早餐最後等咗半個鐘先出到仲聽到隔籬位話食咗九個字啲嘢都仲未到齊⋯店內環境衛生亦欠佳，唔太乾淨坐位附近嘅板好多積，冇清潔過咁呢間嘢冇下次！Never！

服務態度超差，出餐勁慢，等一個外賣要30分鐘以上，明明餐廳冇人。永遠不再光顧！垃圾餐廳。唔明白，今時今日，這間餐廳怎能夠在這個世界上生存！如此差的服務態度！早摺早著。

食過幾次都漏單，出餐項目總有一兩樣要等半個鐘先出等超過20分鐘好聲好氣問店員，都唔會幫你去廚房跟問多聲有未仲會比店員串味道亦比出面嘅敏華差扒類煎得唔香，有D唔熟常餐份量比其他敏華少

上菜速度非常慢，等左半個鐘，服務員不專業，服務態度超級差，沒有禮貌，飲品也忘記給！催過好幾次，答應後又忘記！拜託多花點心思培訓員工吧！！！！！！！！！！！！！！

我昨天中午在敏華外賣餐肉蛋治加烘底，等了15分鐘可以拿，對於星期日一點來說，這個速度可以接受。回家後打開一看，有炒蛋和餐肉，但没有三文治或多士……可能我運氣比較差，我以前在這家店買外賣餐肉蛋麵，試過等了一個多鐘，其間我有追問，店員推說跟進中……我寫電郵投訴，只回覆會改善和請我吃下午茶，但從來不打電話給我，是電話費太貴了吧？

平時都唔會寫食評，但今次真係太過分！影響我全日心情！今日星期六，去康城搵朋友，喺敏華叫咗個常餐外賣啦，中午12:19落單，竟然13:08先攞到！企喺度足足等左49分鐘！！催左N次加等待途中，聽到有唔少客人投訴外賣漏單等情況，有位顧客等咗足足一個鐘話要退錢，突然間好快就有得攞。亦都聽到有另外一個顧客話已經等咗半個鐘，但員工竟然同佢講另外一個客等咗一個鐘㖭啦，唔知佢咩意思朋友話原來佢之前都試過外賣等左45分鐘！我都真係未試過喺第二度買外賣要等差唔多成個鐘，食飯都唔使咁耐啦！激死！我真係以後都唔會再去康城間敏華！

見好耐冇食敏華冰廳就試下！叫咗個沙嗲牛肉麵常餐，價錢係$61味道正正常常都幾好食，個套餐包埋炒蛋火腿同埋多士，仲叫咗杯凍檸茶！so far 都不錯的！咁啱蛋撻出爐就叫左一個，新鮮出爐熱辣辣嘅蛋撻好好味！😋

上星期幫朋友搬屋去日出康城，工作完成，系商埸搵嘢食。行左一圈，最後選左敏華冰廳。因為價錢比較平民，但晚上餐牌選擇唔多，當時都唔知食嘜嘢好，但d 侍應好熱情介紹一人一鍋，咁我們就嘗試下啦，叫左個壽喜燒湯配肥牛片烏冬。朋友就叫左清湯牛腩煲，等待時，見到侍應只得3個人，當時都見有少少忙，但他們都好有耐心介紹食物比客人。環境都舒適，出餐時間都好快太約等左10分鐘左右。一人一鍋賣相都幾靚。壽喜湯配食肥牛同烏冬味道都ok. 另外一個清湯牛腩內有蘿白，味道都比較清甜。系冰廳來講食物質素都ok價錢亦唔算太高，服務都比我感覺舒服，侍應都好熱情招呼。不論客人要求要什麼他們都盡量做到。康城敏華比我們感覺舒適，朋友都話搵到一間飯堂啦。

正所謂無期望就無失望，屋企有現金卷想用左佢唔好嘥先黎。康城無咩好食大家都知，呢款商場都唔會容納倒細鋪，有時逼住食連鎖店，但連鎖餐廳都有質素之分，康城呢間敏華都算出色。價錢就算間間都一樣但呢間可以喺其他地方俾人不停扣分。上菜速度真係好慢，一直聽倒隔離左右都話乜乜乜未黎，人地唔係叫啲製作需時嘅野，係下午茶榨菜肉絲公仔麵咋大佬，你估整公仔麵會唔會整到Fine dine 咁。服務亦都係無服務。服務員講嘢嘅態度我好主觀係唔friendly，但又唔係rude 嘅。上菜果陣一野掉落枱，有心又好無意又好，好難體諒，睇一間餐廳係睇埋呢啲㗎。好啦可以講野食，叫左Tea 蕃茄牛肉燴意粉+紅豆冰，意粉正常發揮，唔使扣分但絶對唔係好食，足夠維持生命。紅豆冰反而可以讚，其實唔係讚佢好好飲，係讚佢冇做到好難飲，因為而家好多餐廳嘅紅豆冰都勁難飲。總結一句，作為藍店，佢應該要做得更加好，起碼性價比要好啲先，以上。