Video
Opening Hours
Today
11:00 - 20:00
Mon - Sun
11:00 - 20:00
Above information is for reference only. Please check details with the restaurant.
狗狗爸爸帶咗一件由朋友請客的Mr. CHEESECAKE Praline Pistachio 開心果芝士蛋糕返屋企。之前聽過呢個品牌但冇深究，啱啱睇Openrice上列出的資料，先知原來佢係嚟自日本的甜品品牌，以製作意芝士蛋糕著名。近期品牌喺太古廣場開設期間限定店，仲引入呢款限定的蛋糕，描述話：「以濃郁嘅開心果醬作主角，配搭滑溜嘅芝士蛋糕質感，每一口都散發出開心果嘅香氣，仲有隱約嘅果仁脆口感，層次感十足」寫就咁寫，但實際係咪咁堅？Praline Pistachio 開心果芝士蛋糕：$422，網上寫係聖誕限定。綠色的紙盒設計簡約，卡紙非常硬淨，雖然唔環保，但當切蛋糕時就知，外盒要堅靭啲先足以保護到呢個柔軟的芝士蛋糕。單睇紙盒的尺寸，已經審斷到個蛋糕好迷你。蛋糕的外觀一般，正常，造型冇乜花巧、特別。狗狗爸爸食咗一啖即刻話好甜。睇番營養標籤，100克的蛋糕有22-23克糖。狗狗爸爸話開心果味只係慢慢滲出，唔濃郁。要讚的話，佢最鍾意個蛋糕夠幼滑，可以不費吹灰之力食落肚。到我試，同樣覺得蛋糕偏甜，唔肯定呢個甜度係咪迎合香港人的口味。開心果味淡（甚至唔存在），如果幪眼試食，未必分得出係開心果口味。的而且確，蛋糕本體夠滑，但同時亦少咗口感，描述寫話「有隱約嘅果仁脆口感」，可能太隱約，完全食唔到~~而芝士味都係淡淡的。我最欣賞係：蛋糕有甘苦的焦糖味，係一種好獨特的甘苦味，唔係煮燶咗果種淨苦味，詞窮，唔識形容，網上寫係「焦香微苦的法式果仁糖」。呢種甘苦味非常討好，亦可以刺激食慾，令人想追住食（如果唔係咁甜的話），佢又可以中和蛋糕的甜度，同埋心理上覺得可以解膩。整體嚟講，如果係為開心果熱潮而選購，好大機會會失望，因為佢的開心果味只係噱頭，唔突出，零衝擊。而蛋糕的口感、質地同味道幾有水準，只係略甜。焦糖的甘苦味未必人人接受/欣賞，視乎個人取向，對我嚟講，呢份甘苦味令人非常回味，係呢款蛋糕的魔力所在。考慮價錢的話，$422買一個咁迷你的蛋糕，唔值，不過請人食都仲可以，當係買個集體體驗，自用就太奢侈喇。
continue reading