Video
Opening Hours
Mon - Fri
11:30 - 23:00
Above information is for reference only. Please check details with the restaurant.
Signature Dishes
2月23嗰日，因為朋友牛一，於是咪諗住搵個地方大家聚一聚囉。生日嗰位朋友想食越南菜，咁啱我有次經過將軍澳中心，見到間『碌冧』係食越南嘢嘅，同埋好耐之前喺收音機聽過呢間咁特別嘅名，咪想試吓囉！由於大家冇異議，於是就訂咗七點鐘。我哋去到嗰時，得小貓三兩隻，以為話閒日（星期四）同時間早啫，點知嗰間嘢成晚都冇一半係坐滿嘅，間嘢唯一好處咪就係夠靜局囉！死未？大家諗好菜式之後，朋友順手寫咗喺塾枱張紙度，於是叫人落單，埋嚟嗰個男人，以年紀同服飾睇，應該係經理。因為現時很多食肆都會將菜式編個號數俾佢，方便落單，朋友咪諗住講『冧把』囉，點知個疑似經理就一句『得』埋嚟，「我哋冇用『冧把』過喎！」，跟住，佢睇吓寫低嗰啲菜式，因為我哋叫咗個蜆肉炒粉絲，佢睇完就話：「今日冇蜆肉！」朋友想改豬頸肉，佢又話：「冇豬頸肉！」我哋氣憤之餘，唯有講：「咁你有乜就俾乜啦！」吹漲！今時今日咁嘅服務態度，仲要係『要乜冇乜』，怪唔得生意咁差啦！以下係我哋點咗嘅食物：1)半隻雞 2) 柚子沙律 3) 炒什菜 4) 蒜蓉包 5) 煎豬扒 6) 春卷 7) 串燒牛肉 8) 炒粉絲 9) 鮮檸梳打、士多啤梨冰、熱咖啡 10) 拉爺糕、咖啡糕整體上，食物質素，叫做不過不失，普普通通咁啦 ! 不過，份量就認真少！我哋六個大人，只係得我一個男士，食完哂都好似未飽咁，於是咪諗住叫啲頂肚嘅甜品，好似『黑糯米』吖嗰啲囉，點知個疑似經理埋嚟話：「今日甜品賣哂，淨番『拉爺糕』！」有冇搞錯？又冇得揀！因為一客啱啱係六件，我哋咪叫一客囉。轉頭，個女侍應同我哋講：「『拉爺糕』淨番兩件，問我哋要唔要『咖啡糕』。」鬼叫我哋未飽咩，照要啦！最後，令我哋最『慶』嘅事發生咗，隔籬枱竟然有『熱辣辣』嘅『黑糯米』食！朋友埋單時，問個女侍應點解經理話冇哂『黑糯米』，但其實係仲有嘅？佢只係無奈咁笑一笑，於是，朋友就一毫子貼士都冇俾，咁做嘢法，睇佢幾時執！
continue reading
星期日，囡囡有朋友在樓上屋苑會所開PARTY，於是一家四口 (兩公婆+5歲囡囡+1歲仔仔)來了食LUNCH。叫左兩個午餐＋一個小食：1. "火車頭湯河粉", $50－－跟餐有大大杯凍飲，贊！－－附洋葱湯，細細碗，味道尚可；－－主食超唔掂！所謂火車頭，完全唔係出面那種大大碗好多餸的火車頭！碗，是一般食肆湯麵SIZE，河粉係一人份，餸，只有兩粒牛丸＋幾片薄牛肉＋一兩小舊牛腩！味道中規中矩，但份量絕對唔飽！2. "菠蘿蝦膏炒飯", $52－－一樣有大大杯凍飲＋洋葱湯－－份量較合理，炒飯夠熱又夠乾身，配料有蝦仔幾隻＋切到好細粒的扎肉＋菠蘿等，大致可收貨3. "越式粉包", 跟餐加14蚊－－落單前已問過，侍應講係「兩件」。心諗，兩件14蚊，合理價吧！－－實物，兩件用好細個碟裝住，加埋不足5CM乘5CM（兩個痴埋一齊放），好少料，粉好薄，只食到內有少少豬肉碎，和魚露（味精？）的味道！－－唔好話14蚊，7蚊都俾多佢！埋單$116，冇加一，但，唔值囉！
continue reading
之前食過一次，食物質素普通！但今次經過睇到中午餐牌覺得菜名很吸引 就試下！點知有意外收獲首先賣相吸引 比起之前睇得出今次好有心機！味道方面都好食好多！問返侍應原來係廚房有人事變動，價錢亦好合理，好大眾化，而且有尼個質素 。直得一試 下次會再尼！
continue reading
大年初一，團拜過後，到附近商場品越菜，賀新年。晚市自助餐$118+10%一位，任點任食。百餘元一位的自助餐，食物質素不要有太高要求，主要都是一些越式小食如越南春卷、香茅雞翼、肉崧蝦片等等。主食有生牛肉湯河、扎肉凍檬...。除越南菜式，亦有少數「法菜」如燒羊扒、燒牛肋條、蒜蓉焗青口等等。云云食品，以香茅雞翼、燒羊扒及燒牛肋條比較好食，其餘食品平平。菠蘿冰、木瓜雞湯、椰汁黑糯米則唔係好得喇！
continue reading
任食？好抵？就咁入左去食種類唔算多。每次小碟上，非常迷你。食物味道麻麻地，飲品ok。服務速度算ok，服務態度ok。如非必要，可以唔去。任食迷你餐質量，老老實實其實將貨就價。
continue reading