泰式美食

Open Now

Now Closed

以前都一路有幫襯開，一間外賣店，不評論服務態度了，其實野食質素都可以，但最緊要宜家個價其實已經開始追得到出面堂食個價，宜家已經轉左去差館里蕪湖街巷仔新開果間小店MUEY，果間野食同價錢都好D....比較有誠意

紅磡街坊同poly學生應該無人唔識呢間泰國菜，我都曾經都幫襯幾次，但今日係第一次同個老闆娘落單，絕對要打返個經歷，勸世人唔好再支持啲無品無禮貌嘅老細今日五點幾，門口得兩個女仔等，我亦等呢位老細聽完外賣電話，確定唔阻到人情況下極好聲好氣地問咗句所有叫外賣嘅人都會問嘅一句說話：「請問如果落單大概要等幾耐？」，我後面個句「想order一個肉碎煎蛋飯」都未講到，個女人特登用懶恭極但一聽就知潤人、極單單打打嘅語氣應：「呀小姐，我就唔知道你要落啲乜野，答你唔到wor」然後就縮返頭入玻璃到，根本唔俾機會個客去講，而佢手頭根本無野做，落閘擺明無興趣做你一單外賣。間鋪係openrice有過半嘅食評都係comment呢個女人態度問題都知咩料啦，知你生意好唔休做，亦唔介意幾個人唔食你間嘢，你x慣，我都唔會expect你之後會似返個人咁同人講嘢，祝你繼續每日周到人俾你串同潤，我亦會努力幫你宣傳有你坐鎮嘅呢間鋪，紅磡得你一間泰國菜咩，寫出嚟係勸大家無謂貼錢買難受。

點完餐準備比錢，話要等15分鐘。客氣問有冇唔使等嘅餐，老闆娘指住個蝦片話：蝦片咯！蝦片唔使等。做街坊生意冇見過咁串嘅老闆娘。之前食過一次覺得不過是普通水平，咁大脾氣就咪做外賣啦。翻屋企瞓啦。

作為紅磡街坊，呢間舖都幫襯左幾耐了，呢排檔口個泰國女人態度愈來愈惡，嘢食味道都愈來愈差。今日去攞外賣時，完全唔理人就算，平時打電話去佢地都會叫人留下number，今次唔知點解冇，我就淨係報左叫左咩送，個女人好惡咁講，你要報電話喔唔報邊知你邊位，我話今次冇叫我留number，佢話 我地有來電顯示，你唔知電話可以來電顯示咩。唔知點解唔可以好好講嘢，好好溝通。而且今次個豬頸肉沙律唔知係唔係味精落左太多，食左整完勁飲水。我念我之後都唔會再幫襯啦！

今日路過想試下 冇唸到店家點完單之後態度惡劣，點完野問一句大概幾耐，就超級唔耐煩，等左半個鐘 都未問完整好未就開始鬧人，語氣極度態度惡劣，真係差d哭出來 蝦人蝦成咁，買嘢仲要俾人鬧，一日嘅心情都被人破壞曬，今世都唔會再來 。

只開下午、夜晚生意都已經好好～泰國人主理所以味道正宗～比得上泰式餐廳～一到夜晚就會有好多人企喺街邊等外賣炭燒豬頸肉即叫即燒～好入味好嫩口唔會乾肥瘦均勻～仲有炭燒香味～配泰式青檸魚露汁非常惹味豬肉碎生菜包大大份～有：紅蔥切絲、香茅、金不換、辣椒粉、青檸汁一齊炒～可惜豬肉碎炒得唔夠耐～包入生菜包比較多水份～攞起上嚟有D狼狽～炒乾身收水再香口D泰式炒金邊粉金邊粉比較碎～有：大蝦三隻、雞蛋碎、芽菜、韭菜～應該係泰式酸辣醬炒嘅～同平時正宗嘅泰式金邊粉味道唔一樣～冇咩青檸汁、魚露味生菜包生菜新鮮乾淨整體嚟講外賣都唔算等得耐～呢個價錢份量都算大份

早幾日去左寶石戲院附近間泰菜小店買外賣, 生菜包, 海鮮炒金邊粉, 青木瓜沙律.....樣樣都好好味😃尤其係串燒😋. 小店食物選擇唔多但價錢十分抵食...一條燒烏頭都係$88, 係觀塘區都要大概$200平過一半, 下次要試試。生菜包 ~ 加左好多檸檬葉好香好清新不過可能自己比較重口味~酸同辣味可以再重手D。串燒 ~ 豬、牛、雞都試過....朋友們都一致認同串燒豬下次可skip,  串燒牛可以無限encore,  雞都係一般‥‥醬汁唔知係咪沙嗲? 味道好淡, 食唔出係咩味, 只有少少甜味。青木瓜沙律~ 朋友們感覺好大陣草青味不過我就唔覺。 味道可以既, 甜酸辣合當海鮮炒金邊粉~ 味道偏淡, 冇咩特別~

-{黃埔抵食外賣泰菜🥘}禁左晚市堂食之後食多左外賣 依間又係愛店之一😍食足4年☺️但淨係做外賣咋🤤燒豬頸肉🤤勁出色！偏肥嘅份量亦好多🥳最重要係真係烤得好燶邊超正😚👖褲評: 8.5/10🤤雞肉串🤤雞就正正常常 個精粹係在於個沙嗲醬😋重椰香味🤓可以拎嚟撈飯更惹味🤓👖褲評: 7.5/10🤤泰式炒金邊粉🤤炒得偏濕潤嘅🥰係一啲都唔辣 甜味出過酸味😚入面有4隻蝦😍👖褲評: 8/10🤤菠蘿炒飯🤤有啲三色豆 蛋碎 提子乾同肉鬆 今次食落比平時偏乾係咪冇乜味👀但用沙嗲汁搭救就惹味好多☺️👖褲評: 7/10🤤 豬頸肉炒河 🤤都係偏濕潤嘅豬頸肉就冇剪過所以冇乜燶邊但肉質都一樣咁正😋配埋炒芥蘭同埋蘿蔔好多配菜😆👖褲評: 7.8/10🤤 冬蔭公肥牛河 🤤食咗咁多次第一次試冬陰功湯 椰奶味好重 有少少辣但係會上癮咁飲個湯😂😂😂肥牛同菇嘅份量都多😋好高質👖褲評: 8.5/10紅磡街坊又多個晚餐外賣嘅選擇😙大份又抵食👻性價比: 10/10服務: 8/10環境: nil🚩 泰式美食 🚩地址: 紅磡明安街2號地下J1號舖 #fuudjai #fuudjai東南亞菜 #fuudjai紅磡 #fuudjai黃

今次想介紹嘅係呢間唯於黃埔只做外賣嘅隱世泰式小店🇹🇭 每次喺附近剪完頭髮都會過黎買宵夜💇🏻‍♀️都係salon職員推介比我😝💈 每次外賣都要等十五分鐘以上⌚️ 除左因為串燒即叫即燒🔥 亦都好多老街坊捧場客 所以差唔多剪完打電話去落定單就最好📲 剪完去到有得拎😂˜”*°•肉碎生菜包($40)🥬🧅🐷•°*”˜唔洗擔心啲生菜唔靚唔乾淨(我自己都好怕) 叫左咁多次啲生菜都處理得好好 好新鮮整齊同乾淨💧 而且size啱啱好 肉碎亦炒得非常香口惹味🌶️ 必食推介 抵食又好食😋˜”*°•泰式冬陰功湯($50)🌶️🦐🍄🥣•°*”˜另外我都好欣賞呢度嘅冬陰功 50蚊一大碗仲要係好味道 夠酸又有咁上下辣🤏 最滿意佢香茅味足之餘 重點係唔會飲到成口香茅碎 飲湯飲到要係咁避開啲香葉碎就最唔開心 而且都好足料㗎 勁多菇菇🍄燒雞翼都唔錯對於宵夜黎講🌛 呢個價錢呢個份量呢個味道 絕對收貨啦😋👍🏻

作為紅磡老街坊，我近兩年食得最多就係泰式美食 諗唔到食咩就會去買生菜包😆超級正宗，全鋪感覺係得門口姐姐同佢個女識講廣東話，廚房都係全泰文🙈燒豬頸肉、生菜包同埋燒雞翼超正（鳳爪都好多人叫，不過我唔食）。首推燒豬頸肉，惹味夾抵食，抵過落九龍城食多多聲。仲要熱辣辣，加埋個辣醬真係無得頂🤤 不過叫咖哩就要注意番，啲咖喱唔似平時食開啲馬來咖喱咁濃，比較似湯咖哩記得電話落定單先，特別係放工時間。仲有豬頸肉通常8點9點左右就賣晒🙈

黄埔區其本上可以叫做食區，有平有貴，各適其式，所以也很喜歡在其大街小巷尋寶，最近無意中發現這家只做外賣的小店，有我喜歡的 串燒 馬上打包了晚餐回家， 要了串燒牛肉和豬內 燒豬頸肉及雞翼 泰式炒雜菜 生菜肉碎包 青咖哩雞飯 泰式炒金邊粉。味道方面燒豬頸肉，雞翼及生菜肉碎包很款好味值的推薦， 串燒有些失望，其他 食物 作為四五十蚊一份 也是可以的 值得一提是可先 用whatsapp落單頗為方便 ， 知道 取餐時間 不用在街等太耐

紅磡泰菜外賣店，黃昏開到凌晨，作為外賣店價錢係平嘅，炒粉炒飯四五十蚊，串燒雞全翼都只係十五蚊，合理。店員厨師都係泰國人呢，店舖細細，但感覺幾地道。要注意嘅係出餐時間要預長啲，即叫即造要留多啲時間，始終地方所限。泰式炒金邊粉($45)/唔算特別大盒，正常size，金邊粉正常，條條分明，唔糊口。有三隻大蝦👍有豆乾、好似櫻花蝦嘅紅蝦仔、蛋，但鑊氣就少啲，而且酸甜味較弱，調味重手啲更好。下次會試生菜包，希望香茅味會突出啲。

呢間嘢我幫襯過兩次，兩次都受負責落單嗰位泰姐氣！真係幾好食都係咁先。第一次去係晚餐時段，好多附近嘅理大宿生幫襯。人龍係長，所以如果你好多問題問嗰位前台嘅泰姐，佢會好晦氣咁應你！但如果係理大嗰啲外國白人學生佢面口會寬容D！咁好，我就當佢客人太多做到無停手，我order咗豬、牛、雞串燒、菠蘿炒飯同凍泰式奶茶，都好乖咁排咗接近35分鐘先有得拎外賣。第二次去係上兩個禮拜疫情轉差時，我下午時份行過去問嗰位泰姐幾時開市，問咗兩次佢都唔應我，真係火都嚟！附近開咗兩間同樣嘅泰式美食外賣店，我諗我唔會再貼＄睇佢面色！

夜晚肚餓食宵夜嘅最佳選擇☺️呢間店舖嘅老闆娘係泰國人，鋪頭每日都係六點先開，但下晝見佢已經準備緊。超級高質🥰我每次去都會叫泰式炒金邊粉，好有鑊氣，仲好大碟添！兩個人share啱晒🤪沙嗲串燒都係另一樣必食推介🍢佢哋自製嘅沙嗲醬真係冇得頂，完全將食物嘅味道昇華到另一個層次😭今次仲嗌咗肉碎生菜包🥬呢樣中規中矩啦，辣得來都幾惹味嘅🤓呢間小店雖然平，但絕對唔會同出面啲泰國餐廳比下去，性價比好高！以前仲會開幾張枱係出面俾人食，但而家淨係做外賣🥡夜麻麻喺紅磡搵唔到嘢食就去食啦🍽！

紅磡係有好幾間泰國餐廳，但水準不一，我推薦呢間小店，因為試過不同的食品，而且見到小店的客人越來越多，老實說，食物由泰國人主理有風味，老闆娘很友善又懂得廣東話，對客人的要求可以彈性處理，店家細小，多單起來要等多一點時間，客人從冇抱怨，因為小店的食物真的抵食又好食，我最喜歡吃的是炭燒豬頸肉、肉碎生菜包、波蘿炒飯、豬頸肉炒飯泰式炒貴刁、另外是串燒，仲有蝦片，星期六、日特別多order , 最好早點打電話去落單，然後隔半小時左右才落去取外賣，現在連泰式湯河也有，見到老闆娘很落力工作，滿頭大汗，希望她生意興隆，能夠繼續做下去，等街坊可以繼續有好嘢食。