新光燒鵝餐室 (Closed)

今日去開筲箕灣買餸，之後想搵個舒服d既地方坐下食下下午茶，見到太興咁多人，見到對面有間燒味茶餐廳好似幾好咁，就叫左個迷你叉燒飯試下，又幾好味，比同區的燒味做得好。都算有d驚喜。

今日路經此店，見到店名叫燒鵝餐室咁特式，見對面有間食開的X興燒味，一於試下新光比較下。時間大約下午6點半，可能星期一兼尚早不太多人。叫左叉鵝飯一碟，例湯及凍奶茶。食品好快來齊。嘩！好大碟！叉燒及燒鵝份量十足。叉燒半肥有咬口好味。跟住試燒鵝，一試之下果然好掂👍，肉質正口感不錯，兼且有種燻香味，十分好味，果然是燒鵝做主打的餐廳。例湯是花生雞腳豬骨湯，夠味兼味精不多，十蚊一碗都算抵。試埋個凍奶茶都有茶味，都算唔錯。餐廳很新浄，環境不錯，只是座位有點迫，服務態度👌。好快會再幫襯。

十分好食，價錢合理，燒味飯$55連野飲，咁嘅性價比完勝對面嘅泰興，點都應該幫襯小店啦！鵝肉油脂份量適中，鵝皮好似乳豬咁，油好香，仲食得出香料同一般燒鵝唔一樣, 齒頰留香。

爸媽住呢區，有時返去會一齊去新光食下午茶，通常食38蚊炒滑蛋茶餐，义燒湯意粉幾好味，但奶茶唔夠香滑，其他味燒味不錯，老豆成日讚燒鵝好味，衞生和環境方面可以接受，只是枱椅有些少擠逼。服務就一般街坊式招呼，店外有時有人坐住抽煙。午餐有提供長者優惠，不過個人認為三十幾蚊一個飯唔包例湯或飲品，對長者而言都係貴。

行完山到筲箕灣找吃的，碰上這餐廳入內一試。幾個人各選自己喜歡的燒味飯, 粉等。我選了招牌燒鵝瀨粉，加熱啡。想不到，筲箕灣這小地方有這水準的燒鵝瀨。燒鵝入口豐腴，肉質厚而不老，鵝皮燒得香脆，配上的汁，美味得來又不濃得令人口渴，確是有水準的燒味。瀨粉ok！ 咖啡在茶餐廳來講是前列之作了，應該用過心機調配，不是粗製濫造。朋友們食燒肉和切雞，都説不錯。我沒有吃，不知道。下次再來再試。侍應態度親切，如左鄰右里的老友記，沒有集團式餐廳侍應的拘謹，有傾有講，令人愉快。這次試食經驗，推介燒鵝。值得再來的餐廳。

今日街完山去揾嘢食。見到筲箕湾开左新焼鵝餐廳。見到人人吃的燒味好似好好味咁。 我哋又樣樣都想試。所以叫咗一個燒味大拼盤 。真係不好味到不得了。义燒又肥又滑,燒鵝又香又脆, 乳豬先不得了,脆到好似吃薯片咁樣。 豉油雞同白切雞好香滑, 質感柔嫩好好味! 杯奶茶夠滑。 鴛鴦配合剛剛好。 檸蜜回味無窮。一定有下次。

叫了燒鵝瀨外賣，回家先發現......乾爭爭....最後自己煮個史雲生雞湯加落去至買外賣不用煮另外我們還買了燒鵝飯，見到個外賣盒是細size, 鵝還可以但D飯lum pat pat的。仲要$50!以後如有機會再幫襯一定要check 清楚!

今日我和朋友S和Y去石澳探朋友M.在去朋友家前，大家都想食個下午茶，就選擇了這間最近石澳紅Van的新開食店。去呢間食店唔食燒味，真係好傻🙄我今次選了這個：本來個餐係叉燒意粉+厚多士，但其實可以自由轉款，我就選擇了肉丁米，因為食慣左，點知朋友送到的叉燒意，不論賣相、口感都比我這個好食。我先留意到這裡最好食是燒味，好後悔呀😓不過這個餐都幾full,嚴格來說我係食唔曬的。不過佢的凍飲要加3蚊，其實都唔算平。都係個句，唔食燒味，唔好考慮😧

心血來潮去行山！嚟個快....今日感受到乜嘢叫做不公平待遇！😳我叫燒鵝脾瀨粉$88、隔離枱叫燒鵝瀨粉$55！👇🏻姐姐攞住碗燒鵝髀瀨粉、放喺隔離枱、我以為攞錯好心提佢、我話我叫燒鵝髀瀬！佢回應我個碗未出！點知我碗燒鵝髀同隔離枱、大細冇分別、唔同嘅只係分開上！但價錢同隔離枱相差＄30！佢嗰碗燒鵝髀瀬$55！😤😤😤

今朝又例牌到新光燒鵝餐廳都歎早餐，鍾意呢到侍應親切既態度，另外當然就係就腳屋企附近好方便，又好食又抵食，所以成日都黎幫親！今朝叫左例牌既沙嗲牛肉公仔麵餐，呢到d沙嗲牛肉出名好食，牛肉好夠味，肉質唔會韌又唔會用梳打粉拿得淋過頭，口感唔錯岩岩好，麵質又夠彈牙，煮既時間又控制得好，老闆都好識訂貨，十足十足出前x丁咁既口感，湯底有濃濃既沙嗲味幾惹味！跟餐火腿炒蛋多士，都唔錯，多士夠晒脆口，炒蛋唔會過老都好滑！飲品凍檸檬茶，夠晒茶味，甜度岩岩好，幾好飲既！

襯今朝早左起身有時間，啦啦聲去食埋個早餐先返工，落左去新光餐廳到食早餐！叫左個叉燒湯意粉，叉燒都唔會太韌，淋淋地甜甜地幾好味，清湯配湯意粉，因為有湯浸住意粉就唔怕乾身，意粉口感爽口都唔錯！ 火腿炒蛋，火腿當然沒有特別之處，唔會煎過龍唔燶就得，炒蛋少得都幾摫，好香好滑！ 牛油厚多士，厚厚牛油搽上旱得金黃脆卜卜既多士上，雖然肥左d但既美味又好食，咬落卜卜脆既感覺真係好正！ 配埋杯一早可以提提神既凍奶茶，奶茶都好香好滑，茶味夠晒濃郁好好飲！

周末郊遊樂，與家人一起到石澳龍脊行山。出發前先在筲箕灣巴士總站的餐室享用午餐，補充能量。新光燒鵝餐室是一間燒臘茶餐廳，地方都算光猛整潔。食品方面，主要有燒臘及茶餐兩款選擇。 既然餐廳以燒鵝定名，當然要一試這兒的燒鵝。這碗叉燒燒鵝瀨粉，賣相不俗。主角燒鵝皮香肉豐，鵝味甚濃，口感則屬中規中矩，不及預期般鬆軟。叉燒方面，買相雖不及燒鵝吸引，但味道口感俱佳，更見驚喜。至於香滑炒蛋茶餐，炒蛋確實炒得挺香，但滑感只屬普通。一整塊烘至微焦的厚多士份量十足。 麵食方面，叉燒意粉所用上的叉燒，與叉燒瀬的用料看似有點不同，味道上也令人滿意。

純粹random亂入，假日比較多人又咁岩有位！佢地服務好好，有濃濃又罕見既人情味。我到左坐低等朋友，佢地完全冇趕我落單！其實都好感動，因為我有選擇困難，趕落單我會更唔舒服。隔離位婆婆叫左個燒鴨飯，超大碟，婆婆只係食左1/3左右，而佢話D皮好硬，佢食唔到。我同朋友最好叫左兩個茶餐，賣相好靚靚！美中不足係個通粉質地麻麻，太厚太實唔彈牙。最後埋單，老細仲叫我地慢慢坐，去埋廁所先搭車去行山，仲叫我地下次再黎食！

之前朋友食過激讚，我今午首度試呢間燒味，點了個$33迷你叉燒飯連熱飲的茶餐。由於當然約五點，食客也不少，大部份點燒鵝瀨，相信燒鵝係店招牌！講番我的叉燒飯，下午茶份量剛好，叉燒較稔，但我個人比較鍾意少少燶，總算合格抵食！在筲箕灣來講，這燒味比起其他店也不俗！

見有新舖試業, 當然要試吓啦. 下午茶時段, 要一客燒鵝瀨粉配咖啡.  燒鵝皮脆肉嫩. 配酸酸咪咪酸梅醬, 味道一流. 吃落也不覺膩. 平時唔食皮嘅我, 今次都要連皮清. 咖啡味道相對就失色些少