滑嘟嘟

Open Now

Now Closed

唔介意加價， 但都唔好整細禁多。減細30% 以為食客(熟客) 唔知咩。 以前排哂大隊等15 分鐘起碼。 今次以為禁好彩直接買沒人安排， 原來有因。 哎。。。香港飲食業要檢討一下啦食左你家出品超過10 年的客。 每個月去1至2 次大埔都買甜品返家食。 失望

提到大埔，滑嘟嘟嘅糯米糍可以話係當地名物之一。聽聞盛名已久，這次剛好經過附近，當然要特登去朝聖一下！買咗三個返屋企，睇吓係咪真係咁好食。糯米糍雖然得一款餡料，但喺舖頭見到係即叫即做，完全新鮮製作，感受到小店嘅用心，手工感十足，令人對味道充滿期待。糯米糍嘅賣相已經非常吸引，每粒都好大隻，差唔多有大奇異果咁大！一咬落去，薄薄嘅糯米皮包住滿滿嘅餡料，餡料多到近乎「爆餡」，入口即刻充滿濃郁嘅花生香氣同黑芝麻嘅醇厚味道，仲散發出淡淡嘅糖香。除咗招牌糯米糍，小店仲有芝麻糊、芋圓同其他糖水可以選擇，感覺值得一試。如果你鐘意甜品，呢間小店絕對係大埔必去嘅美食地點！

呢間嘅糯米糍係即刻整㗎，星期六日去都排晒長龍，好彩我住附近平日就唔使排隊，最鍾意食佢嘅芝麻花生餡，好多人都問佢有冇其他口味揀，我覺得一隻好味夠專注啊，人手差啲皮都可以整到咁薄真係好好考功夫，成日經過都去買嚟食，唔記得咗影相

大埔 l 傳說中最好食客家糍粑客家糍粑 $20/3粒 7/10老闆娘逐粒逐粒新鮮包，不愧為傳說中最好食，食得出入面花生芝麻餡有炒過，比起平時出面食嘅更加香，老闆娘包得好好，皮又薄又煙靭，性價比一流，值得一試！個人覺得比起民豐更好食，不過滑嘟嘟就剩係得一隻味。滑嘟嘟 (大埔)大埔鄉事會街8號大埔墟街市及熟食中心2樓CFS29號舖

同朋友係大埔墟街市食飯，食完經過滑嘟嘟，朋友又想試下，而呢間鋪頭就係得一款口味既客家糍粑（花生溝黑芝麻餡），當然仲有其他甜品綠豆沙、中式糖水＆芒果系列甜品等，始終食飽飯就正係試左客家糍粑先~客家糍粑（＄２０／３粒）😋😋😋糍粑都算大粒，糯米皮唔會過薄過厚岩岩好，咬完一淡入面既餡料花生芝麻好飽滿甜度亦都岩岩好，皮薄餡靚好抵食！下次有機會再試埋其他小食，推薦大家都可以試下客家糍粑！！！😋😋😋

大埔墟街市對大埔人一定唔陌生，今次上去買飯後甜品😎，最近熟食中心好似裝修緊，搵路有小小難道，哩間小店最出名係客家糍粑，$20/3粒 ，價錢算平民😮，一粒約有女仔手掌心咁長，糯米皮穿透睇到入面爆餡好似幾足料‼️ 仲有其他港式甜品，買完可以係熟食中心坐底食埋。屋企人食完都讚好味甜度啱啱好💛，花生芝麻餡好香口比例啱啱好，糯米皮煙韌有咬口，20蚊3粒CP值好高呀‼️後悔淨係買咗3個呀🥹🥹🥹，黎開大埔嘅朋友記得買黎做"手信"😎

「滑嘟嘟」就係我山長水遠入大埔嘅原因之一！佢地純手作嘅糯米糍同芒果甜品都唔錯！如果鍾意食糯米糍嘅話，絕對唔可以錯過依間！花生芝麻餡糯米糍- 暫時係我食過最滿意嘅糯米糍（每日新鮮包嘅）佢地嘅糯米糍冇花巧嘅野，就只有一種口味（花生芝麻餡），餡嘅味道同口感都幾好，甜度適中，仲「爆餡」，餡嘅份量好足，每一啖都好滿足個種！重點係糯米糍嘅皮既薄又軟糯，所以好加分！ （建議當日食完！）分為 3 個一盒同 6個一盒嘅粒粒芒果爽 - 除左糯米糍，依個都係我每次必買嘅！佢入面有椰汁西米、新鮮芒果、蘆薈、椰果同仙草！整體嘅味道同口感都好，幾清爽，唔會好甜，食完成個都冇乜罪惡感哈Haha芒果椰汁奶凍 - 佢入面有新鮮芒果、椰汁同鮮奶，都係唔會過甜。雖然我覺得依款冇粒粒芒果爽咁驚艷，但有種越食越好食嘅感覺。佢入面有好多芒果肉（就算唔係季節，都唔會酸），底部奶凍嘅口感幾滑，椰香味幾足，建議一定要芒果肉+奶凍一起食。佢地另外仲有港式傳統糖水，例如芝麻糊、合桃糊、椰汁渣咋、芋圓等等同其他嘅芒果甜品！*佢地每逢禮拜一休息

仲記得上次冬天嚟，無得買芒果產品嘅失落感🥭 成日都預唔啱時間拎團購，今次終於山長水遠買到嚟食👻👻今次覺得最正嘅係粒粒芒果爽$48，佢係用飲管飲，飲到好多種層次😚 入面椰汁西米、芒果 、蘆薈、椰果、仙草，好有咬口，份量絕對足夠👻 奶凍同芒果爽，我會選擇芒果爽😛 芒界椰汁奶凍$48 - 有三層(芒果、椰汁、鮮奶)都好食，唔會覺得甜，但一次過食哂三樣有啲難道😂 要倒出嚟食先理想😛客家滋粑 ($20/3粒) - 奉勸大家千祈唔好將滋粑放埋入凍袋，嗰皮硬咗好唔開心😫 不過個餡都係咁好食，足料！楊枝甘露凍糕$98 - 超好食😋食到停唔到口，我哋6個人分就輕鬆處理，但如果兩口子就要三思👀整體來講，我想再食芒果爽，過咗3日去，無貨LU🙉

多謝朋友介紹 & Carry，仲要下晝3點幾去去到好好彩哋唔洗點排隊，真係好好彩！滑嘟嘟嘅客家糍粑 (糯米糍) 全部都係即場現包現賣夠晒新鮮。因為用人手製造嘅始終份量有限，所以都係限量發售，賣晒就冇㗎啦💛呢度嘅糍粑經過改良之後比傳統嘅減少膩滯感。煙靭又軟糯嘅皮入面包裹住唔太甜又好有芝麻同花生香氣嘅餡料，粒粒都好飽滿，一啖咬開完全接唔曬入面嘅料，所以温提：記得墊好個碟仔先食 😂温提二：越快食越好食！記得唔好過夜，唔好入雪櫃否則個質感係會大失色~

呢排好想食糯米糍，第一次去滑嘟嘟佢拉左閘唔開，白白浪費左時間同停車場費，過幾日之後係屋邨樓下d麵包舖買2個頂住癮先，今日難得準時收工，再楂去睇下有無開啦，今次有開啦！即刻買左2盒，但係好失望，個皮厚到好似我包果d甘，又唔彈牙，同埋應該唔係今日包既，個皮已經有小小硬啦，糯米糍新唔新鮮一食就知，真係無得厄人，同以前既一個天一個地！！唔怪得而家成日做團購糖水，出左名就間間都係只向錢看，但唔會控制下個質素，個糯米糍真係唔會再食佢，好失望⋯⋯仲有仲有，要買佢記得要帶袋去，膠袋要收$1，但佢唔係預先包裝食物。

去大埔墟街市食晏，之後經過滑嘟嘟，諗住買盒糯米糍做下午茶。但呢間嘢試過就算，因為包糯米糍個女人態度勁差。我後面有個auntie 問芝麻糊使唔使排隊，個女人就喝佢去另一邊，之後有人唔知問乜，佢又話我哋夜晚9點先收，而家手就得一對。好啦咁差唔多到我哋買，6粒食唔哂問佢有冇得散買，佢又鬧話逐個逐個嚟，我其實都係費事到時冇得散買，要諗又畀你小先想問定啫，咁你哋3個人都係答一答。至於佢哋嘅糯米糍唔係我杯茶，餡係多但好散，皮好痴手，食到好論盡。以前喺馬路位態度唔係咁差嘅，而家出咗名可以鬧客啩，不過算啦，反正佢都唔志在。

《滑嘟嘟》初開業喺街檔嗰陣已經有幫襯佢買【 芝麻糊 】，就算佢殺入熟食市場之後點樣漲價都好，佢仍然係處於較低價位嘅水平。CP值更加唔駛講，直頭爆晒燈。芝麻糊通街都係，亦都食過唔少間。唔係大隻講，我斗膽講到呢一刻，滑嘟嘟嘅芝麻糊唔好話「全大埔」，直頭係「全香港」最好食！BEST BLACK SESAME SOUP IN TOWN 無他，真材實料冇膠味，其他任何一間糖水舖，啲芝麻糊硬係或多或少有種膠膠地嘅淡口味，表面令令地咁，味道似沖粉，感覺就好似溝咗好多水咁。滑嘟嘟果啲完全真材實料芝麻味，分別好比喻為豆磨咖啡 vs. 即溶咖啡。明白到就好似煮咖喱都會有杰有稀，滑嘟嘟夠杰得嚟又夠味，口感最solid，啖啖都係。呢一點至今仍然未食到第二間有呢個水準。【 糍粑 】極為人氣但只係耐唔耐食下，芝麻餡唔駛再講，外皮極為柔軟Sweet Bon Bon 但不缺咬感。糖水唔會成日食，耐唔耐先嚟一次，所以嚟親幫襯根本冇可能忍倒唔叫芝麻糊。結果其他甜品至今完全未食過。100%芝麻糊！食完真係返唔到轉頭，若然有朝一日冇得再食滑嘟嘟芝麻糊，我諗戒甩佢都好過食出面其他糖水舖咁喊苦喊忽．．．

今日途經大埔，就去大埔墟街市睇吓有冇大家都話好味道的糯米糍買啦！呢間滑嘟嘟上次去就無開門。。。今次終於都試到喇！🤗🤗🤗星期六，2:10p.m. 到。。。都見到一條人龍在排隊。。。只好照排。。。足足排了20mins.....先買到。。。是即叫即做的。。。只得芝麻花生餡。。。一盒3個售$20，由於只得一個人包糍粑所以等嘅時間就長一點。。。味道不算太甜，芝麻味香。。。只是略嫌皮厚了點。。。如果能皮薄一點就更好！整體不錯。。。

本來想去大埔墟街市搵魚蛋粉食，但係慢咗一步，冇唸過魚蛋粉檔收10:30，惟有去隔離舖搵甜品當早餐😋呢檔嘅糯米糍即場新鮮包，花生芝麻餡爆多，較碎身，一路食一路漏出黎。不過糯米皮軟糯又薄身😋 唔太甜，值得一試👍Freshly made mochi in Taipo, the skin is thin, with sticky and stretchy texture. The black sesame fillings are fragrant which blended well with the texture of peanut crumbs. Not too sweet. You won’t feel guilty eating more than one. 😋

今日入嚟大埔除咗飲茶之外，其中最主要嘅一個目的就係黎滑嘟嘟，喺我心目中佢嘅客家糍粑絕對稱得上大埔名物必買手信之一。如果唔係因為住得遠嘅關係，我真係每個禮拜買一次都可以嘅。飲咗茶行過嚟大概十一點四十五分，坐喺度等一陣大概十二點正準時開門，一到十二點就見到姐姐喺度開始整客家糍粑，見佢搓糍粑嘅時候已經感覺到嗰種軟熟，毫不猶豫買咗兩盒(六粒)。我喜愛佢個花生芝麻餡唔會太甜，食落去好純天然，而且一粒粒好有口感。由於個人喜好嘅關係，特別叫咗兩粒係冇餡嘅，因為佢個皮實在非常之軟熟，縱然冇餡料喺入面都好好食，絕對係值得一試~