大班麵包西餅 (Closed)

因為同事生日,秘書小姐特登訂左個生日蛋糕,即日訂即日取,十分新鮮!原來唔係間間大班可以即日做晒,係因為呢間大班自設餅房先得,而且一個鐘後有得,又真係好快喎!要左個朱古力雜果蛋糕,仲話有個名堂叫雪姑七友,何解?原來七友係指蛋糕面有七大粒士多啤梨!呢七粒士多啤梨又真係比一般大粒,而且每粒都有一半塗上白朱古力,好在味道唔酸,不過又唔係好甜喎,ok啦,反而舖滿蛋糕面中央既蜜桃就又甜又多又好味。朱古力味既蛋糕真係好鬼軟熟呀!比起上次食果個普通味蛋糕勝一籌,因為有朱古力味,的話好味好多,而且朱古力得黎唔會太甜,個蛋糕邊又有少少朱古力碎,但係又係唔太甜果隻,幾好!雜果份量一般,唔會好多,但唔算太少,合理。稍遜既係,太多忌廉喇…印象中,大班既蛋糕一向多忌廉,其實唔係咁好…太多喇!不如減下忌廉份量,俾多少少雜果我呀!哈哈!

老闆娘生日,大家買左個蛋糕番黎賀壽!個生日蛋糕賣相幾靚,係心型,有好多士多啤梨,鋪滿成個蛋糕面,側邊全部係雲石色朱古力片圍住,又有條金色幼絲帶綁實,見到已經想食!(因為士多啤梨好大粒,我又鍾意…)味道方面,雖然只係普通蛋糕,但估唔到大班的蛋糕會咁軟熟,兩層蛋糕夾住一層cream加士多啤梨.衰在中間層太厚,太多cream,不過好在士多啤梨都唔少(呢層的士多啤梨已切粒,但仍大粒),個蛋糕面又係,除左士多啤梨外,其他位置全係cream,對於我地一眾女孩子而言,撥都撥左好多去…浪費…每人分到兩粒粒士多啤梨,好在唔酸,不過粒粒都被灑左好多糖粉,反而令士多啤梨失色=.=總括黎講,樣覵,蛋糕軟熟,抵讚!惟忌廉太多,要彈!

lunchtime經過，呢度有焗爐，好多時lunchtime都有熱肋肋出爐的包。男友和我都好喜歡食新鮮麵包。果日試了熱肋肋出爐的pizza包，餡料有腸仔，青椒，茄汁及芝士。新鮮焗起，份外好味。呢度仲有好多其他款式的麵包，真係可以多d試。

被蛋糕師傅的表演吸引，註足呆看數分鐘。便順便買個麵包才走。呢期似乎做緊台式菠蘿包的推廣。眼見至少六款不同餡料的台式菠蘿包，有鹹有甜，全部五蚊個。買了「北海道乳酪」和「日式紅豆」餡料。台式菠蘿包係一種奶酥皮的麵包製法。在加國唸書時，當地的臺式連鎖超市整得好好味！「北海道乳酪」的乳酪餡好好味，有日式風味！「日式紅豆」的奶酥皮係混入蜜紅豆，餡料係好腰豆，幾cutie。五蚊一個麵包，係幾足料，絕不「食風」。另：大班改革後，舖面靚左，店企理左，係增值！

第一次lunch去買包,嘩,勁多人, 間細細舖內逼滿人. 面包有好多選擇,仲有一個櫃專賣三文治,沙律之類,有機會一定要試下. 見不停有新鮮面包出爐,香得好緊要,雖然我己食左湯面做午餐,但都睇到流口水. 之前係第間分店買過"肉鬆美奶包",係四個小包黐埋,好鬆化,今次就買左一大舊丹麥厚多(Danish loaf),只係6蚊,佢幫我切為四件,一件夠我當一個早餐了.

經過金鐘大班, 見到"洛克金薯紅豆包", 即刻令我諗起最愛洛克藍莓包(銅鑼灣TIT*FO既招牌貨-- 酥皮藍莓忌廉芝士包), 二話不說就夾去俾錢. 咁O岩無散錢, 用八達通付款仲順便增埋值, 但行到地鐵站時發現唔見左個八達通, 先知道自己唔記得拎返! 好彩返到去舖頭未關門, 而且八達通真係漏O係度, 否則買個5蚊O既麵包就無左$500(剛增值)!但係唔明店員點解唔提我拎返個八達通!(因為俾完錢後仲O係舖頭內花左2-3分鐘時間擺好麵包同銀包)一直都以為"洛克"呢個名係TIT*F自創O既, 但係睇黎呢個名係指有酥皮包住O既麵包. 大班呢個配搭幾特別, 但係金薯太乾,配上紅豆餡就係乾上加乾,無忌廉芝士咁配合麵包上O既酥皮. 而且金薯唔甜, 似薯仔多過蕃薯, 整體認真麻麻地!

於13:00-13:30呢段peak hour, 我只得30分鐘食lunch, 唯有買個麵包食, 好耐冇黎過金鐘, 原來金鐘廊開左間大班, 我見人頭湧湧, 又不斷有麵包從廚房被端出來, 於是就決定係呢度揀返個麵包醫肚! 剛剛有一盆麵包被端出來, 叫紅豆菠菜菠蘿吐司, 都幾啱我口味, 而且又新鮮, 於是就買一個啦! 攞上手, 熱騰騰, 咬入口, 軟軟熟熟, (除左麵包底有點似方包邊般, 硬些少), 麵包係菜綠色, 明顯地混入左菜蓉, 不過食唔到菜味, (因菜本身唔會有特出既味道), 麵包之中, 間中夾住點紅豆蓉, 份量唔多, 分佈零碎, 但勝在甜味適中, 絕不似豆沙般甜到漏, 整個麵包上有一層菠蘿皮蓋著, 皮很脆, 因新鮮熱辣, 但頗甜, 加上我一向唔愛食菠蘿包, 所以對呢塊菠蘿皮唔太欣賞! 總結, 呢個麵包算好味, 加上係出爐麵包, 零舍不同!