得如酒樓 (Closed)

(4/6)晨光乍現的星期天，上茶樓，還不記得甚麼時間是早上五、六時飲茶。其實環境、意境更勝食物，各階層的茶客亦有，不乏老人家、夫婦、甚至公仔......繼續飲茶，香片，本人常叫的心水，而龍井留待下次吧。燒賣，冬菇、蝦肉、鮮肉報到，濃郁的肉味，一件起，兩件止。蝦餃，不是差的，當然不是晶瑩蝦餃皮，有些暗淡的蝦餃皮，很久沒有吃。而馬拉糕，意外地不太好味，一口便知，剩了一大件。老百姓，還是繼續喝茶。曙光乍現，但陰霾不散，昨日、今日、明日，撥雲見日，何去何從？

唱K團一晚苦戰後，聲嘶力竭，散Band前先祭五臟廟為妙，星爺的意見是到老酒家：得如，眾人暈暈噩噩的，在無反對票下就拉隊去試下。行開附近都會被那磅重機吸引，講真，可以將佢放入博物館收藏，門後入兩蚊搖兩野的電動飛船，香港地都幾難搵得返咁懷舊的玩意，當然，懷舊還懷舊，除非阿隔離屋個死o靚仔得罪你，否則都係敬而遠之。估唔到舊酒家都有電梯，搭上一樓，熱的要命，阿叔話樓上啦，樓上有冷氣呀，見唔到有雀籠，無留下的理由，轉戰樓上。掛著亂影一番，吉檯多的是，卻見柴娃娃卻四圍穿插，原來是想找個較涼的位置，冷氣忽冷忽熱，又是特色之一。早茶，老規矩，有乜叫乜，蝦餃、燒賣、蝦／叉燒腸、煎三寶（魚餅、蘿蔔糕、鮮竹卷）、馬拉糕，阿姐落力的推介裹蒸粽，份量大得嚇怕人，好意心領；腸粉端出來時阿姐又問要唔要加油，相信無幾多酒樓可以見到咁既場面，再加埋油膩膩的煎三寶，怪不得食客絕大部分都是中年人士，最特別的是燒賣，豬肉加蝦加蟹籽，是潮流之作。又瞄瞄環境，貼著嚴禁吸煙的牌，四周卻是煙霧迷漫，幾滑稽，倒不如貼張廿年前光頭阿叔的經典廣告：「如果當日唔食煙，今日就唔會係度同你講野」好過。懷舊照：http://www.imagest

星期日下午跟朋友忽發奇想來到得如, 已經兩點. 可能因為落雨的關係, 比較少人, 多數是單拖亞叔亞伯. 這裡環境非常舊式, 沒有冷氣, 舊式的茶壺和痰罐, 膠板枱面白色瓦仔牆, 推車亞姐只得一個, 錯個了一班'車'便要等十多分鐘, 所以我們都狂掃車上的點心. 亞姐的態度極度友善, 而且非常好耳, 不用像其他酒樓般要大聲呼叫. 雖然因為晚去點心已賣得七七八八, 沒太多選擇, 但平均質素不錯, 最值得吃的是蓮蓉飽, 絕對是皮薄餡靚, 蓮蓉分量極多, 而且像月餅的幼滑. 還有傳統的糯米飽, 是用雲吞皮包糯米的小圓包, 也很好吃. 我們四人叫了十籠點心, 很飽. 下次會吃亞姐極力推介的奶皇飽.

諗著食個feel, 十一點幾去到, 得兩架點心車, 而且好少點心, 等左幾個字, 終於有新車出, 拿拿聲叫兩個點心先, 質素可以啦, 環境麻麻地, D客人D樣都幾凶, 通風唔夠, 又唔俾帶雀仔, 有D失望. 如果做到好似澳門龍華咁樣就好喇.

o係上海街未到果欄既街口，有呢一間只會o係80 年代出現既茶樓。佢既格局，猶如n 年前未執、未翻新既新光酒樓，佢既食物，仍然停留o係n 年前用無蒸鍋底既推車、又或者靚姐捧餐咁serve。有時會懷疑自己返番80 年代...佢唔似得蓮香樓、龍門大酒樓咁車水馬龍，食物既質素亦都不能用以比較。佢有既，係等待被淘汰既舊式酒樓有既特色。

要還人情債，下午落新填地街幫朋友做左幾個鐘，佢話未食飯，就同佢一齊去搵食。唔經得如，佢問我試過未，名聽過但就未試過，就來吃一吃。樓下有唐餅賣，仲有果部人咁高的橙色磅，加上一檯一個痰罐，淨睇呢幾樣野就知這裡絕對是本地的文化遺產之一。客人多是上了年紀的或打赤膊的勞動階層，大半人在吞雲吐霧，是非常典型的舊式茶樓的場景。四點幾已經無晒點心，唯有沖壺普洱叫碟頭飯，佢叫了火腩斑塊，我就叫了碗瓜粒湯飯湊下熱鬧。即叫即製熱辣辣，可能吃的也是靠勞力搵食的朋友，碟頭都不少，朋友的那碟飯兩個人分吃也會夠飽。水準不是十分高，料足而不是正貨，亦有味精的點綴，我的瓜粒湯飯比不上蓮香的，但已交足功課。價錢都係三、四十蚊，都可算是抵食的街坊茶樓。檯面、檯布、餐具、廁所的衛生水準還是停留在廿多年前，一些對上述東西有嚴格要求的真的不要來試。但我來說就沒有所謂，志在一試，都可以體會一下地道舊式茶樓的味道。況且如其他食家話齋，呢度隨時會拆，始終呢類舊式茶樓已買少見少。

前幾日ｌｕｎｃｈ同左同事去左　得如酒樓（位於油痳地）飲茶。一樓煙霧迷漫＋嘈，可能大部份都係工人啦，個亞姐叫我地上二樓，嘩！上到去，成個感覺唔晒！整齊好多＋清靜，裝修又唔同下面喎～一坐底，茶都未到，Ｄ車仔已經圍住我地張臺啦＠＠”個個都叫我地食野！由於佢地太過熱情啦，我地都叫左個點心平息下佢地先！壽眉茶到啦！ｕｍ．．．好香，但入口後冇甘甘地既感覺。我地食左Ｘ春蛋燒賣、春卷、雞札、同一個勁大既咸肉粽！Ｘ春蛋燒賣：細細周圍都有得食，返而大個到到都冇得食。春卷：包住原隻既蝦！正。雞札：個舊白色既野（唔係叫咩名＜魚肚？＞），好大舊！好爽！咸肉粽：唔錯，綠豆好”林”同大件，可惜豬肉唔肥。埋單２人：７３可能我地生面口啦，個Ｄ推車仔既婆婆時不時都推架車黎，望住我地＠＠”，有Ｄ仲同我地傾計ＴＩＭ～，舊式酒樓就有哩Ｄ人情味，個個笑住對你^^今次冇帶ＤＣ，下次再去時，一定要影返幾張先得～

呢度係舊式茶樓風格,D 點心都係舊式0既.必試雞球大包,份量大,經典在用0既料係傳統做法0既有骨雞件(所以千祈唔好大大力一啖咬落去),好有古風.另一樣就係千層糕,充滿豬油香,甜到入心,絕對係古樸風味(怕甜可以用茶送,傳統千層糕係幾甜0架).