嘆撈

Open Now

Now Closed

唔好睇店舖細細間，除咗撈麵，甜品都有得食~自選嘆撈先揀麵底，有涼麵、涼皮、紅薯皮同酸辣湯粉，今次揀咗涼麵，食落爽口彈牙，餸就揀咗麻辣雞軟骨，份量好大方，嘆撈醬汁香辣醒胃，加埋配菜嘅花生、炸黃豆同芫荽，口感豐富又清爽。下次會試下淨爆蒜撈，因為會有蒜油，蒜味應該再勁啲，啱哂我呢啲愛蒜之人。配料都幾多選擇，例如牛𦟌、鵝腎、金錢肚呢啲特別部位都有，難怪有不少人光顧。楊枝甘露芒果鮮甜好吃，加上柚子微酸嘅刺激，零舍開胃。西米粒粒分明，而且加入椰奶更加香滑，夏天飲碗最解暑。除了以上特色甜品，還有經典糖水，老少咸宜。

去朋友探屯門順便買嘢上佢屋企食，朋友推介呢間以涼拌為主打嘅餐廳，嚐辣嘅我特別鍾情涼拌麵食決定一試，揀咗牛柏葉嘆撈（$48），自由配搭涼面/涼皮/紅薯粉/酸辣粉，配料有牛柏葉+鹿茸菇+青瓜，配料豐富，三款配搭有多重口感，味道清新，包裝用心，醬料分開上唔怕影響麵質，醬汁揀咗小辣，辣度夠刺激，秘製醬汁非常惹味，提升整體味道。唔食辣嘅朋友可以選擇蒜撈，相信一樣咁惹味！另外加咗小食口水手撕雞（ $35 ），份量算多，雞肉嫩滑，醬汁味道一樣調校得不錯，撈埋落麵一齊食更加豐富！仲有多款辣同唔辣嘅小食及糖水供應，整體性價比高，款式多，外賣包裝精美，下次嚟探朋友會試吓其他小食同撈粉皮～#hkfoodie #foodiehk #hkfoodies #foodblogger #hkfoodieblogger #hkfoodielife #lovefood #香港食評 #食好西 #屯門美食 #屯門 #tuenmunfood #tuenmun #平靚正之選 #外賣 #外賣自取 #性價比系列 #外賣之選 #粉皮 #涼麵 #口水雞 #糖水 #屯門外賣 #屯門糖水

上次食咗嘆甜品，今次就試下嘆甜品嘅另一條line——嘆撈✨ 雖然都係同一個呀媽生，但嘆撈主打係鹹食，嘆甜品主打係甜品，兩間舖嘅距離好近～ 食完正餐食甜品就無走寶🤙🏻雖然舖頭唔算多位，但野食整得好出色🤤1️⃣ 大盛。嘆撈 🥣要撈就撈個最大嘅🙈 大盛嘆撈果然料多又夠哂大，豬頸肉、牛柏葉、手撕雞集於一身😆豬牛雞齊哂之餘又有木耳、菇同青瓜等嘅配菜，仲可以揀要嘆撈、爆蒜撈定酸辣湯🙌🏻我就揀咗有炸花生🥜 炸黃豆同爆多青瓜絲🥒嘅嘆撈，麵底就揀咗涼麵，涼涼哋嘅麵啱晒而家呢個天氣食，麵質亦夠哂彈牙😆手撕雞好嫩滑、牛柏葉就滑捋捋🫶🏻豬頸肉好結實添🙀 仲有4-5件咁大塊🤘🏻而木耳同菇就嗦嗦聲好爽口😍2️⃣ 白桃烏龍茶 🍑有別於出面嘅白桃烏龍茶，呢到嘅真係堅無糖嫁🙈 所以如果飲慣甜野嘅話最好都係揀翻無寫明係無糖嘅野品🤣 有白桃味得嚟茶味亦夠哂濃👍🏻 飲下無糖嘅扮下健康嘛🤫

涼拌就是種怪東西！點解？因為間中都會好想食，尤其係口淡淡想搵下刺激嘅時候。今次去左附近嘅小店止下癮。原來仲係附近一間甜品店嘅姊妹店，聽聞窩夫都好正，下次try try🫶🏼 .鋪頭細細但有好多選擇，除左撈麵、滷水小食仲有甜品👍🏻但今次一丁友就試得唔多。.雞嘆撈 HKD48入面已經配埋手撕雞、雞軟骨同青瓜絲，麵底就揀左紅薯皮，第一次食紅薯皮，都幾特別，係一塊塊咁，沾埋醬汁好惹味，紅薯皮口感QQ ! 最欣賞佢唔會油淋淋但又會夠味。超大一碗👍.五彩冰粉 (跟餐加$12)好抵呀，加多十二蚊有碗冰粉！食完辣嘢整碗冰粉，好～～爽！有芝麻、提子乾、山楂粒仲有黑糖漿，甜度剛剛好。.麻辣鵝腎 HKD35通常出面食都係麻辣雞腎，呢度用鵝腎又幾特別而且超厚切，份量又多👍🏻鵝腎比起雞腎質感軟稔啲，我幾鐘意！個底仲有青瓜，好fresh !

今日在嘆撈店，撈左兩個麵食大盛嘆撈$69配涼麵手撕雞+豬頸肉+牛柏葉＋鹿茸菇+木耳。(BB辣)材料雞肉、豬頸肉，牛柏葉爽口，(即日整即日撈，所以冇隔夜野嘅感覺)另一款係牛嘆撈$48配紅薯粉金錢肚、手撕雞(BB辣)我走炸花生同炸黃豆。碗內有好多青瓜絲，可令到味覺冇咁辣。再叫左蒸魚肉燒賣12粒$29老闆娘落左辣椒油同芫荽。辣椒油好香配魚肉燒賣好食。食咗成碗辣野，緊係要飲凍野。叫左兩支龍眼肉水(老闆娘每日煲咗雪凍)微甜、解渴。除咗揀咗主食外，佢哋每碗都加入配菜，大家可以選擇性要唔要。(芫茜、育瓜、炸黄豆、炸花生、青瓜、紫菜、櫻花蝦、芝麻)

今日俾屯門呢間嘆撈嘅抵食爆蒜撈麵吸引咗嚟，餐廳喺紅橋呢邊，同嘆甜品係姊妹店，糖水一定有返咁上下水準☺️爆蒜豬嘆撈 $48入面有豬頸肉同雞腎，而呢度嘅滷水都出名，豬頸肉同雞腎都有淡淡滷水香，爆蒜口味會比一般多咗櫻花蝦，加上bb辣爆蒜芫茜等撈埋黎食非常滿足，份量一碗啱啱好🫶🏻跟餐可以優惠價加配埋飲品/甜品+$12椰汁西米露，清甜香椰汁味，西米露口感幾好，食完又辣又蒜嘅惹味野食好適合加埋個甜品清一吓🥰另外仲叫咗一份麻辣雞軟骨涼菜，裝滿晒一碗仔，小辣嘅程度啱晒我口味，呢啲香口嘢一定冇輸可以一試🤤

上個post就介紹左屯門友必食嘅嘆甜品當日都食左正餐 就係嘆甜品嘅姊妹店主打食四川撈麵同爆蒜撈🍜麵底可以揀涼麵/涼皮/紅薯粉/酸辣湯粉麵款嘆撈/爆蒜撈 唔同辣度🌶️豬嘆 配粉皮 $48主要餸料係豬頸肉+鵝腎豬頸肉肉質口感都幾有嚼勁 鵝腎仲好爽口😗嘆撈係四川風味 有芫茜 花生 炸黃豆 青瓜絲等 配料十足 相當開胃👅雞嘆撈 配涼麵 $48主要餸料就係手撕雞+辣雞軟骨手撕雞滑辣又有好香麻油味 而雞軟骨就微辣 有成十幾廿粒 份量十足之餘 脆卜卜好有咬口😆配埋惹味爆蒜撈 令個味道再昇華可以另外加埋辣汁 辣汁勁惹味 辣得黎仲甜甜地口感同味道上都好出色 啱晒鐘意食辣嘅朋友!😇

嘆撈🥙爆蒜蟹籽紅薯皮🍜$48真係爆多蟹籽，每一啖，口入面都有粒粒蟹子爆發，加上青瓜絲就更加清爽，紅薯皮一塊塊咁食，著白色衫都唔駛怕彈汁，蒜味辣味好平衡，兩種味令所有食材變到好惹味，令人食極唔停！👍🏻口水手撕雞🐔 $35第一次食無紅油既手撕雞，以為個雞絲會好乾身，食左啖先知，所有汁都比雞絲索晒，個雞絲係外乾內爆濕潤。當食個雞絲覺得太重味，可以食埋下面既青瓜粒，雞絲同埋青瓜粒加埋，簡直係Perfect match！😍

夏天無咩胃口，最啱食涼皮！🔥喺屯門除咗有好姊妹涼皮之外，就係嘆甜品舊址轉營嘅嘆撈！🍜鋪頭比較細間，因為撈麵/撈涼皮無湯，外賣嘅質素都唔會太大影響，通常都係拎返屋企食！佢啲涼皮唔似好姊妹嗰啲咁滑，比較似粉皮，但就可以吸多啲汁，而汁嘅味道蒜香十足，加埋脆卜卜嘅炸黃豆同花生，仲有青新嘅青瓜絲，🤗真係好開胃！🐮牛柏葉•嘆撈 $48佢嘅餸都係 fix 咗，之後可以揀麵或者涼皮。呢個牛柏葉撈喺我嘅首選，有牛柏葉同鹿茸菇，兩樣都好爽口！🐷豬•嘆撈 $48有時都會食豬撈，有豬頸肉、鵝腎，兩樣都好厚肉，同啲汁好夾！🥥椰汁西米露 +$12始終係嘆甜品嘅分身，都係有糖水賣嘅！叫撈麵加$12就可以配糖水，幾抵！

•屯門 | 嘆撈哩間小店已經幫襯咗好多次舖仔細細 堂食嘅位置唔多不過食物種類就有好多選擇想食糖水又有 鹹食又有 小食都有🤩嘆撈除咗自己可以配搭唔嘢嘅餸之外仲有佢嘅精選 岩晒選擇困難人士(´▽｀)！牛•嘆撈金錢肚 手撕雞 青瓜絲 黃金豆 花生 涼麵醬汁係另上嘅 可以按自己喜好去加🤍手撕雞好嫩 金錢肚滷得超入味好淋麵質好彈牙 辣度岩岩好帶好香嘅椒麻味配埋青瓜食好清新 真係好岩夏天食入面嘅黃金豆都好脆好香口🫶🏻另外芫茜愛好者仲可以加5蚊要爆多茜㗎！口水燒賣炸燒賣食過 普通蒸燒賣都食過口水燒賣就第一次見 燒賣好彈牙比起平時食蒸燒賣點辣椒豉油多咗陣麻辣香仲有啲芫茜係到好香🤤

《嘆撈》📍屯門站💜雞🐔嘆撈(唔辣)🥢 💰$48涼皮幾有咬口，質感再加啲唔辣嘅芝麻醬汁就更加滋味爽口o(^▽^)o入邊仲有雞絲同微辣嘅雞軟骨，食落一啲都唔靭，而且係本身已經調咗味，有少少似食海南雞嘅嗰種口感，雞軟骨咬落好爽口，脆脆的感覺🤤伴菜仲有大量嘅青瓜絲、花生粒同埋芫荽，成個配搭都好清新好適合夏天嘅時候食!🔅幸福指數：😻😻😻😻/5💜桃膠雪燕西米露(冷)🥢 💰$43依一個甜品簡直就係女生的滋潤美顏之選!🤭一𢳂起就望到有兩大粒桃膠，另外旁邊仲望到有三份一咁多嘅雪燕，再配埋大量的椰汁西米露，真係又滋潤補身，又滿足到大家的甜品胃(^-^)幸福指數：😻😻😻😻😻/5*不需另加一服務費Yumyum舔舔脷指數：🧸🧸🧸🧸🧸/6環境指數：🧸🧸🧸🧸/6服務指數：🧸🧸🧸🧸🧸/6性價比指數：🧸🧸🧸🧸🧸/6回頭指數：🧸🧸🧸🧸🧸/6(滿分為🧸🧸🧸🧸🧸🧸)以上屬小編主觀(非專業)食評，所有意見只供參考( ´▽｀)📍嘆撈🗺 屯門井財街15號金銘大廈地下4號舖

餐廳：嘆撈地址:：屯門井財街15號金銘大廈地下4號舖幾時都話紅橋好多好嘢食，每次帶狗仔過嚟睇醫生，都一定會搵間幫襯試下今次試咗呢間叫做嘆撈，幾特別丫，係專食撈麵，花多眼亂太多選擇，最後叫咗個乜都有曬嘅大盛。嘆捞 配涼麵 $69另加皮蛋$8材料：手撕雞+木耳+豬頸肉 牛柏葉+鹿茸菇+青瓜配料：芫茜,青瓜,炸花生,炸黃豆 我唔食得辣，叫咗bb辣都接受到，好好味呀！！！味道啱啱好，特別係鹿茸菇，估唔到配撈麵係咁好食！全部配料都係爽口，仲加埋炸黃豆同炸花生，如果我下次自選，無論叫咩餸，我都一定要叫 鹿茸菇+青瓜，就算淨麵都好好食。

嘆撈屯門井財街15號金銘大廈地下4號舖味道指數：⭐⭐⭐⭐⭐抵食指數：⭐⭐⭐⭐⭐環境指數：⭐⭐⭐⭐服務指數：⭐⭐⭐⭐食物推介：大盛嘆撈 $69，五寶滷水拼盤 $59，椰汁西米露 +$12，自家龍眼水  $18等候時間：0分鐘大盛嘆撈：內有手撕雞、木耳、豬頸肉、牛柏葉、青瓜五款食材，手撕雞嫩滑，木耳爽口，豬頸肉彈牙，牛柏葉有層次感，青瓜不會出水，涼麵清涼易入口，隨個人喜好淋上足夠麻辣汁，頓成可口美食！😋😋😋五寶滷水拼盤：內有雞腎、金錢肚、牛柏葉、木耳、鹿茸菇五款食材，雞腎切得厚薄適中，咬落既爽夾脆；金錢肚滷水汁很入味，其獨特紋理更能增添口感；鹿茸菇菇味濃香，清甜多汁！👍👍👍椰汁西米露：椰汁清香解渴、西米冰涼軟滑，食完麻辣主菜再食椰汁西米露，更感滋味！😍😍😍自家龍眼水：龍眼肉勁多、龍眼味濃郁芬芳，樽裝賣相討好，令人一飲再飲，暑氣全消！👏🏻👏🏻👏🏻

嘆撈地址 :屯門青菱徑3號東威閣地下G02號舖 味道指數：⭐⭐⭐⭐⭐抵食指數：⭐⭐⭐⭐⭐環境指數：⭐⭐⭐⭐服務指數：⭐⭐⭐⭐⭐食物推介：大盛 嘆撈、鹵水拼盤、西米露、龍眼水等候時間：5分鐘最近發生屯門這間外賣小店嘆撈價錢既便宜又好味，今日幫襯，門口已經有很多顧客等候，而且還有很多外送外賣。大盛 嘆撈 $68👍👍👍手撕雞+木耳+豬頸肉+牛柏葉+鹿茸菇+青瓜+涼麵有五款食物在撈內，而且份量充足，足夠一個大人的份量。食物香味濃郁，喜歡吃辣的人配上辣汁，分外惹味。夏天吃撈麵最好不過，有清涼的感覺,！正！鹵水拼盤 $55😋😋😋一盒食物有齊五種不同的款式，只不過是55元，非常抵吃！西米露 $12🐧🐧🐧甜度適當中，西米爽滑龍眼水 $18😍😍😍濃濃的龍眼味，非常消暑解渴！

芋圓好好食，可以再encore……吖咗個熱嘅木瓜雪耳糖水，糖水一般，唔夠熱，唔甜，唔潤…….另外，叫咗大盛嘆撈唔辣，個汁勁唔掂，冷麵好重鹼水味，啲餸一般，black list …..