潮滋味

Open Now

Now Closed

我第一次食以往喺電視見過介紹但係冇諗過香港有得食潮州菜茶…只星期三、六供應真係好好味一啲都唔肥而且好香口好惹味仲有小米、馬鮫魚丸、咸湯丸、同埋鹹面猴, 唔好唔記得試埋傳統飲品九毛膏!😝

石門唔同菜式嘅餐廳都有，今次試咗呢間潮流菜，用OpenRice自取外賣，超方便，仲有discount添🙈馬鮫魚丸：聽講係本店特色，口感有d似粉菓，細細粒，咬落彈牙好味，特色小食可以一試😜香茜叉燒腸： 個賣相同平時食開都幾唔同，不過食落味道有保證👍 份量充足，有機會一定要再試下佢d腸粉🤔🤔

之前食過小米跟牛丸湯，因為怕腸粉唔可以走香茜蔥，之後發現佢地會問下人食唔食，落單時禁埋。所以今次試下腸粉，一早講走茜蔥，單都落岩，但返到去發現無走到。唔知係廚房無走定執餐時執錯比我啦，結果好努力咁了返出黎。睇得出腸粉已經放左一段時間，發脹同吸哂鼓油。叉燒少到無朋友，得半粒半粒咁，比起酒樓差好遠。最後放係底果兩條，中要一條得一粒叉燒，（如圖）食到最底2條見到一粒叉燒，o左咀，係咁了都係得一粒，最搞笑係兩條茜蔥都無埋，見到少少茜蔥果半其實原先係放係面。極度懷疑係專登整少料被，所以放係底，結果有食齋腸既感覺🤡套餐價同出面散叫腸粉加小米差唔多，多杯野飲咁囉。

食物款式特別。香茜叉燒腸粉腸粉口感有少少煙韌，唔係好粉或者好易散，讚叉燒粒亦都幾多，配埋芫茜食好好味。海豐小米第一次食呢樣野，望落去似迷你粉果，個皮都似嘅，但個餡似係有啲豬肉同蝦米？幾特別，但個皮都比較厚，好飽肚。唔記得影蘿卜牛腩麵，但想讚個幼麵嘅麵質，唔係平時食開嘅麵，望落去似河粉，食落去似幼嘅刀削麵，帶少少煙韌，好味。肉同湯方面就不過不失，個湯底有啲似台式牛肉麵嘅湯底。而呢個價錢，有呢個份量，再跟埋飲品，都算唔錯。

最鍾意食佢嘅小米，細細粒，由以前細舖識到而家搬咗大店舖，雖然價錢輕輕微上升咗少少，但係知道鋪租貴冇辦法啦，每個禮拜都要食一次，真係好鍾意😂😂😂每次同老公都係叫兩個餐

今日到石門搵嘢食，去到京瑞廣場兜圈搵下，經過呢間食肆，店員見我倆企係門口望嘅時候，隨即跟我們介紹店內食物。反正呢間未些過，就即管試一試。叫咗兩碗牛丸湯、一個雞旦蝦腸粉、菜茶、蘿蔔同埋一碟似迷你粉果之類嘅東西。牛丸湯非常之彈牙，好有係汕尾食嘅感覺。雞旦蝦潮式腸粉就一般，可能食唔慣。碗菜茶係最喜歡的，如果落多些少花生同冬菇就更好啦。加埋兩杯凍飲，埋單係$160多元，食物質素係意料之外好的。

由小鋪幫襯到轉大鋪，疫症期間亦然不倒，我諗因爲真材實料有實力，值得支持。我諗香港無咩地方可以食到潮洲菜茶，今日早去所以食到逢星期三、六先有嘅菜茶，細細個嘅味道，同姑姐整嘅一樣，比足料大大碗。另外，亦有我好鍾意食嘅「麵猴」鄉下話叫「mi 膠」，香港出街食咗幾十年飯都未食過，只係自己屋企整來食，但又唔係個個鍾意食麵團，所以呢度可以自己叫一碗勁食，因為真係好多，好大碗，大滿足！其他推薦有腸粉、小米，阿仔上次食完都話好好食，記得要再來食。今次都叫左小食，雞翼好味，炸鮮奶no good，唔似鮮奶，都係麵團一舊咁，好漏！

今日和太太往石門京瑞廣場潮滋味食晚餐,我們點了南乳炸雞翼飯,南乳朱手米粉、腩汁生菜、海豐小米、炸鮮奶、熱菜蜜和凍菜蜜。南乳炸雞翼飯雞翼炸得金黃香脆,食落啖啖肉和有孜然粉,菜心爽口飯食落軟綿,整碟南乳炸雞翼飯食落惹味,口感十足；南乳朱手米粉朱手食落軟腍爽口；腩汁生菜新鮮爽口,牛腩汁香濃；海豐小米共有10粒,賣相有點似潮洲粉果,食落肉味香濃,皮薄餡靚；炸鮮奶炸得金黃乾身, 鮮奶味道香甜,口感豐富；最後凍菜蜜甜度適中。餐廳座位闊落,食物美味,食了一頓高質美味潮洲美食

週末去石門買嘢，順便幫襯下小店，呢間食潮州菜嘅餐廳門面小小，人流不絕，勝在轉枱快，所以我哋好快就有位。潮州菜餐廳喺香港通常都係打冷，比較少有潮式小吃。呢間小店有我最鍾意嘅皺皮腸粉、扁實（即係雲吞）、小米（冇食，唔知係乜），幾特別。另外原來menu以外仲有個唔係日日有嘅菜茶。好似好多熟客食，搞到我都想試，可惜已經落左單。叫咗一個扁實米線，呢隻雲吞皮有少少煙韌，有啲似魚皮餃。米線都好滑，簡簡單單未算係好驚艷，但都幾好食。另外叫咗個皺皮腸粉，之前都試過一次，我自己覺得個菜脯腸粉好食啲，多啲口感。不過最驚喜反而係個牛肉丸湯。牛肉丸一咬落去有少少爆漿嘅感覺，好爽口又夠肉味。雖然店舖唔大所以坐得唔太舒服又要搭枱，起碼地方乾淨裝修亦都唔老土，最緊要嘢食都算中上，所以有機會會繼續支持小店！

等待時間：假日中午時間，等左半毎個鐘室內環境：正正常，普通小店，叫做有裝修設計服務質素：尚可啦來到新地方揾食，同朋友見到一間潮汕食店，大家都好潮州嘢既，二話不說就排左呢間啦，聽人講本身呢間餐廳係只做外賣，因生意不俗，就搬來新地址，做埋堂食。我地心諗實無死啦，急不及待要食美味特色腸粉。我自己就叫左潮式腸粉配牛肉丸湯。我本身興高采烈一試腸粉,唉心情即刻跌到低谷，完全不行！腸粉都滑字冇任何關係，條野雖然左蛋同菜，都並唔香，係牛肉湯好少少，但牛肉丸質素同正宗比都仲有一大段距離...dun go ar

小胖好鍾意食皺皮腸粉，但香港有得食皺皮腸粉嘅小店並唔算太多，又要整得好食嘅更加少，咁啱今日去石門見到一間食潮州嘢嘅舖頭，仲要有皺皮腸粉食，於是決定試下。小胖叫咗份潮式腸粉伴海豐小米，飲熱綠茶(無糖)潮式腸粉的餡有: 蛋，生菜，冬菇，同埋豬肉碎， 佢嘅皺皮腸粉整得唔錯，腸粉唔會太厚，粉漿調得幾好，腸粉汁亦都唔會話過鹹，黏度適中。腸粉的唯一缺點係佢嘅豬肉碎過鹹，基本上如果你單純食豬肉的話，要不停飲水，即使加埋腸粉去食都係有少少咸海豐小米其實就係類似潮州粉果嘅餃子，入面包住豬肉，和腸粉一樣，豬肉亦都係有啲鹹，要不停飲水，而且餃子外皮 有少少油。不過佢嘅餃子皮唔錯，煙韌度幾好，如果可以再薄少少會更好！ 佢嘅餃子可以點辣椒醬或者係蠔油，但因為實在太鹹，點咗蠔油會超級鹹，所以我唔建議點任何嘅醬汁，佢單食已經好夠味道。小胖並沒有喺小店入面食，不過小胖觀察到佢嘅位置，唔算闊落不過都還可以，店員亦都十分親切，而且出餐好快。整體來講，呢間潮式小店嘅食物都ok，但如果豬肉嘅調味可以再淡少少會更好。

老闆娘好好人好親切，會好好推薦啲嘢食，嘢食都好好味。位置唔逼夾，而且唔會好嘈吵。食物嘅質素同埋份量都滿足滿意，重點係...呢間店主要推介係無味精無添加同埋自家製所有產品！！！

約了朋友吃雞煲又未夠鐘，不如係商場行下啦，竟然俾我見到有潮式腸粉吃喔，之前係大陸吃過好好吃，難得係香港見到點都要試下啦！小店一間，主要做潮州小吃，腸粉有套餐，不過唔想吃咁飽，而且套餐都幾貴，所以淨係試下個腸粉算啦。我最鐘意雞蛋瘦肉腸，所以就叫咗碟最普通的潮式腸粉($26)，假期一點都唔便宜喔，出面有d主打石磨腸粉都係$20左右，佢竟然要咁貴，就試試係唔係咁堅先。結果，好失望😔😔😔😔，首先份量少，雖然個碟好似好大，但收咁樣價錢應該真材實料d，豬肉碎只係搵到幾小粒，宜家豬肉真係貴，個汁超級超級鹹，明顯吃緊味精，吃完真心覺得失望!

今天到沙田「石門」辦事，順便吃埋午餐，楝了嘗嘗潮洲特色小吃。幾個款式有得楝，我楝香茜牛腩腸粉、馬鮫魚丸湯、酸梅汁套餐。香茜牛腩腸粉，坑紋形的腸粉掛著牛腩汁吃頗好味道，如果喜歡香茜，可為平淡的腸粉添香氣，牛腩夠腍，但份量比較少。首次品嘗馬鮫魚丸湯，馬鮫魚丸肉質帶點兒爽，味道不錯，魚味却不重，我向女侍應生請教，原來是汕尾特別地道美食，據她說馬鮫魚丸是從汕尾打做好運來香港出售，並謂會有熟客向店鋪購買生的馬鮫魚丸回家享用，我多口問價錢是$100一磅。甜甜酸酸開胃的凍酸梅汁夠大杯，$58潮式午餐可以一試，有機會再到「石門」會再試埋其他潮洲特色小吃。