華漢茶餐廳

Open Now

Now Closed

其實本人係第二次幫襯，今日叫同事去既時候已經面有難色，不過我叫到都照去。畢竟第一次去果陣都算不錯。聽同事講上星期再去比人趕，最重要係服務態度，所以要親身感受下係佢唔好彩的真有其事。入到去，大概6，7成滿，仲有幾張卡位，佢就叫我哋2人去撘枱。 ok 當你預陣間多客。 落單冇問題，問我哋飲唔飲湯，但係冇上，放低咗飲品，上埋我碟飯，見我對面個人兄（撘枱）食完，就叫我哋搬位，去撘另一張，果張有兩個阿叔，都食完飯，淨返飲嘢。啱啱嘢黎齊，就開始吹我哋，都未食完碟飯，就問我要唔要收走。我同事叫丁面多士，人哋拮起塊多士就想收人碗麵。再過多5分鐘，有個阿姐直頭行過黎好燥既語氣 講 “食完未呀出面好多人等”。 比佢攪到咩心情都冇，嗱嗱林食完走。 其實我12：40行入去12：58就走，真係浪費你咁多時間咩。大家去食做好準備就ok, 態度比人哋澳牛仲要差。

係觀塘返工嘅明友，會唔會覺得好難搵午餐食呢？我啲同事仲講笑話喺觀塘嘅餐廳食午餐有對筷子就要等位😂😂😂終於比我發掘到有一間小菜平靚正＄56蚊，三、四十款小菜任揀，大大碟裝修企理乾淨，包湯包嘢飲，凍飲都只係加兩蚊👍幾個同事一齊食好似夜晚食小菜咁，值得一題，男士一定好喜歡，白飯仼裝，仲要個例湯我哋幾個都覺得冇味精，讃😍😍另外啲職員姐姐好好，見我同事男仔成日問佢使唔使裝多碗飯🤣🤣同同事傾開先知原來呢間餐廳有20幾年歷史，只係搬遷新裝修，味道更勝從前😋😋

牛頭角呢邊出名好多各式各樣食市。今日就約佐啲舊同事食吓間有二十幾年历史既茶記。華漢茶餐廳。門面裝修有啲古董氣色!呢度既lunch set 一律58蚊包凍熱飲品。呢個價錢午餐來講可以接受丫！咕嚕肉， 唔太酸唔太甜，啲粉唔太厚味道啱啱好。加埋啲菠蘿變相係一道開胃小菜。椒鹽豬扒，個豬扒煎得好翠，加埋少少辣椒掉味，啲豬扒咁入味正呀。通菜牛肉，呢道感覺味道比較鹹咗一點。但加埋啲飯一齊食可以接受。午餐奉送中湯或者西湯選擇！

來左華漢幾次。次次都保持水準。小菜師父有功架。👍🏼👍🏼👍🏼越簡單的餸越考功夫一個魚香茄子煲就見功夫了茄子去皮，咁已經少有了，因為去皮要俾多份量，又浪費時間，但華漢卻做到了。色。香。味。色⋯⋯食到尾沒有太多油，証明師父將茄子走油時下了猛火，也停干了才炒。香⋯⋯有濃濃的咸魚，加埋彊、Garlic 同春蔥，嘩，炒埋一起。即來二個靚仔，唔該。味⋯⋯簡單的色—老抽，豆瓣醬，Salt, Sugar 已經夠了。二個飯，一個煲，一個中湯，一杯凍飲60 元超值忘記了影相，只影了當日另一個餸。沙爹牛腩煲。也是一絕

搬遷後第一次來，裝修好有格調，同以前一樣，門口一樣有坐位，店內還有張舊舖相，坐位比以前較小，但地方整潔。照舊叫了兩份沙爹牛肉公仔麵，一份跟煎雙蛋，一份跟奶油多，凍奶茶和茶走。沙爹牛肉公仔麵，水準保持到，牛肉鬆軟沙爹味濃，我習慣加小小辣招油，辣辣地勁夾，而麵order時，已叫了麵要硬，所以廚房煮得較生，彈牙硬身最啱我食。兩面煎過又有蛋黃汁，係我最愛，而奶油多士亦係我愛的厚多士，但多士忘了叫濃D，唔夠脆，有小小失望。奶茶都保持到，夠滑又夠香...

小菜$53，煲仔菜 $55，跟兩個飯，例湯同熱飲。今時今日真係唔係好多地方做到。你話係唔係絕頂一等一水平，唔係，不過作為街坊茶餐廳，佢啲小菜相比起一啲屋邨商場嘅茶餐廳嚟講，一啲都唔失禮，味道份量絕對對得起個價錢。兩個人兩個小菜加碟油菜一定夠食，130蚊有找，依家去快餐店兩個人食都咁嘅價。最衰係佢哋算收得早，十點到就閂門，自己放工有時夜咗就食唔到。附近食個焗豬加杯嘢飲都$50，仲要幾細份吓，依度多三蚊仲有湯，有得揀當然食依間。

同朋友在附近買東西下午四點多肚餓！見到這餐廳門面幾乾淨走來試試....人客並不多，隨便㨂卡位坐有下午茶餐..㨂了鼔椒牛河兩個都叫凍檸茶。等了十分鐘上枱...碟粉是迷你型碟上係好香食落口真的熱辣辣！！！面頭好大pat 嘅茨汁而且食落感覺好油貳食落河粉本身好滑不過炒到碎哂真係不敢恭唯D手勢我睇係生手炒召椒及牛肉份量極少不特以牛肉得果五六片仲要切得好細，實在太碎了凍檸茶不過不失，似乎細杯D埋單下午茶每人$38以咁嘅食物質素感覺麻麻

今晚爸媽都唔係屋企，所以無人煮晚飯，我決定和妹妹一齊落街食飯，再次來到屋企附近的餐廳，試下晚飯的味道如何。晚飯時間，估唔到都幾多人，見到得番張大枱有位，所以唯有搭枱坐，睇完餐牌就叫左碟濕炒雞絲河，另外一個枝竹牛腩煲。濕炒雞絲河份量多，河粉上有好多芽菜，蔥，同埋主角雞絲，但望落去似雞柳多啲，雞肉好滑，鑊氣相當夠，熱辣辣！然後到個牛腩煲，牛腩煮得夠淋，而且加上個柱侯汁，煲仔仍然好熱，再加埋好多枝竹，吸了好多汁，連枝竹都變得特別好食，跟左兩碗白飯，牛腩汁加落白飯，真係只食白飯都得

觀塘向來食lunch貴且多人，位於聯安街斜路頂這茶餐廳並不算當眼或就腳，但12點3，4去已相當旺場，餐廳裝修懷舊，尚算乾淨企理，若點麻婆豆腐除飯亦可跟意粉，相當神奇，不過我為人較守舊，點咸蛋蒸肉餅飯。跟餐有例湯飲品，湯尚可，熱啡微酸，肉餅無甚落豉油但偏咸，粉亦太多，滑則滑矣，無甚肉味，可取者份量大而已。

難得聞日放假，瞓到自然醒後就落街食個早餐，落到街行左一陣，醒起有間茶餐廳重新開，於是就要去幫襯下，不過新鋪有d 難搵，唔熟悉觀塘，唔係街坊都要花時間先搵到新鋪位置。去到見到地方闊落左，立即坐我喜愛的卡位，坐低就望見牆上早餐，午餐的餐牌，睇完立即落單，要我喜愛的沙嗲牛肉麵，再加餐肉煎蛋，同埋一杯熱奶茶，唔駛一陣就已經成枱食物，先試下牛肉麵，牛肉有醃過，所以食落除左有沙嗲味，都食到牛肉味，麵就正常，份量都算多，餐肉有煎過下，變得香口，餐肉味更出，食完之後就到杯奶茶，奶茶夠熱，唯一茶味差少少，但都係唔錯，又多個食早餐的好地方。

作為舊舖常客見到華漢終於開返當然要試下。講真以前早餐相當好味，但舊舖啲水準已經係重建要搬舖前1-2年好似個茶水阿叔已經無做，啲早餐水準自然下跌。今次都冇太高期望，純粹懷念當年等埋想近近地食早餐。 野食就都係好似未搬前咁，但係最大問題係啲樓面阿姐加入咗啲面孔。嘩，啲態度呢。。。 鬼死咁惡，又慢，又要惡所有客。咩事，以後唔會再幫襯

比較觀塘其他茶餐廳，這間新餐廳都算比較差。一個午餐 42蚊，A 餐 沙爹牛肉麵得2啖加牛油方包(多士都唔係) 同火腿蛋，B 餐 叉燒意一樣得少少。 茶餐廳最緊要係大件扺食，個碗就好大，以為自己翠華咩？呢間又唔大件又唔好食，個華田仲要好淡。。。。。。。。中伏。唔好以為新開一定好我係女仔，食完都唔飽。啲地盤叔叔食完一定好似無食過咁。。。雖然佢嘅裝修好懷舊，睇落都好乾淨同衛生，但係食物質，量都要改善一下。😞😞😞

公司附近的茶記中，「華漢茶餐廳」是我近兩年來光顧得最多的一家，愛其味道不俗且份量也足也。它在三月初因搬遷而暫時休業，攪到這個多月來真係冇啖好食。昨晚發現這間我平時當飯堂的店子終在新位置重開，即刻入去食番餐。新店明顯光猛也乾淨得多，裝修也玩懷舊風，尤愛它用黑板寫上菜名，和舊店用膠板寫上的menu有異曲同工之妙。看見還是那幾個伙記，即刻放心晒！果然，吃到的還是那熟悉的味道。這次order了舊店見別人食過，但自己未嘗過的鐵板什扒餐（配黑椒汁）賀賀佢！熱辣辣幾足料，有齊雞扒、牛扒、豬扒、腸仔及火腿，加埋什菜及薯條，跟埋另上的意粉、餐湯及凍飲，都係七十幾蚊，價錢便宜過唔少豉油西餐廳，且質素也較一般大型連鎖快餐店為高。之後連續兩天都有幫襯。其實此店我食得最多的還是煲仔菜套餐，當中的咖哩牛腩煲（相片攝於舊鋪）更是心水選擇。個港式咖哩汁唔會好辣，但夠杰身且相當下飯，牛腩、牛筋（有時會加埋金錢肚）夠晒軟，加埋青椒及薯仔，煲仔上即成夢幻組合。儘管天氣轉熱，但還是忍不住要吃。值得一提的是此店的煲仔飯也做得唔錯，冬天時的佳選也！