雲桂香米線專門店

Open Now

Now Closed

呢間荃灣分店已經幫襯左好多年，味道如一，今次叫咗個蟲草花雞湯米線，非常好味！雞湯都算入味，啲雞肉啖啖肉，米線份量好多，細食既我差啲食唔晒😂。價錢都係$50咋，非常抵食！其實旺角都有間，感覺呢間好似好食啲同事叫左個自選米線，中辣辣到飛起啊，但同事話過癮、爽既。侍應姐姐哥哥都好有禮貌，樓面亦都十分企理😆不過lunchtime預咗多人附近好多學生哥喔，如果想食lunch，可能要行快兩步或者等一陣間啊

總分，2.3/5食物方面，4/10啲面好林Pat Pat，炸醬好普通，其實係放入肚嘢食，唔吸引。我食熱拌米線小麻辣，雞絲，生菜。最唔鍾意食榨菜，佢完全係買返嚟嗰啲即食包裝，好難食，仲有種味喺度。唔鍾意。環境方面，5/10就係雲貴香，古色古味，但係唔算好靚。同埋琴日有浸酸味，入到去就聞到，唔香，好怪。但係都預計到。服務方面，7/10雖然佢冇得八達通俾錢，但係佢哋都好好人，冇晒現金，佢叫我出去撳完機再返入嚟。是但難旦嘅 好態度，I like it ! 呢間米線都叫做中學回憶，但係佢真係唔太OK~

雲桂香由細食到大😹😹可以話係性價比高嘅米線店~最中意佢嘅小鍋米線系列❤️呢間嘅辣唔係好勁，叫小辣都無乜辣味~食開辣嘅朋友可以直接叫大辣☁️小鍋紅薯粉 $48叫了雞絲同海帶，可見份量一啲都唔吝嗇!!每樣都有半碗嘅份量~(๑´0`๑)雞絲同紅薯粉好match浸咗湯後更好食!!!海帶都好爽口~小鍋湯底最好食唔會好油~小鍋湯底有芽菜酸菜同少少肉碎☁️港式水晶粉 $54水晶粉即係紅薯幼粉~都好有口感港式湯底即係胡椒湯底會有胡椒味~個人較喜歡小鍋湯底更濃味!!墨魚頭好彈牙爽口 推薦!!☁️菜心 $18正常發揮~

食過好多間唔同地區雲桂香既分店，之前一路都係覺得荃灣呢間最好味，坐既位置都舒服d，不過今日師父手勢唔同左，平時都係叫開中辣多酸，不過今次辣度唔夠，酸度冇左辣既襯托下勁左d，酸同辣食落冇咁融合，不過之後都係會繼續叫中辣多酸😂今次係腩肉豬皮龍蝦春卷海帶，除左腩肉係每次必叫，其他都係睇心情，其他係：雞絲 大腸 豬潤 魚肉春卷 冬菇 蘿蔔 紫菜，落左單先見好似有碗套餐既餸中左好多其他，價錢抵d多餸d,下次可以試下

原來荃灣米線店好多都10點截單今日遲咗食晚飯，去到荃灣又唔知好多間都已經截咗單，去到路德圍見到雲貴香仲未關就入咗去，但係為咗唔阻人收工都係叫個外賣返屋企食今次都係叫咗豬耳酸辣紅薯粉，十分之熱辣辣！紅薯粉嘅軟硬度適中，即使我買咗之後再返屋企食都經過三四個字，口感依然好好食另外都叫咗一個豬軟骨麻辣米線，豬軟骨都有3嚿，每個都大既！米線嘅軟硬度一樣冇問題，辣到叫咗小辣，佢嘅小辣係偏辣少少佢關門時間好似係晚上11:30，方便一啲好夜收工嘅人食☺️

今日下午嚟食米線，隔離枱有幾個員工放飯喺度食嘢，一路大聲喺度講緊自己中咗肺炎點點點，又喺度話成個廚房都中晒，嘩 真係叫咗碗嘢過嚟都想嗱嗱臨走！真係唔知佢哋店舖經理係邊個！完全唔理客人嚟食嘢嘅觀感同體驗！其中我望咗去佢哋嗰台一眼，個枱有個男嘅員工就話報警囉！雖然佢好似講笑咁講但係俾人嘅觀感真係差得離譜！即係好似你講咩我奈你唔何 你大不了咪唔好入嚟食囉既感覺，仲要佢哋全部員工都係好公然好大聲咁去講自己仲肺炎！其中又有兩個講吓講吓講到鬧交講粗口！真係覺得自己好似入咗一間中年爛仔學校！想講客人入嚟食嘢，除咗食物之外其實環境同埋服務都會好影響佢哋！呢個服務真係太差啦！

天氣濕熱 食碗米線開開胃🥢#雲桂香 由第一次食完雲桂香米線+皮蛋就一直就忘不了，就算去分店食，都好似冇荃灣總店甘好食！✨小鍋米線微辣+$31✨小鍋米線小辣+牛腩 $46牛腩好惹味，好香，咬落去吾硬，但都吾算極淋果種。湯底有濃郁的酸味，帶小小辣。✨小鍋米線微辣+豬紅 $40豬紅大大舊，勁新鮮，吾咸，吾腥，食得出鮮甜味，好意外🫣 湯底有濃郁的酸味，帶好小的辣。岩晒食吾到辣的朋友，但又想有香辣味。✨秘製豬頸肉🥓$42燒得好夠焦，食落皮韌肉軟，點埋甜酸醬好開胃😋😋✨醬伴皮蛋🥚$21每次必點！平時食開譚仔3哥麻辣味皮蛋，但呢度既更好味，係另一個層次！加上特製醬汁，又係食到吾停口既一款😍✨麻辣雞腎🐓$37雞腎口感煙韌，冇腥味🫣配埋芝麻蔥食落香香麻麻帶點酸甜味，勁好食！份量都好足！✨飲品🍹1.凍檸蜜加$10 正常味道2.凍菊花蜜加$7 識落少少甜帶點淡菊花味🌼 幾清新🍃3.凍檸七喜加$10正常味道評分:8.5/10📝整體而言:舌尖上的滿足👅，鍾意食米線嘅一定要黎試試。而今日嘅微辣湯底同小食連唔食辣嘅阿媽都食晒成碗米線！另外，小食款款都大份又高質，有啲睇落好辣，其實食落香味、酸味多於辣味，小小麻，值得

米線真係放工懶人首選，算是唔使用腦就揀到食咩嘅程度。就例如我嚟雲桂香，一如既往，都一定叫小鍋米線配雞絲，由一開初第一次食，之後每一次基本上都係呢個改不了嘅組合。湯底佢其實有好多款式，辣都有分幾款，而我通常叫都係叫麻酸辣中大辣。湯底濃身，有肉碎、芫茜等等，亦好能夠掛汁掛到上米線。而雞絲，係會想念嘅味道，首先量不少，本身有味之餘亦好吸湯汁，好夾好好食。每次上菜都熱辣辣，有好有唔好吧，好食但對心急嘅人就會燙口了～🤣小鍋米線配雞絲賣相：⭐️⭐️⭐️⭐️味道：⭐️⭐️⭐️⭐️價錢：⭐️⭐️⭐️⭐️

咁多間云桂香，終於都係荃灣總店最好味⋯今日叫咗痳辣豬軟骨米線、炸云吞、痲辣皮蛋、凍檸茶茶！當中最有驚喜係個麻辣皮蛋，皮蛋係松花皮蛋已經好好味，配上佢哋個麻辣醬汁，真係把層次加以提升，太好味啦！反而個炸云吞就比較失色，云吞皮太厚，吃上好有一口麵粉，感覺唔太鍾意，雖然好大件，但真係一般般囉⋯而個麻辣豬軟骨米線，真係唔會失望，啖湯好好味，米線處理得剛剛好，而且仲好彈牙，豬軟骨亦都好淋又夠味，真係食極都唔會厭⋯⋯

夜晚入間鋪頭嗌外賣，企門口等咗20分鐘都未有我開門同個男職員講 佢叫我再等等 冇睇過我張單 等咗半個鐘入去收銀問先知廚房冇單 無啦啦白等半個鐘乜都冇得食 真係嬲到第一次寫食評

呢間店可以打電話嗌外賣自取 今次嗌左個腩肉魚腐重慶酸辣粉 到嘅時候見到好多人喺出邊等緊 腩肉魚腐分量多 腩肉較肥 魚腐好食 湯底油 紅薯粉彈牙 外賣盒會分開湯底同埋紅薯粉 避免紅薯粉變淋 整體而言可以

垃圾員工，見到客揮手扮睇唔到，落單後二十分鐘後才入單，除非你好多時間比呢間垃圾哂，否則永遠都唔好去。放晏一小時 50分都未黎到，仲好意思叫我比錢？一世都唔盒再幫襯。

呢間鋪頭真係令人十分失望，我以前成日黎呢間鋪頭食就係因為米線好味。今日，明明落單個陣講佐好多次走辣走辣走辣，但啲staff根本無走辣仲要落勁多辣，落錯單仲要唔負責任，係埋就係因為我無叫嘢飲所以特登落咁多辣椒，用水沖啲米線都辣到食唔落。生意唔係咁樣做。要食雲桂香千其唔好黎荃灣呢間食。我對你地好失望。如果可以俾負分我會直接負分。

琴晚同朋友兩個人晚上八點幾入坐，每人叫左個米線，我自己叫左雲桂米線小辣 (配料有腩肉，雞肉絲，冬姑，芽菜等等) ，我朋友叫左個過橋米線，等左大約五至十分鐘，兩杯飲品來先，之後等多15分鐘，野食到！整體唔錯兩碗米線來到都幾大碗又夠熱，為一比較差咖係個散叫咖炸雞中翼，唔太好食可能返炸過來，所以如果下次再去食，應該只叫碗米線就好了... 最後埋單total兩位 hkd167，晚餐來講都算平! (快餐店除外)

天氣好熱冇胃口食飯，咁岩行過荃灣米線街，突然好掛住酸辣米線，平時食譚仔米線多。於是帶朋友入去試吓呢間嘅招牌小窩米線。我地點左一碗小窩米線再加一個小食。皮蛋好新鮮又有少少辣同麻辣，凍凍地食落超開胃。小鍋米線湯底有酸辣、麻辣。辣度有大、中、小、微辣選擇。我怕太辣所以揀咗微辣湯底配蘿蔔腩肉。湯底10分濃，蘿蔔煮到好軟林林同甜甜地好好味，而腩肉有少少辣好多塊都係林林地好好味😋而朋友就點左中辣腩肉加腐竹，佢表示辣得好過癮湯底又好好味😋加埋兩支凍飲真係舒服晒！