木玥巷 (Closed)

平時好少入元朗，今次放工去咗朋友屋企，咁我哋就喺附近揀咗一間台灣嘢食，估唔到有幾有驚喜喎！金沙抹茶奶泡抹茶味都幾濃，奶味適中，唔會好甜。玫瑰可可鮮奶飲落去好香玫瑰味，但又唔會遮蓋左可可鮮奶味，啱啱好。鳳梨蝦球呢個好好食😋！佢係炸左嘅蝦球配埋菠蘿同埋沙律醬，菠蘿酸酸甜甜，就算外層包左一層沙律醬，但加埋菠蘿一齊食都唔會漏，蝦球好爽口彈牙，呢個我哋好快就清晒！炒水蓮第一次食炒水蓮，本身食唔慣，但食食吓又覺得OK喎，佢係好爽口嘅菜，結果食下食下就成碟清晒😂。蟹肉金絲炒新竹米粉呢個推介必食！份量超多，而且蟹肉份量都唔少，米粉炒得好乾身，入面應該加咗啲芽菜同瓜，所以食落都幾爽口。地瓜條由於我係勁鍾意食番薯條嘅人，見到呢個忍唔住叫，上面加咗啲梅子粉，幾開胃。琥珀合桃其實呢樣嘢係一坐低佢就會送上嚟嘅，我都係第一次食台灣菜會送琥珀合桃，好食到我最後忍唔住買咗一盒走，佢色澤好靚，而且每一粒合桃都包左層糖衣咁，好香芝麻味，其實呢樣嘢好考功夫，因為好容易炸到燶咗有苦味，所以呢個真係有驚喜！