肉肉強食 by 鋒膳 (Closed)

細個嘅時候，爸媽成日會帶我哋去食鐵板餐，仲記得嗰時食鐵板餐係一件超開心嘅事，因為有得鋸大大塊扒，又有得放縱食薯條。大個咗反而好少再食。呢日阿妹介紹我嚟長沙灣呢間肉肉强食，走懷舊港式西餐廳路線，枱面鋪上紅白格仔枱布，d童年回憶返晒嚟！鐵板餐價錢非常親民，最抵食嘅當然係$20嘅吉烈宮崎豬柳鐵板餐，6pm後供應，每天限20份，我哋點咗一份，上檯時完全嚇親，因為份量絕對無將貨就價，足足有兩大塊之多，而且每塊都非常厚切！豬肉仲要用上宮崎豬柳，肉質爽彈有嚼勁，炸漿都好薄，淋上蒜蓉汁後，非常惹味！其他鐵阪餐一樣價錢相宜，$58-138不等，而且不收加一，難怪平日晚市都座無虛席！、牛柳鐵板餐($128)採用紐西蘭牛肉，肉味雖然唔算濃，但肉質好軟腍，毫不嚡口。我特別欣賞餐廳強調所有肉類都不以鬆肉粉或食粉去醃，食得健康！牛柳同黑椒汁係絕配，上枱時，店員就淋上黑椒汁，鐵板滋滋作響，聲音好療癒！美式什扒($78)呢個又係充滿童年回憶，細個我最鍾意就係食什扒，因為款式最多，感覺最豐富，啱晒貪心嘅我！呢度嘅什扒份量好慷慨，眼見幾乎所有客人都食唔晒，好誇張！有雞翼、豬扒、司華力腸、煙肉、雞扒等，配上洋蔥汁，太好食！