Video
Read full review
2021-02-23
4274 views
身邊的朋友都知我是「點心控」，從小就喜歡跟老爸在茶樓鑽，屈指一算都超過50年了，不單試過凌晨時分老遠跑去元朗的冬菇亭飲茶，又試過一天飲足三餐，早餐是熟食街市的幾十年老店，中午是九龍香格里拉的香宮，而晚上更是都爹利館的任食放題，想起來都覺得瘋狂。由於之前工作關係，好多時都空出了中午時分，而身邊又有幾位愛上「一盅兩件」的朋友，差不多每個月都有兩三次聚會，走訪坊間不同食店，因利成便，「點心兵團」平空出現。雖然同是酒店級別，但水準高下立見，「平」加任食並不代表「濫竽充數」，而星級酒店中亦非「免死金牌」，偶爾都會中伏。作為2021年首篇點心食評，為免令大家倒胃，就先講下一間性價比幾高的酒店中菜廳。大概是三幾個月前吧！當時限聚令仍是4人一檯，而「點心兵團」又有新朋友加入，啱啱好湊夠腳一檯。其實每次係群組提議餐廳時，地點真係涵括港九新界，隨時噏到一二十間，而今次就選來了「新世界千禧酒店」的「桃里」中菜廳。餐廳中午有任食點心提供，建議大家要早兩三日登記做會員（因為不可以即時入會），折扣後人均都不過$300，或者閣下會認為「唐人館」都係百零蚊，仲要有「星」啦！但係當你試過要親身走去排隊，就可能會縮沙，至
身邊的朋友都知我是「點心控」，從小就喜歡跟老爸在茶樓鑽，屈指一算都超過50年了，不單試過凌晨時分老遠跑去元朗的冬菇亭飲茶，又試過一天飲足三餐，早餐是熟食街市的幾十年老店，中午是九龍香格里拉的香宮，而晚上更是都爹利館的任食放題，想起來都覺得瘋狂。由於之前工作關係，好多時都空出了中午時分，而身邊又有幾位愛上「一盅兩件」的朋友，差不多每個月都有兩三次聚會，走訪坊間不同食店，因利成便，「點心兵團」平空出現。
雖然同是酒店級別，但水準高下立見，「平」加任食並不代表「濫竽充數」，而星級酒店中亦非「免死金牌」，偶爾都會中伏。
作為2021年首篇點心食評，為免令大家倒胃，就先講下一間性價比幾高的酒店中菜廳。
大概是三幾個月前吧！當時限聚令仍是4人一檯，而「點心兵團」又有新朋友加入，啱啱好湊夠腳一檯。
其實每次係群組提議餐廳時，地點真係涵括港九新界，隨時噏到一二十間，而今次就選來了「新世界千禧酒店」的「桃里」中菜廳。
餐廳中午有任食點心提供，建議大家要早兩三日登記做會員（因為不可以即時入會），折扣後人均都不過$300，或者閣下會認為「唐人館」都係百零蚊，仲要有「星」啦！但係當你試過要親身走去排隊，就可能會縮沙，至於詳情，稍後「唐人館」篇會同大家講。話說中午點心約有28款左右，相信能夠食均每一款的朋友不多，加上在座其他三位都是女士，就更加要精挑細選。
餐前即刻來碗位上的「蟹肉灌湯餃」，雖然自己依然係舊式灌湯餃擁躉，兩年前係「陸羽」食都要80蚊籠啦！任食而有灌湯餃的餐廳，相信一隻手數完有找。湯底的確鮮甜，蟹肉未至於重手，但仍食得出，整個湯餃扎實，任食之下，沒挑剔的地方，即時再下一城，已經半飽。
若然未夠喉，仲有老火例湯選擇。飲完湯開始入正題。
頭盤先上「香茅叉燒汁豬頸肉」同「青瓜燻蹄」。
再上就係「晶瑩鮮蝦餃」，摺絞算清晰，皮薄，能透出蝦肉色澤，咬落柔韌，邊位看得出經修剪過，蝦肉爽彈，基本水準以上，但擺位可以好少少，畢竟係酒店中菜廳，賣相都係佔一重要席位。
另一道坊間少見的「腐皮鵝肝百花蝦卷」，外層爽口彈牙，內裡是軟綿豐腴的鵝肝，好彩份量不多，就算感覺邪惡問題都不大。
「香茜娥姐鮮蝦粉果」餃皮晶瑩剔透，蝦肉爽鮮，不錯。
家陣年紀大了，自然多回憶，「黑椒味菜蒸爽肚」跟「豬肚燒賣」都是兒時的味道，而且炆煮得幾稔身，不怕食內臟的朋友值得一試。
而「香蝦炸雞球」幾香口。
當然少不了鬆軟熱燙的「叉燒包」。
至於「瑤柱鮮蝦鯪魚球」就不過不失，肉質不會太死實，而且魚腥味輕盈，可接受。
加上「洋蔥燒汁叉燒酥」及「豉汁煎釀魚蓉尖椒」，其實已經大半飽。
想清清地，就來碟「雞油炒白菜苗」，真係天使魔鬼的合體，白菜炒得綠油油的，帶鑊氣我鍾意。
單尾就要了「豉椒牛肉煎米粉」，置底的米粉煎得好香口，跟上次「東來順」不快經歷是兩碼子的事，容後再跟大家分享，不過略嫌牛肉醬汁太多及偏咸，有改善空間。
壓軸當然係甜品時間，「凍香芒布甸」、「黑芝麻椰汁凍糕」及「空心煎堆」都係重點推介，有凍有熱、有炸有糕，啱啱好。
疫情下大家都在努力支撐住，令好多餐廳都有優惠推出，所以能幫趁就幫趁，算是苦澀中雙贏的局面吧！
Post
