Paper Stone Bakery (Closed)

之前食咗同一個商場內另一間都係賣西餅嘅餐廳， 今次試下呢間麵包舖，除咗主打歐陸式嘅麵包，見佢啲甜品同埋咖啡都好多人買，而呢間麵包舖喺舖嘅一角設有枱櫈，座位都頗多，可以畀顧客休閒咁樣high個靚tea。喺店員嘅推介之下，我同朋友揀咗食士多啤梨同埋菠蘿嘅酥餅，首先係士多啤梨酥， 滿滿嘅士多啤梨配上吉士同酥皮，士多啤梨超juicy ，而且又有好多片， 下面鋪著滿滿嘅吉士醬，連埋酥皮一齊食，又脆又軟既質感， 由於有士多啤梨嘅關係酸酸甜甜所以中和咗酥皮同埋吉士醬既飽膩感。「小二，我要食十個」偷偷地咬咗朋友嘅菠蘿酥一啖，呢個酥配起菠蘿就有唔同效果，因為菠蘿燒香咗嘅關係，吊起咗少少焦糖味， 而且酥皮外面沾上少少朱古力同埋椰絲 有另一種質感，加埋裝飾既菠蘿葉，好有熱帶feel，不過吉士醬就比士多啤梨酥少啲， 可能因為菠蘿係甜過士多啤梨啦。P.s.建議鍾意食得吉士醬嘅朋友就食士多啤梨酥，鐘意食甜啲既朋友就食菠蘿酥。