杏甜品 (香檳大廈) (Closed)

今日同朋友落尖沙咀行街經過呢間甜品店，覺得門面好靚，咁啱又覺得口渴，於是就入去坐一坐，食碗甜品唞一唞。間舖頭唔大，但係裝修得非常溫馨，枱與枱之間有足夠的空間，令人坐得舒服。可能係下晝快四點鐘嘅關係，人流並唔多，俾咗我哋一個休閒談天的機會。坐落睇到佢嘅餐牌都妥為特別，原來除咗甜品佢仲有輕食例如咖啡三文治等。甜品方面除咗一般的杏仁茶合桃露等，佢仲有足兩燕窩同埋一啲自家製嘅冰點。我就要咗一個泰國金標龍眼爽冰，而我嘅朋友就嗌咗杯士多啤梨小丸子吸吸。龍眼就食得多，不過咁做嘅爽冰仲係第一次食。因為係自家製的冰，佢哋將龍眼肉亦都攪在冰內，加埋啲小丸子，食入口變得有咬口，口感非常之特別。朋友話杯士多啤梨小丸子吸吸味似yoghurt，亦非常之解渴，仲話搵到呢間舖頭係發現新大陸，下次去開尖沙咀必定會再去幫襯。