彩福欣宴 (Closed)

彩福系全香港唔同地區都有分店，大部份叫彩福皇宴，不過呢間就叫彩福欣宴，雖然唔知點解專登改個唔同既名，但系食物選擇大致相同，而且每間既質素都能維持系高水平，而最重要就系非。常。抵。食。豉油皇煎蝦 – 蝦煎到脆卜卜，又夠乾身，連殼都可以食埋，豉油味滲曬入蝦殼同蝦肉，非常香口惹味，蝦肉亦都夠爽彈，幾好食!菠蘿咕嚕肉 (85) – 先炸後炒，但食落又唔會好油膩，而咕嚕肉夠脆身，咬落又有肉汁，配埋酸酸甜甜既醬汁，個人黎講系十分喜愛。西蘭花炒帶子 (142) – 帶子大大粒超肥美厚肉，仲有成差唔多10粒，真心正! 肉質夠嫩，食落覺得好新鮮，而西蘭花就簡單用蒜及彩椒炒，加埋少少蠔油吊味都夠曬好食。小炒皇 (90) – 想食菜又唔想太齋就非小炒皇莫屬，除左韮菜花外，仲有唔少蝦乾、蝦肉、腰果同彩椒，用料都幾豐富，仲有少少辣味，幾香口幾有鑊氣!