寶時茶餐廳

Open Now

Now Closed

【九龍城區】【寶時茶餐廳】我真係好唔想寫呢間，因為我已經霎時咁愛上咗呢間餐廳，暫時都將佢視為一個「鐵竇」。而呢啲地方我真係好怕會「捧紅咗」，佢嘅賣點就係懷舊，就係嗰種香港嘅老味道，太多人去踐踏佢嘅話，隨時保唔住現有嘅狀況。食物就唔係話變化萬千嗰種，都係啲冰室茶記嘢，我第一次去叫咗個 $36 嘅「全日早餐B」，主食係「沙爹牛麵」，都係一碗好普通嘅沙嗲牛肉麵，冇乜特別。配菜「餐肉煎雙蛋」都係啲普通嘢，明知佢係一個扒爐攪掂晒嘅。而「牛油方包」我就加 $1 烘底令佢變成「牛油多士」，好食咗。杯茶緊要，嘢飲點都飲「熱奶茶」，細杯啲，但味道唔錯，係一杯好嘅奶茶，呢餐埋單 $37 但我知道實有下次。睇定第二次實要食 $6 嘅「卷蛋」，睇吓點。結果佢都唔錯，有機會會再叫。呢次我仲叫咗 $24 嘅「鮮油菠蘿」配「凍奶水」，相當肥仔，夾埋 $30，正。見佢哋手寫貼牆嘅餐牌仲有啲飯類可以揀，有機會點都要食「豆腐火腩飯」，如果係同女同事食，肯定非常浪漫。。。按：喺寫好稿同出 post 之間嘅空檔期，我已經忍唔住去咗食「是日快餐」嘅「豆腐火腩飯」配「凍奶茶」，的確係幾正。同埋，咁樣嘅配搭組合都係講緊用我 $44