One More Hotpot 來一鍋 (Closed)

團年的確係食中菜比較有氣氛，但一年到尾咁多節慶，食來食去都嗰幾款都難免有啲悶。搵到呢間高級少少嘅任食海鮮火鍋，每人$368再八五折，除落同街坊酒樓圍餐唔差得遠，但食材用料明顯性價比高好多。一入到嚟見到咁精緻典雅嘅裝修真係估唔到係火鍋店。店內有唔少靛藍色嘅闊梳化卡位，四個人嚟食坐得舒舒服服。海鮮火鍋同$288藥膳火鍋嘅分別係咩?就係呢盤打卡一流嘅海鮮！一人一隻扇貝、青口、鮑魚、蠔、珍珠蚌、象拔蚌同大蝦。樣樣都又大隻又新鮮。呢度比起酒樓好嘅就係服務，店員會教你每樣海鮮最好灼幾耐同點樣起肉，見到客人戴口罩更加主動提供熱水熱茶。手打肉丸同餃子冇過多嘅調味，食到肉嘅原味。即使唔點任食海鮮都好滿足(當然，加少少錢都係海鮮鍋抵啲啦~)而任點區都唔係得啲肉丸，一啲比較貴嘅食材，例如花膠、脆鯇腩、羊肉、牛骨髓、豆苗都可以任點。店員會將火鍋料放喺枱旁車仔，全餐飯我哋都唔洗勞動，可以一直同屋企人傾計同食嘢。最後仲有心太軟做甜品，為呢餐完美作結。