茶豆冰室

Open Now

Now Closed

【大埔區】【茶豆冰室】去到太和，個人有啲攰，唔想行太遠，就喺火車站附近搵嘢食。我就對飲食冇乜要求嘅，唔太過份嘅話基本上我都會容許啲餐廳蒙混過關。畢竟香港地生意難做，租金奇貴，都好難要求性價比每次都咁高，我好同情飲食業架。因此我寫 foodie 嘢嘅時候好多時都寫得溫和過溫和達，而喺選材方面更加唔介意食一啲好平凡嘅餐廳。縱使被人詬病為「茶餐廳 foodie」，但亦有唔少讀者講返我嘅餐廳選擇夠親民、夠貼地，亦都有效反映出現實情況會係點。鋪墊咗咁耐其實都係為咗講我喺太和街市求其搵間茶記食咗個 $50 嘅「常餐」，希望大家都支持啫。主食幾特別，可以揀 1+2 嘅餸，我揀咗「雞扒」加「五香肉丁」同「煎蛋」配「米粉」，味道正常，茶餐廳係咁上下水準。不過佢個配菜冇奄烈，得件「厚多士」，正正常常。飲品方面，最近公司加咗我人工，所以我有勇氣加 $3 飲「凍杏仁奶露」，略嫌有啲淡口。埋單價 $53，都冇咩好講，不過晚市佢哋都多人食客飯小菜之類，睇嚟係唔差嘅。。。（地址：大埔太和路12號太和廣場地下太和市場T-TW01號舖）#1amfoodie #foodie #hkfoodie #thatfoodieth