十二味 (LADDER Dundas) (Closed)

天氣開始凍，除咗打邊爐，食辣都係一個唔錯嘅選擇。講起辣，四川麻辣嘢當然係其中嘅代表，今次就去咗旺角嘅「十二味功夫」，呢間鋪頭唔算大，但人特別多，等嘅需要係LIFT門口排隊，侍應們有時都會經過呢條「通道」，所以有啲逼。最後等咗大約20分鐘就可以入座。等咗咁耐，當然要試呢間鋪頭嘅主打「人見人愛酸菜魚」+「寬粉」、除咗酸菜魚外，仲叫咗「招牌自選香鍋」及「紅糖糍粑」，而飲品就叫咗「桂花冰釀」。上菜時間都好快，而且好大碟！其實呢三款都夠3-5個人食！「人見人愛酸菜魚」，魚肉嫩滑無骨唔腥，湯底小辣夠麻，酸菜份量十足，味道出色！「寬粉」充分吸收湯汁，開胃！「招牌自選香鍋」，點咗小辣，無乜辣味，而且無乜麻味，不過就好香孜然味，而且勝在夠大份。「紅糖糍粑」，糍粑外脆內軟，紅糖重黑糖味，我覺得呢款菜色係必叫！「桂花冰釀」，個酒樽外型超級中國風，味道唔錯，而且有啲似「酒釀桂花丸子」入邊嘅糖水，不過份量偏少。總結，「人見人愛酸菜魚」同埋「紅糖糍粑」係必試，食得辣嘅最好叫少辣就唔係幾夠喉，其他嘢食有待之後挖掘。