火狐爐端燒 (Closed)

今日同朋友去咗荃灣試呢間火狐爐端燒。鋪頭比較細，唔算好闊落，但幾有日式小店既風情。裏面仲有一部電視，播着住電影，我哋去嗰時就播緊Leonardo嘅Catch me if you can，等緊上菜嘅時候可以睇下，冇咁無聊。好，正式開始講嘢食啦。首先第一道菜係厚燒玉子。玉子平時我係屋企都會自己整，但就好難整得好似佢咁嫩滑，同埋表面完全冇燶。佢呢個玉子好juicy，本身就已經好好食，再加上佢仲附送左少少蘿蔔泥，夾埋黎食就更加清新，唔會咁快覺得膩另外前菜仲嗌咗個豆腐，個汁係鹹鹹地嘅，都係附送左少少蘿蔔泥，好清新開胃。黎得爐端燒就梗係要嗌返幾串串燒啦，我哋嗌咗牛舌、雞軟骨同埋黑豚五花腩。全餐最令我驚喜應該就係呢幾串串燒，佢烤得恰到好處，香氣四溢嘅同時，又保持到肉嘅嫩滑。特別係牛舌，喺出面食到通常會有少少韌，呢度就烤得非常香軟嫩滑。如果想食清新啲，亦都可以自己擠少少檸檬汁，我自己就係間住間住咁擠檸檬汁嚟食，真係好正！！最後一道菜係蟹膏海鮮炒飯。個飯炒得非常香口，食得出蟹膏嘅香味，飯粒亦粒粒分明。唯一美中不足嘅係，蝦炒得有少少乾身，如果可以改善呢一點，就可以話係完美啦！總體來講，呢餐都食得非常滿意。