人人和平小飯店 (Closed)

【東區】【人人和平】呢間嘢聽講過好耐，亦都食過幾次外賣，都覺得幾好食。所以今次難得溫寧哥請客，拼咗條老命都要出嚟啦。我哋一行五人，坐低冇耐就下定決心叫個 $105 嘅例牌「波瀾壯闊肥腩叉」，燒到有啲焦黑色，一如以往咁好食。溫寧哥叫嘢食嘅速度有進步，轉個頭嚟埋 $118 嘅細「砂窩鵝汁炒飯」，唔多中意食飯嘅我都覺得正。而 $169 嘅「鳳梨船咕嚕肉」係幾次都有叫嚟食，都係唔錯嘅。之後 $128 嘅半隻「南乳吊燒雞」我都好中意，尤其個醬。最後嚟埋 $88 嘅「椒絲腐乳炒通菜」，炒得都幾有鑊氣幾好食，估唔到。嘢飲方面，成班佬都係飲 $62 杯嘅「Stella」，喺具質素嘅食物面前，一杯冰凍嘅啤酒真係一個唔錯嘅點綴。餐飯夾埋 $1071，多謝溫寧哥慷慨請食飯。睇返之前食過外賣嘅相片，原來叫埋嘅嘢都係差唔多，好記得佢就算係外賣，經過運送過程之後，都相當有質素。即係佢唔係一味靠熱度去抬起個味道，而係本身都好食，先做到呢個效果。希望可以保持水準，做人民飯堂。。。（地址：北角堡壘街 6-8 號 A 舖）#1amfoodie #hkig #foodie #hk #hongkong #hongkongfo