阿木台灣麵 (廣華街) (Closed)

等位等咗成個鐘，由兩點等到三點，等到下午茶都食到😹，大家都肯等就知道佢有幾受歡迎啦！P.S下午茶真係好抵食💸​.​🌶麻辣牛肉麵(角切)（$58）​唔小心叫咗角切有啲傷心，原本想叫片切，不過角切都唔錯，大大嚿肉，總共有五大嚿，牛筋部分唔會韌同硬 ，又唔會過軟，不過差啲牛味，湯底方面我自己就覺得唔錯，因為好清甜，唔會死鹹，不過重口味嘅人可能會覺得唔夠味，雖然叫咗麻辣味，但唔辣，建議可以加佢哋枱面嘅秘製麻辣醬，成個湯嘅味會出好多。​好食程度：🌕🌕🌕🌕🌖​.​🌶麻辣乾拌麵（$36）​呢個係下午茶套餐嚟嘅，2:30開始有下午茶，性價比高，比起正常餐牌平好多，但份量冇減少，可以自選選三款小食，今次我就揀咗台式香腸、鹽酥雞同埋滷豬耳，香腸咬落超級脆，外脆內軟，原條咬個口感真係超正☺️，鹽酥雞可能因為下午茶嘅關係唔係即叫即炸，唔係太脆，但炸粉都適中，唔會過厚，至於滷豬耳都算入味，豬皮幾淋，麻辣麵方面，麵質非常彈牙，唔會太乾，醬汁有少少甜味。​好食程度：🌕🌕🌕🌕🌖​.午市套餐同下午茶都包飲品，凍飲加$4，我叫咗凍台式奶茶，佢哋嘅奶茶茶味比較重🍵。.同埋佢哋個秘製麻辣醬真係唔錯，可以考慮買番罐返屋企食🌶​.