潮丸 (Closed)

「無丸不歡」既我，知道筲箕灣有間專食爆汁牛丸既粉麵專門店「潮丸」，梗係要抽時間試一試！潮丸裝修風格都幾「摩登」，同一般粉麵店好大分別，原來食粉麵都可以好chill😂!藍綠色嘅外牆，配合懷舊花紋嘅地磚，新舊交替。內裏裝潢走工業風，空間感十足！即使係下午茶時間，座上客不絕，可能呢個就係品質既保證。細心睇一睇掛喺牆上既掛畫，最吸引我眼球既就係幅juicy「極上牛丸」！見到都流口水！原本諗住就咁叫個牛丸王河就算，點知又發現咗正嘢！凳凳！就係集齊牛丸、牛筋、牛肚、牛腩既牛！魔！王！另外，仲叫多個蘿蔔添！白蘿蔔上枱大大碗，味道清甜，咬落無渣，不錯！之後就係主角登場！牛魔王份量一d都唔惹小，未入口已經feel到濃郁牛肉香味！四樣餸都好吸引！每日手打鮮製既牛丸咬落好juicy多汁，牛腩肉質鬆化，牛筋煙韌，牛肚爽口彈牙！絕對配得起「牛魔王」呢個名！臨走前，仲見到原來有得就咁外賣牛丸，下次嚟一定要買番兩斤番屋企慢慢回味下先！