香港冰皮燒鵝 (Closed)

【西貢區】【香港冰皮燒鵝小廚】喺將軍澳坑口文曲里公園附近繼續搵嘢食，切實咁做一個文曲里公園嘅巡遊者。經過呢間嘢嘅時候，一開始見到呢個名以為又係啲普通燒臘舖整色整水 sale 燒鵝，之後先知係「棋哥」啲副線嚟，咁應該唔差喎。入到去見到裝修都係新派，仲好多好似動漫形象化咗嘅嘢，唔講以為係女僕 cafe 嘅一角。而餐廳嘅一邊牆有盞燒鵝形狀嘅燈，會變色，我有影低，幾得意。枱面上亦都好簡單地只係放燒鵝醬，睇嚟好似又真係幾專業咁喎。我叫咗個「開心特價下午茶」，比較之下價錢又真係平好多，一般食得燒鵝，點食都好，都起碼五六十蚊打上先好講其他嘢。佢呢度個一人餐都唔過百，二人餐亦都唔過二百。而我咁啱下晝去，有埋下午茶，所以係仲抵。講咁耐我當然係食佢哋嘅「王牌香港冰皮燒鵝瀨粉」，就係想試招牌菜冰皮燒鵝吖嘛。我見轉「鵝胸」加 $10，問吓侍應哥哥仔有咩分別，佢話鵝胸會多肉啲，一向食鵝最唔爽嘅其中一點就係唔夠肉，好喎，就加錢轉佢。食落個燒鵝皮真係好脆，雖然佢冇另上係令我有啲詫異，但係就算喺湯度都可以食到皮脆係犀利。成個感覺誠然係可以做到油而不膩，真心幾啱我食。加埋「凍奶茶」夾埋就 $61，美中不足係用紙杯唔夠環